თუმცა, ეს არ აღმოჩნდა საკმარისი იმისთვის, რომ ყაჭეიშვილს ბრალი პატიმართა წამებაში დადებოდა. პროკურატურამ ყაჭეიშვილს წამების ბრალდება არ წაუყენა და მას ბრალი, სისხლის სამართლის კოდექსის 144.1-ე მუხლით ედება (დამამცირებელი ან არაადამიანური მოპყრობა.), რაც 4-დან 6 წლამდე თავისუფლების აღკვეთას ითვალისწინებს.
მიუხედავად ხელისუფლების წუხილისა, რომ ეს ყველაფერი მათი მხრიდან სახალხო დამცველის თუ სხვა ორგანიზაციების ანგარიშებისადმი უყურადღებობამ გამოიწვია, ფაქტია, რომ საკმარისი რეაგირება ახლაც არ ხდება.
ვიქტორ ყაჭეიშვილის პიროვნება რამდენიმე საქმეში ფიგურირებს, თუმცა, ჩვენი ინფორმაციით, არცერთი მათგანით პროკურატურა არ დაინტერესებულა.
უფრო მეტიც; 2010 წელს, ჯაშუშობისთვის ბრალდებული სამხედრო ექსპერტი ვახტანგ მაისაიას ცემის ფაქტზე აღძრულ საქმეში, სწორედ ყაჭეიშვილის გვარი ფიგურირებდა. საქმე იმაშია, რომ მაისაიამ არაადამიანური მოპყრობის გამო შიმშილობა გამოაცხადა. როგორც უფლებადამცველები ამბობდნენ, ამის გამო, ციხის უსაფრთხოების სამსახურის უფროსმა ვიქტორ ყაჭეიშვილმა და ადმინისტრაციის ორმა თანამშრომელმა პატიმარი სასტიკად სცემეს, მანამდე კი კატეგორიულად მოსთხოვეს, რომ შიმშილობა შეეწყვიტა.
გამოძიებამ კი დაადგინა, რომ ვახტანგ მაისაიამ სხეული თვითონ დაიზიანა და არც ყაჭეიშვილი და არც სხვა დასახელებული პირები არაფერ შუაში იყვნენ.
“რასაკვირველია, რეალობას მოკლებულია ის ფაქტი, რომ თანამშრომლებმა სცემეს. რა აბსურდს მეუბნებით?! ადამიანთან, რომელთანაც ყოველდღე შედიან სხვადასხვა არასამთავრობო ორგანიზაციის წარმომადგენლები, მათ შორის ადვოკატი, ამას როგორ ადასტურებენ არ ვიცი. არაფერი არ ჭირს ამ ადამიანს. მართალი რომ გითხრათ, მე ცხოვრებაში არ მინახავს მაისაია, მაგრამ მას არაფერი არ სჭირს. არა აქვს მას არანირი დაჟეჟილობა,” _ ამბობდა სასჯელაღსრულების დეპარტამენტის პრესამსახურის ხელმძღვანელი თეა სუხიტაშვილი.
ელენე მაღრაძე, ვახტანგ მაისაიას მეუღლე, გაზეთ “ყველა სიახლესთან” საუბარში ამბობდა: “17 აგვისტოს, მე-8 საპყრობილეში შიმშილობა დაიწყო პატიმარმა მელორ ვაჩნაძემ. მეორე დღეს მას შეუერთდა ვახტანგიც. ისინი მოითხოვდნენ პოლიტპატიმრების და რელიგიური ნიშნით დაპატიმრებულების გათავისუფლებას, ჟურნალ-გაზეთების შეტანას სასჯელაღსრულების დაწესებულებებში და იქ არასამთავრობო ორგანიზაციების მონიტორინგის ჯგუფის დაშვებას. ვახტანგმა თავისი გადაწყვეტილების შესახებ წერილობით აცნობა ციხის ადმინისტრაციას. მეორე დღეს, მასთან საკანში შევიდნენ ციხის ადმინისტრაციის წარმომადგენლები და ვახტანგს შიმშილობის შეწყვეტა მოსთხოვეს; წინააღმდეგ შემთხვევაში, მას თანასაკნელების დასჯითა და კარცერში ჩასმით დაემუქრნენ. 23 აგვისტოს მეუღლესთან პაემანი მქონდა და ამ მუქარის გამო შეწუხებული ჩანდა, არ უნდოდა სხვებისთვის პრობლემები შეექმნა. მუქარის მიუხედავად, შიმშილობა არ შეწყვიტა, მაგრამ თანასაკნელები რომ არ დაესაჯათ, ულუფას იღებდა და შემდეგ ურნაში ყრიდა. ვახტანგმა დაწერა განცხადება – ცალკე საკანში გადაყვანას ითხოვდა, რათა შეწყვეტილიყო თანასაკნელებზე ზეწოლა და ვინაიდან შიმშილობას განაგრძობს, ექიმის მეთვალყურეობის ქვეშ ყოფილიყო. 24 აგვისტოს, მასთან შევიდა მისი ადვოკატი, რომელმაც ამავე მოთხოვნით ციხის დირექტორის სახელზე განცხადება დაწერა და როდესაც ვახტანგი უკვე სხვა საკანში გადაჰყავდათ, დერეფანში, ციხის უსაფრთხოების სამსახურის უფროსმა ვიქტორ ყაჭეიშვილმა და ადმინისტრაციის ორმა თანამშრომელმა ერთი კვირის ნაშიმშილარი პატიმარი ჯერ სიტყვიერად შეურაცხყვეს, შემდეგ კედელზე მიახეთქეს და წაქცეულს წიხლები ჩასცხეს მუცელში.”
მაისიას ადვოკატი, ნათია კორკოტაძე კი გაზეთ “რეზონანსთან” საუბრისას აღნიშნავდა, რომ ამ ფაქტის გახმაურების შემდეგ, ვიქტორ ყაჭეიშვილი პატიმარს ლიკვიდაციით დაემუქრა:
_ “ვახტანგ მაისაია საპყრობილეში ცემის შემდეგ მოვინახულე. მასთან შესულები იყვნენ გამომძიებელი და ექსპერტიც. პატიმარს მარჯვენა თვალი აქვს ჩალურჯებული, ცხვირის ძვალი გატეხილი, თავი და ფილტვები გაუშუქეს და, როგორც ჩანს, აქვს პრობლემები. აღძრულია სისხლის სამართლის საქმე მომხდარზე და არა ვიქტორ ყაჭეიშვილზე, რომელიც მოწმის სტატუსით დაიკითხა. ყაჭეიშვილი ციხის უსაფრთხოების სამსახურის უფროსია. როგორც ჩანს, ის კარგად იცავს “უსაფრთხოებას” მერვე საპყრობილეში. ისე მიჰყავთ საქმე, თითქოს ვახტანგმა თავი თვითონ დაისახიჩრა. მას შემდეგ, რაც ყაჭეიშვილი დაიკითხა მოწმედ, ის მაისაიას ლიკვიდაციით დაემუქრა და ამასთან დაკავშირებით საქმის კურსში ჩავაყენე გამომძიებელი. ბატონი ყაჭეიშვილი დაემუქრა მას, რომ შეწყვიტე შიმშილობა, თორემ საკანში შენს ლიკვიდაციას მოვახდენთო.”
ვიქტორ ყაჭეიშვილი ჩოხატაურელია. მამამისი, რამდენიმე წლის განმავლობაში სოფელ შუა განახლების რწმუნებული იყო. ახლა კი ერთ-ერთ საჯარო დაწესებულებაში ბუღალტრად მუშაობს. ყაჭეიშვილების სახლი, შუაგანახლებაში, დღეს დაკეტილია. როგორც გავიგეთ, ოჯახმა ჩოხატაური კადრების გავრცელების დღესვე დატოვა.
სწორედ სოფელში ყოფნისას გავარკვიეთ, რომ ყაჭეიშვილი, რამდენიმე წლის წინ თავად იხდიდა სასჯელს:
_ სტუდენტობისას, ნასვამ მდგომარეობაში მყოფი, ტაქსისტს აუხირდა, სასტიკად სცემა და ამის გამო რამდენიმე თვე ციხეში გაატარა, _ გვითხრეს მეზობლებმა.
აქვე, ისიც გავიგეთ, რომ მისი მეუღლე, თეა ბოლქვაძე გლდანის მერვე საპყრობილის კანცელარიის თანამშრომელია.
