“ხმას კი არა, შავ ქვას არ მივცემ”

(გურია ნიუსი, ჩოხატაური) _ ბოლო სამი დღის განმავლობაში პროდუქტებზე ფასები საგრძნობლად გაიზარდა _ 25 იანვარს, დილით, ჩოხატაურში 1 კგ. შაქრის ფასი 3 ლარი იყო, საღამოს კი 20 თეთრით მოიმატა; ერთი ტომარა უმაღლესი ხარისხის ფქვილის ფასი 67 ლარი იყო, 1 ტომარა ქატოს ფასმა კი 17 ლარს მიაღწია. გაძვირდა სოფლის მეურნეობის პროდუქტებიც. გასული სამშაბათის მონაცემებით, 1 კილოგრამი ნივრის ღირებულება 12 ლარი გახლდათ, ამავე რაოდენობის ხახვის კი _ 2 ლარი და 20 თეთრი; 1 კილოგრამი კარტოფილი 1 ლარი და 50 თეთრი ღირდა, 5-დან 6 ლარამდე მერყეობდა ლობიოს ფასი.
აღსანიშნავია ისიც, რომ მაღაზიებში შაქრის დეფიციტიც დაფიქსირდა _ გასული კვირის დასაწყისში ჩოხატაურში შაქრის შეძენა მხოლოდ რამდენიმე მაღაზიაში იყო შესაძლებელი. მაღაზიის მფლობელთა განმარტებით, დეფიციტი საწყობებშია, თუმცა, მოსახლეობა მიიჩნევს, რომ დეფიციტს ხელოვნურად ქმნიან:
_ გაძვირდაო, გაიგეს და აღარ იციან, რა ქნან. დილით რომ შაქარს 3 ლარად ყიდდა, საღამოს როგორ გახდა 3 ლარი და 20 თეთრი?! ქუთაისიდან ხომ არ ჩამოუტანია? საწყობებში თავად მალავენ და ფასებს ხელოვნურად წევენ.
_ ამის მერე გამოვა ვიღაც თავხედი და გეტყვის, ხმა მომეციო. ხმას კი არა, შავ ქვას არ მივცემ! 80 ლარი მაქვს პენსია და რამდენი დღეს უნდა მეყოს? წამლებს რომ ცეცხლი უკიდია, ეგ აღარაფერი, ახლა ლუკმასაც ვეღარ ჩავიდებთ პირში.
_ ასე თუ დიდხანს გაგრძელდა, ღმერთმა იცის, რა მოხდება. ნელნელა დაიწყეს პროდუქციის გაძვირება _ ჯერ ზეთიო, მერე “გრეჩიხა” და ბრინჯი. ყველაფერს მოითმენს ადამიანი, მაგრამ უშაქროდ და უპუროდ რა უნდა ვქნათ?!
ფასებმა პირველადი მოხმარების საგნებზეც მოიმატა _ სარეცხი საშუალებების საწყისი ღირებულება უკვე 60-70 თეთრია, ხოლო თმის მოვლის საშუალებების საწყისმა ფასმა 2,80 ლარს მიაღწია.
ხელისუფლება ამ ფაქტზე კომენტარს არ აკეთებს. მიზეზი ბანალურია _ მათი თქმით, კერძო სექტორს მითითებებს ვერ აძლევენ, თავად კი სოციალურ დახმარებებს ამცირებენ და ზრდიან საშტატო ერთეულებს, რაც, შესაბამისად, სახელფასო ფონდის ზრდას ნიშნავს.