ბანკის ხელმძღვანელს ჩვენს კითხვაზე არაადეკვატური რეაქცია ჰქონდა და კომენტარის ნაცვლად პირდაპირ ყვირილზე გადავიდა: "რას მეკითხებით, თქვენ შემოგევლეთ! რას უნდა ელოდო ამ სასამართლოდან, მე მეკითხებით? თქვენ უკეთ არ იცით? თქვენ დაწერეთ. ჩემთვის შეურაცხმყოფელია, როდესაც მეკითხებით, რას ელოდები სასამართლოდანო. რომ მეკითხები, სააკაშვილი სად არისო, მე რა ვიცი, იმიტომ რომ არაპროგნოზირებადია.იგივეა სასამართლოზე, მე რას მეკითხები, თქვენ არ იცით? კარგად იყავით და ნუ დამირეკავთ მეტს."
აღსანიშნავია, რომ ეს პირველი შემთხვევა არ არის, როდესაც "ქართუ ბანკის" ხელმძღვანელი შეურაცხყოფას აყენებს "გურია ნიუსის" ჟურნალისტს.
27 აგვისტოს, "ქართუ ბანკის" გენერალური დირექტორის მოადგილე ნატო ხაინდრავამ სააქციო საზოგადოება პირიმზის მიმართ გაკოტრების საქმე წამოიწყო.
"2012 წლის 27 აგვისტოს მდგომარეობით მორიგების აქტიდან გამომდინარე, პირიმზის დავალიანება ქართუ ბანკის მიმართ შეადგენს 6,577,822.44 აშშ დოლარს, საიდანაც 4,695,081.82 აშშ დოლარი წარმოადგენს ძირითად თანხას, 910,970.64 აშშ დოლარი – დარიცხულ პროცენტს და 971,769.98 აშშ დოლარი – დარიცხულ პირგასამტეხლოს. ხოლო გენერალური ხელშეკრულების პირობების დარღვევიდან გამომდინარე, დავალიანება სრულად შეადგენს 2,364,257.66 აშშ დოლარს, საიდანაც 1,800,000 აშშ დოლარი წარმოადგენს ძირითად თანხას, 197,424.03 აშშ დოლარი – დარიცხულ პროცენტს და 366,833.63 აშშ დოლარი – დარიცხულ პირგასამტეხლოს," _ ნათქვამია ბანკ "ქართუს" განცხადებაში.
"პირიმზის" დირექტორი ციცინო გობეჯიშვილი კი ირწმუნება, რომ ორგანიზაციას არანაირი ქონება არ გააჩნია და სასამართლოს ბაჟის გადახდასაც ვერ შეძლებს.
სააქციო საზოგადოება "პირიმზემ", რომელიც აუქციონზე გაყიდვამდე, კოდუების დედას ლაურა ღაჭავას ეკუთვნოდა, თბილისის საქალაქო სასამართლოს განცხადებით 27 ივლისს მიმართა და გაკოტრების საქმის დაწყება მოითხოვა. სასამართლომ საქმე წარმოებაში არ მიიღო, ვინაიდან განმცხადებლის მიერ წარმოდგენილი მასალებით, სს ,,პირიმზეს’’ არ გააჩნდა არავითარი ქონება, არ გააჩნდა ფულადი თანხები ანგარიშზე და თავისი ქონებით ვერ უზრუნველყოფდა საპროცესო ხარჯების დაფარვას .
სასამართლომ ამავე დროს მიუთითა, რომ "პირიმზე" გაკოტრებულად გამოცხადდებოდა რეგისტრაციის გაუქმების გზით, თუ ამ განჩინების გამოქვეყნებიდან 1 თვის ვადაში კრედიტორი იმავე მოვალის მიმართ სასამართლოში არ შეიტანდა განცხადებას გადახდისუუნარობის გახსნის შესახებ. თბილისის საქალაქო სასამართლოს სამოქალაქო საქმეთა კოლეგიამ ქართუ ბანკის განცხადება წარმოებაში მიიღო და "პირიმზეს" მეურვედ აღსრულების ეროვნული ბიურო დაუნიშნა.
