ხალხი ბახვის ცენტრამდე მისასვლელ გზას ნამდვილად არ უჩივის, თუმცა, ეს გზა სოფლის დახმარების პროგრამით არ გაკეთებულა. სოფელ ბახვის ტერიტორიულ ერთეულში სამი სოფელი _ ქვედა ბახვი, ბახვი და მშვიდობაური შედის. 2011 წლის “სოფლის მხარდაჭერის პროგრამით” გახორციელებული სამუშაოების ჩასატარებლად გამოყოფილი იყო 51 397 ლარი, რომელიც რწმუნებულის გოჩა შარაშენიძის თქმით, სოფლის მცხოვრებთა მიერ კრებაზე დასახელებული პრიორიტეტების განსაზღვრისთვის მიზნობრივად დაიხარჯა.
ბახვის ადმინისტრაციული შენობის რემონტისთვის განისაზღვრა და დაიხარჯა 11 500 ლარი; ბახვში, ასევე, ორ ადგილას მოხდა წყალსადენის წერტილოვანი შეკეთება, რაც 2 821 ლარი დაჯდა; მინი სტადიონის მოსაწყობად დაიხარჯა 3 500 ლარი; საბავშვო ბაღისთვის ინვენტარი 2 000 ლარად შეიძინეს; სასაფლაოს ყორეთი შეღობვისთვის დაიხარჯა 8 500 ლარი; 2 496 ლარი საყანე ფართობების მისასვლელი გზის შეკეთებაში გადაიხადეს; ნაპირსამაგრი სამუშაოები 4 000 ლარი დაუჯდათ; სოფელ მშვიდობაურში კი წყლის ჭაბურღილისთვის 7 000 ლარი გადაიხადეს, თუმცა მშვიდობაურის მოსახლეობა ისევ უწყლოდაა _ ფაქტობრივად, ჭაბურღილი არ ფუნქციონირებს და ეს 7 000 ლარი წყალში გადაყრილი აღმოჩნდა; მშვიდობაურში გზის რემონტისთვის 7 179 ლარი დაიხარჯა და მოსახლეობის თქმით, მათ გზა არ აქვთ.
სოფელ ბახვის ცენტრამდე მცხოვრები ადამიანების უმეტესობა კმაყოფილებას გამოთქვამს გზის, გაზისა და წყლის გაკეთებისთვის. ისინი აცხადებენ, რომ მათთან გამრიცხველიანებაც მოხდა და ასე თუ ისე, ხელისუფლების მიმართ პრეტენზიები არ გააჩნიათ. სოფელ მშვიდობაურის მცხოვრებნი კი ყველაზე მეტად უწყლობის გამო არიან შეშფოთებულები. მათ არც წყალი აქვთ, არც გზა და ამბობენ, რომ ადამიანებს ხელისუფლება მხოლოდ ბახვის ცენტრამდე ცნობს, მათთვის კი არაფერი კეთდება.
ოზურგეთის მუნიციპალიტეტის სოფელ ბახვის რწმუნებულმა, გოჩა შარაშენიძემ თავდაპირველად კომენტარზე უარი გვითხრა: _ ჩემი საქმე არ არის ჟურნალისტებთან ურთიერთობა. უნდა მიმართოთ პრესცენტრს.
_ ბატონო გოჩა, პრესცენტრი გაგვცემს დაწვრილებით პასუხს თქვენს სოფელში გაკეთებული სოფლის პროექტების შესახებ?
_ ჩემო კარგო, რატომაც არა, ყველაფერი გამოქვეყნებულია გაზეთში.
_ რომელ გაზეთში?
_ ალბათ, თქვენს გაზეთში, არ ვიცი.
_ ბატონო გოჩა, ჩვენ გვაინტერესებს 2011 წლის სოფლის პროგრამით გახორციელებული პროექტების შესახებ. რეალურად ძალიან დიდი თანხაა დახარჯული წყალზე _ 7 000 ლარი და წყალი მშვიდობაურის მოსახლეობას საერთოდ არ მიეწოდება. ჭაბურღილი, რომელიც გააკეთეთ, უფუნქციოდაა. ამაზე პასუხი პრესსამსახურმა უნდა გაგვცეს?
_ თქვენ თუ ბახვში გაკეთებულ საქმეებს ვერ ხედავთ, მაშინ არ ვიცი, რა. გეტყვით, მშვიდობაურში წყალზე რა პრობლემაც არის _ ჭაბურღილი მოვაწყვეთ აქ, ჩაიდო 7 ათასი ლარი. ამოითხარა ჭაბურღილი და წყალი არ ამოვიდა. იწერთ ახლა ამას?
_ კი, რა თქმა უნდა.
_ არ არის ეს ჩემი საქმე და რა ვქნა?
_ მაშინ, გვითხარით, თქვენი საქმე რა არის?
_ ჩემი საქმე რა არის და მოსახლეობასთან ურთიერთობა, საბუთების გაცემა, პროექტების გადამოწმება.
_ ის, რომ სოფლის დახმარების პროგრამით, შარშან სოფელ მშვიდობაურში ჭაბურღილი 7 000 ლარი დაჯდა, მაგრამ 40 მოსახლეს წყალი არ მიეწოდება, ეს არ არის თქვენი საქმე? რაში დაიხარჯა თანხა, რა გაკეთდა, ეს არ უნდა იცოდეს მოსახლეობამ?
_ კი, როგორ არა. მე გამოკრულიც მქონდა კედელზე ყველაფერი, რომ სოფლის პროექტებს გასცნობოდა ხალხი. რატომ არ არის წყალი, ეს ნამდვილად არ არის ჩემი საქმე. ჭაბურღილი რომ გააკეთეს, 26-ის ნაცვლად დაიბურღა 30 მეტრი, მაგრამ ჭაბურღილმა ვერ მიიღო საბრუნავი 10 ტონა წყალი, რაც საჭირო იყო მოსახლეობისთვის, მხოლოდ 300 ლიტრი წყალი ამოვიდა. ახლა აიღებს თავის თავზე ისევ ეს ფირმა და წელს კვლავ გააკეთებს ახალ ჭაბურღილს.
_ როდის გაკეთდება?
_ მალე.
_ გზის რემონტისთვის დახარჯულია 7 179 ლარი. გზა გააკეთეთ?
_ კი, გაკეთდა, შეკეთდა, აბა, რა. მშვიდობაურში არის ერთ-ერთი უბანი _ “ოროკს” ეძახიან, წყალი საერთოდ არ არის, წყალი არ აქვს “ოქროსქედსაც”. აქ რომ წყალი იყოს ისე, როგორც ადრე კომუნისტების დროს, ალბათ, ნახევარი მილიონი დასჭირდება, რისი საშუალებაც ახლა სახელმწიფოს არ აქვს. ანუ, ჩვენ და მოსახლეობამ გადავწყვიტეთ, მშვიდობაურის ერთ უბანში გაკეთებულიყო ჭაბურღილი. თუ გაამართლებდა, მერე გავაკეთებდით სხვა უბნებში. არ გაამართლა და რა ვქნათ? ძალიან პრობლემატურია ეს საკითხი. ახლა წყლის სამმართველოდან არიან ჩამოსულები და მგონი, შეადგენენ ახალ პროექტს და ამ საკითხსაც მოაგვარებენ.
_ 2011 წელს, ბახვში სოფლის მხარდაჭერის პროგრამით დაიხარჯა 51 397 ლარი. აქედან, 11 500 ლარი ადმინისტრაციული შენობის რემონტისთვის, 1 410 ლარი _ წყალსადენის წერტილოვანი შეკეთებისთვის, მინი სტადიონის მოსაწყობად _ 3 500 ლარი, საბავშვო ბაღის ინვენტარისთვის _ 2 000 ლარი, წყალსადენის წერტილოვანი შეკეთება _ 2 400 ლარი, სასაფლაოს შეღობვა ყორე ქვით, საყანე ფართობების მისასვლელი გზის შეკეთება _ 1 496 ლარი, ნაპირსამაგრი სამუშაოები _ 4 000 ლარი, ჭაბურღილის მოწყობა _ 7 000 ლარი, გზის რემონტისთვის 7 179 ლარი დაიხარჯა, ყველაფერი გაკეთებულია?
_კი, კი, ნამდვილად ასეა. ყველაფერი გაკეთებულია და ისეა დახარჯული, როგორც იყო გამოყოფილი. შეგიძლიათ, ყველა პროექტი ნახოთ. ხომ ხედავთ, როგორი გულწრფელი ვარ თქვენთან. ამ სოფელს 2008 წლამდე წყალი საერთოდ არ მოეწოდებოდა, ხალხს უყვარს პრეზიდენტი, წყალი არ გვქონდა, გზა არ გვქონდა, გამრიცხველიანება არ იყო, დღეს კი ყველაფერია და პრეზიდენტი არ უნდა უყვარდეთ? შეგიძლიათ, თავად ნახოთ ყველაფერი _ როგორი ბაღი გაკეთდა, როგორი ადმინისტრაციული შენობა და 500-კაციანი კლუბი გავაკეთეთ. ასეთი ბაღი და ადმინისტრაციული შენობა არც ერთ სოფელს არ აქვს. ისეთი ბიბლიოთეკა გვაქვს, მსგავსი ოზურგეთშიც არაა, _ გვითხრა რწმუნებულმა.
ჩვენ ამ თემას ისევ მივუბრუნდებით.
