მისი დაბინძურების კიდევ ერთ წყაროს აგლომერატის სანაყარო წარმოადგენს, სადაც გამამდიდრებელი ფაბრიკების შუალედური პროდუქტის გადამუშავების შემდგომ მიღებული მილიონ ტონამდე პროდუქციაა თავმოყრილი. წვიმების და წყალდიდობების დროს ეს მასა დიდი რაოდენობით ხვდება მდინარე ყვირილაში, რაც მდინარის ეკოლოგიურ მდგომარეობას კიდევ უფრო ამძიმებს.
ამ საგანგაშო ინფორმაციას ასოციაცია “ჭიათურელთა კავშირი” ავრცელებს. მისი ხელმძღვანელი შოთა გაფრინდაშვილი მიესალმება შპს “ჯორჯიან მანგანეზის” მიერ წყლის დაბინძურების აღკვეთის მიზნით შესაბამისი აპარატურის შეძენას, მაგრამ მისთვის უცნობია, თუ როდის აპირებს კომპანია აპარატურის ამოქმედებას და მისი მეშვეობით, შლამებით დაბინძურებული წყლის მრავალჯერად გამოყენებას _ ე.წ. “ჩაკეტილი ციკლის” გამოყენებას.
“აღნიშნული კომპანიის მიერ აღებული ვალდებულებების მიხედვით, ჯერ კიდევ 2010 წელს უნდა დასრულებულიყო საპროექტო სამუშაოები, რომლებიც მდინარის დაბინძურებას შეამცირებდა, ხოლო 2011 წელს წყალამრიდი არხებისა და დამცავი ჯებირის მშენებლობა უნდა დაეწყოთ, მაგრამ ამ მიმართულებით, არაფერი გაკეთებულა”, _ ამბობს გაფრინდაშვილი.
სახელმწიფოს წინაშე აღებული ვალდებულებების მიხედვით, შპს “ჯორჯიან მანგანეზს” ევალება ჰაერის დამტვერიანების, ნიადაგის დაბინძურების, ჩამდინარე საწარმოო წყლების და ზედაპირული წყლების ობიექტების ხარისხის რეგულარული მონიტორინგი. მანვე, წყალსა და ჰაერში მავნე ნივთიერებების კონცენტრაციის მომატების შემთხვევაში, შესაბამისი ღონისძიებები უნდა გაატაროს. ვალდებულებები არ სრულდება, მაგრამ კომპანიას ამის გამო პასუხს არავინ თხოვს; აღნიშნული კვლევა არც კი ტარდება “მარტივი” მიზეზით_ შესაბამისი ლაბორატორია არ არსებობს, მიუხედავად იმისა, რომ კომპანია ვალდებული იყო შესაბამისი ლაბორატორია 2009 წლის მე-3-ე კვარტალში შეეძინა!
რაც შეეხება ჰაერს, ჭიათურელთა გულისწყრომას იწვევს დამატებითი დაბინძურების კერა – ზესტაფონიდან შემოტანილი ფეროშენადნობთა გადამუშავების შედეგად წარმოქმნილი ნარჩენი ე.წ. “წიდა”, რომელიც უხვადაა შეტანილი ჭიათურა-საჩხერის ტერიტორიაზე. ნარჩენი კომპანია “ჯორჯიან მანგანეზმა” შემოიტანა და დაასაწყობა. ასოციაცია “ჭიათურელთა კავშირი” ამაოდ ცდილობს კომპანიის ხელმძღვანელობისგან გაიგოს, თუ რა ბედი ელის დასაწყობებულ “წიდას” და აპირებს თუ არა კომპანია დამატებით მის შემოტანას.
ასოციაციის ხელმძღვანელი, შოთა გაფრინდაშვილი მიიჩნევს, რომ კომპანია არ ასრულებს საქართველოს სახელმწიფოს წინაშე აღებულ ვალდებულებებს, არღვევს კანონმდებლობას და მოქალაქეთა კონსტიტუციურ უფლებას, იცხოვრონ ჯანსაღ გარემოში.
“ეკოლოგიური პრობლემების შესწავლის პარალელურად, ასოციაციამ შეისწავლა მოსახლეობის ყველა სოციალური ჯგუფის, მათ შორის, ადგილობრივი თვითმმართველობის წარმომადგენელთა განწყობა და დამოკიდებულება კომპანიის მიერ აღებული ვალდებულებების შეუსრულებლობის გამო და დაბეჯითებით შეგვიძლია ვთქვათ _ ყველას პოზიცია ამ საკითხთან მიმართებაში მკვეთრად ნეგატიური და პრინციპულია. ეს განწყობა დაფიქსირდა პეტიციაზე ხელმოწერითაც, რომელსაც 3000-მდე მოქალაქემ მოაწერა ხელი”, _ ამბობს გაფრინდაშვილი.
ჭიათურის მოსახლეობის მოთხოვნა, ისევე როგორც ასოციაცია “ჭიათურელთა კავშირის” მიმართვა კომპანია “ჯორჯიან მანგანეზის” მიმართ, დღემდე იგნორირებულია. კომპანიას, რომელიც საქართველოს ჰაერს, მიწას და წყალს აბინძურებს, კანონისა და ვალდებულების შესრულებას არავინ თხოვს!
ჭიათურელები ამჯერად მინისტრისგან ითხოვენ პასუხს
“ბატონო ალექსანდრე, არ გვეგულება მსოფლიოში არც ერთი ცივილიზებული ქვეყანა, სადაც ინვესტორი ასე უხეშად უგულებელყოფდეს სახელმწიფოს წინაშე აღებულ ვალდებულებებს და ადამიანის საყოველთაოდ აღიარებულ უფლებებს _ ცხოვრობდეს ჯანმრთელობისათვის უვნებელ, ჯანსაღ გარემოში (ორჰუსის კონვენცია).
გამოვხატავთ რა ჭიათურის მოსახლეობის აბსოლუტური უმრავლესობის ინტერესს და აზრს, გთხოვთ, გვაცნობოთ, რა ზომების გატარებას აპირებს საქართველოს ენერგეტიკისა და ბუნებრივი რესურსების სამინისტრო შპს “ჯორჯიან მანგანეზის”, როგორც კანონდამრღვევი სუბიექტის მიმართ და როდემდე შეიძლება გაგრძელდეს მათი თვითნებობა”, _ ნათქვამია განცხადებაში, რომელსაც ასოციაცია “ჭიათურელთა კავშირი” ამჯერად საქართველოს ენერგეტიკისა და ბუნებრივი რესურსების მინისტრს, ბატონ ალექსანდრე ხეთაგურს უგზავნის.
ასოციაცია ერთი თვის განმავლობაში ამაოდ ცდილობდა კომპანია “ჯორჯიან მანგანეზის” წარმომადგენლისგან გენადი ტიკვასგან მიეღო პასუხი, თუ რატომ არ ასრულებს კომპანია აღებულ ვალდებულებებს და ჭიათურის მოსახლეობას ეკოლოგიური კატასტროფის, ბუნებას კი გამოუსწორებელი ზიანის წინაშე აყენებს.
ასოციაციის ხელმძღვანელი შოთა გაფრინდაშვილი ამბობს, რომ იმედი აქვს, კანონმდებლობით განსაზღვრულ ვადაში სამინისტროსაგან პასუხს მიიღებს: “სამინისტრო ვალდებულია ქმედითი ღონისძიებები გაატაროს, ვინაიდან შპს “ჯორჯიან მანგანეზი” არ ასრულებს სახელმწიფოს წინაშე აღებულ ვალდებულებებს; კერძოდ, “ჭიათურის სამთო გამამდიდრებელი კომბინატის მიმდინარე საქმიანობის შეფასების ანგარიშის” ექსპერტიზის საფუძველზე გაცემული ლიცენზიის პირობებს, რომელიც ითვალიწინებდა გარემოზე ზემოქმედების შემცირების შემამსუბუქებელ გარემოებებს”, _ ამბობს “გურია ნიუსთან” გაფრინდაშვილი.
სამინისტროსგან ტიკვასებული დუმილის შემთხვევაში, მოსახლეობას მხოლოდ ერთი გზაღა დარჩება _ საპროტესტო აქციები გამართოს ტიკვასთვის “ექსკლუზიურად”, ჭიათურელთა ჯანრთელობის და საქართველოს ბუნების განადგურების ფასად გადაცემულ კარიერებთან.
