ამის მიზეზი ბოლო დროს, მათ მიმართ მოსახლეობის მხრიდან გამოჩენილი აგრესია და ძალადობაა. როგორც ირკვევა, ბოლო თვეების მანძილზე “სასწრაფოზე” მომუშავე ექიმები ხშირად ხდებიან სხვადასხვა მუქარისა თუ სიტყვიერი შეურაცხყოფის მსხვერპლი.
“ხშირია შემთხვევა, როდესაც პაციენტთან დასახმარებლად მისულებს უშვერი სიტყვებით გვლანძღავენ _ სად იყავით ამდენ ხანს, თქვენ და ეს მთავრობა რას გვიკეთებს, თქვენ არაფერი იცითო. გინების ისეთი კორიანტელი მოდის ჩვენს მიმართ, რომ შეუძლებელია ამ ყველაფრის ატანა. ამას ბოლოს ისიც დაემატა, რომ ხელითაც გვეხებიან,” _ აცხადებენ ლანჩხუთელი მედიკოსები.
ლანჩხუთის სასწრაფო სამედიცინო სამსახურის ოფისში მათ პრესკონფერენცია ჩაატარეს და იმ შეურაცხყოფებზე ისაუბრეს, რომელსაც მათ ბოლო ხანებში აყენებენ. მიხეილ ბარამიძემ, ვარდო ჩხარტიშვილმა, ნესტან სურგულაძემ, მაია ჩხაიძემ და სხვებმა საკმაოდ დიდი დრო დაუთმეს ბოლო დროს განვითარებულ მოვლენებს:
“ჩვენ მიმართ ძალადობას ადგილი დიდი ხანია აქვს. ეს განსაკუთრებით მას შემდეგ გაიზარდა, რაც სასწრაფო სამედიცინო დახმარების გამოსაძახებლად თბილისში დარეკვა გახდა საჭირო. ხალხს სამწუხაროდ ჰგონიათ, რომ მანქანა თბილისიდან მოდის. უბრალოდ, უნდა დარეკონ 112-ზე და ჩააწერინონ პაციენტის ზუსტი ადგილმდებარეობა. ჩვენ მაქსიმალურად მოკლე დროში ვცდილობთ რომ ადგილზე მივიდეთ. ბევრი გვეჩხუბება, რომ თბილისელს საიდან გავაგებინოთ, მე რომელ უბანში ვცხოვრობ, ან რა იციან, ჩემი მეზობელი ვინ არისო. გვინდა ლანჩხუთელებს ვუთხრათ, რომ როგორც ჩვენთან დარეკვის დროს იქცეოდნენ, ისე მოიქცნენ. უთხრან იგივე ტექსტი, ისინი ჩვენ გვეტყვიან და ასე უფრო გაიოლდება ზუსტ მისამართზე მისვლა.”
“არის კიდევ ერთი პრობლემა, რომელიც ქალაქში აშკარად იგრძნობა. ჩააწერინებენ ქუჩის დასახელებას და არავინ იცის ეს ქუჩა სად არის. ასე იმიტომ ხდება, რომ რეალურად არსად არის გაკრული ტრაფარეტები. ვთხოვთ მოსახლეობას _ ჩვენ როცა ქუჩაზე შევუხვევთ, სიგნალს ვაძლევთ, რათა ვიღაცამ გამოიხედოს. ისე როგორ ვიპოვოთ გამომძახებელი? თავსაც არ იწუხებენ და შემდეგ აქეთ გვდებენ ბრალს, ამდენ ხანს სად ხართო. ამას წინათ სუფსიდან მოვიდა შეტყობინება _ ბრიგადა 2 წუთში გავიდა აქედან. მხოლოდ ეს იყო ცნობილი, რომ გარეთ შუქი უნთიათ და ეზოში დიდი ძაღლი ჰყავთო. გვიანი საღამო იყო, როცა გამოძახება მივიღეთ. ზუსტად 7 ადგილას ვიკითხეთ, რომ პაციენტისთვის მიგვეკვლია.”
“დედის გინება და სხვა ათასი შეურაცხყოფა ჩვენთვის ახალი არ არის. ხშირად გამოგვიძახებენ და ისეთ ამბავს ატეხენ, რომ პაციენტს მივხედოთ თუ ჩვენს თავს, აღარ ვიცით. ხან მანქანას უშენენ წიხლებს, ხან მძღოლისკენ მოიწევენ, ხან _ ექიმებისკენ. ამის ატანა ძალიან ძნელი გახდა. ხელითაც გვეხებიან. ამას წინათ ნიგვზიანიდან ერთი ავადმყოფი გადმოვიყვანეთ. აქ, მიმღებში ისეთი ამბავი ატეხეს, რომ ძალიან შემეშინდა. პოლიციის გამოძახება გახდა საჭირო. 10-15 ახალგაზრდა, ნასვამ მდგომარეობაში ისეთი გორგალივით წამოვიდა ჩვენსკენ, რომ სად წავსულიყავით აღარ ვიცოდი”.
“ჩვენს პროტოკოლში წერია, როცა ასეთი შეურაცხყოფა მოდის და სხვა საფრთხეებიც არსებობს, უფლება გვაქვს, რომ გამოძახება მივატოვოთ. სხვა გზას აღარ გვიტოვებენ, იძულებულები ვიქნებით როცა ნასვამ ხალხს დავინახავთ და ჩვენზე აგრესია წამოვა იქაურობა დავტოვოთ. ეს ძალიან ძნელია, მაგრამ როცა შენს დასახმარებლად ვარ მოსული და ამის საშუალებას არ მაძლევ, იძულებული ვარ, წამოვიდე. ამას წინათ სუფსაში ავარია იყო. ძალიან მალე ჩავედით. ავადმყოფს პირველადი დახმარება აღმოვუჩინეთ, ერთმა ქალბატონმა მადლობა გვითხრა, _ თქვენ გაიხარეთ, აბა ლანჩხუთის სასწრაფოს, რომ დავლოდებოდით, როდის მოვიდოდაო?! არც კი შეუხედავს მანქანისთვის, რომელსაც ეწერა, რომ ლანჩხუთის იყო.”
“ზაფხულის დადგომასთან ერთად იმატა ავარიებმა. ასეთ დროს განსაკუთრებულად ცუდ დღეში ვართ. მივალთ ავარიის ადგილზე და ადამიანი უკვე გარდაცვლილია. გვეუბნებიან, მიხედეთ, ეგებ, რამე უშველოთო. კანონით, როცა გვამი გვხვდება, მასთან მიახლოებაც კი გვეკრძალება, მაგრამ ეს ვის ესმის?! ამ დროს შეიძლება სხვას დახმარებას სჭირდება, მაგრამ არ გვაცლიან.”
“ყველას ვთხოვთ _ ჩვენც ადამიანები ვართ, ექსტრემალურ პირობებში გვიწევს მუშაობდა და მეტი თავაზიანობა გამოიჩინეთ. ჩვენ თქვენს დასახმარებლად მოვდივართ და აგრესიას ნუ გამოხატავთ. დღესაც იყო შემთხვევა _ გამოგვიძახეს და როცა მივედით, ავადმყოფი უკვე გარდაცვლილი, “ზალაში” დასვენებული დაგვხვდა. დროულად დარეკონ 112-ზე და ჩააწერინონ ზუსტი მისამართი. იქედან ჩვენ ოპერატიულად ვიღებთ ინფორმაციას, აქედან ბრიგადის გასვლას მაქსიმუმ 2 წუთი აგვიანდება. ყოფილა შემთხვევები, რომ 20 წამში გავსულვართ და გზაზე გაგვიგია ზუსტი მისამართი.”
ლანჩხუთელმა მედიკოსებმა ისიც გვითხრეს, რომ პოლიციის გამოძახებას ამიერიდან აღარ მოერიდებიან, რათა მშვიდობიანად დაასრულონ პაციენტის მომსახურება. ისინი თვლიან, რომ ხალხში აგრესიის გაჩენა მედიის ბრალია:
“ხშირად ყოფილა შემთხვევა, როცა ტელევიიზით ჩვენზე ათასი სიბინძურე გამოუცხადებიათ. ამან, როგორც ჩანს, საზოგადოების განწყობაზეც იმოქმედა. ძალიან დიდი იმედი გაქვს თქვენი, რომ ჩვენს სატკივარს ზედმიწევნით მიიტანთ საზოგადოების ყურამდე, რათა დაცულები ვიყოთ!”
