იგივე გვესმის და ვხედავთ “ნაციონალური მოძრაობის” სარეკლამო რგოლებშიც, რომელიც ტელევიზიით დღეში რამდენჯერმე გადის.
“გურია ნიუსი”, ბიუჯეტიდან დაფინანსებული 1000-ლარიანი ვაუჩერის ნაცმოძრაობის სასარგებლოდ გამოყენების შესახებ მიმდინარე წლის აგვისტოს დასაწყისში წერდა; მაგალითად, ოზურგეთის მუნიციპალიტეტის სოფელ დვაბზუში, მოსახლეობას, ერთიანი ნაციონალური მოძრაობის “საქართველოსთან ხელშეკრულებას” და მაღალი პოლიგრაფიული ხარისხით გამოცემულ ლიფლეტს ურიგებდნენ, რომელიც მოსახლეობის დიდ ნაწილს 1000-ლარიანი ვაუჩერი ეგონა და რესპონდენტებიც ჩვენთან საუბარში სწორედ ასე მოიხსენიებდნენ. ხელშეკრულებასაც და ლიფლეტსაც, ერთი და იგივე პარტიული დევიზი _ “მეტი სარგებელი ხალხს!” აწერია. ლიფლეტი, წარწერის მიხედვით, ერთიანი ნაციონალური მოძრაობის დაკვეთით დაიბეჭდა და იგი მეორე ნაბეჭდი პროდუქტის განუყოფელი ნაწილია, თუმცა ნაბეჭდი მასალების განუყოფლობა აკინძვას და შესაბამის დადასტურებას მოითხოვს.
ხელშეკრულებას ხელს სააკაშვილი, მერაბიშვილი აწერენ ბეჭდური ასოებით და ერთიანი ნაციონალური მოძრაობის ბეჭედი აქვს დასმული. ყველაზე მნიშვნელოვანი კი, რის გამოც მოსახლეობა ლიფლეტს ვაუჩერად მიიჩნევს, სამ სვეტად გაყოფილი ლიფლეტის ის ნაწილია, რომელსაც აწერია: “1000-ლარიანი ვაუჩერი. ოჯახი თავად წყვეტს რა ხარჯი დაფაროს”.
ვაუჩერის შესახებ ლიფლეტების, ასევე საქართველოსთან ხელშეკრულების დახარისხება და გადანაწილება “გურია ნიუსმა” ვიდეოფირზე გადაიღო. მისი განმანაწილებელი ამავე სოფლის რწმუნებული, ვაჟა მახარაძე გახლდათ. მისი თქმით, მოსახლეობა ინფორმირებული უნდა იყოს ვაუჩერთან დაკავშირებით და წინასწარ ხდება ხალხისთვის ინფორმაციის მიწოდება. რწმუნებული სამუშაო დროს, ძალიან აქტიურად მუშაობდა მმართველი პარტიის მხარდასაჭერად.
_ ეს იყო, “პროსტო” საფუძველი, რომ ვაუჩერებზე წარმოდგენა ჰქონოდათ ხალხს, თორემ ვაუჩერები ვინ მიიღო საერთოდ?! _ ამბობდა ჩვენთან საუბრის დროს ვაჟა მახარაძე.
ბილბორდებზეც და სატელევიზიო კლიპებშიც, ყოველ ფეხის ნაბიჯზე და დღეში რამდენჯერმე – ტელეეკრანებიდან, სამთავრობო ვაუჩერიც, სხვა სახელმწიფო პროგრამებიც 5-ნომრიანი პოლიტიკური პარტიის აქტივობადაა წარმოჩენილი და ლოზუნგით: „მეტი სარგებელი ხალხს!“ მთავრდება. აუდიტის სამსახური კი ამაზე რეაგირებას არ ახდენს.
არჩევნების საკითხების მკვლევარის, ნინა ხატისკაცის თქმით, “პირველი და ყველაზე მნიშვნელოვანი პრინციპი არჩევნების სამართლიანობისა არის ის, რომ ხელისუფლებასა და პარტიას შორის უნდა იყოს მკაფიო ზღვარი.
_ ამას განსაზღვრავს ეუთოს კოპენჰაგენის დოკუმენტი, რომელიც რატიფიცირებულია საქართველოს მიერ. ეს იმას ნიშნავს, რომ ხელისუფლებამ თავად უნდა უზრუნველყოს და ხელი შეუწყოს იმას, რომ მმართველი პარტია არ იგივდებოდეს ხელისუფლებასთან.
ხელისუფლება იმავე სიტყვებით, ისეთივე ლოზუნგებით ხელმძღვანელობს და იგივე ლოზუნგები გამოიყენება პარტიის ბილბორდებზე, რაც მეტყველებს იმაზე, რომ ხელისუფლება არც კი ცდილობს ზღვარი და მიჯნა გაავლოს მას და მმართველ პარტიას შორის. რა თქმა უნდა, ამით უპირატეს მდგომარეობაში აყენებს მმართველ პარტიას. იგი პარტიის რესურსებთან ერთად, იყენებს სახელმწიფო რესურსებსაც. ასევე მთავარი დევიზი, რომელსაც ერთნაირად იყენებს მმართველი პარტია და ხელისუფლებაც _ “მეტი სარგებელი ხალხს”, ნიშნავს იმას, რომ მმართველი პარტია ცდილობს კიდევ უფრო მეტად მოხდეს მისი ასოცირება ხელისუფლებასთან, _ ამბობს “გურია ნიუსთან” საუბარში ნინა ხატისკაცი.
