თუმცა, ეს არის ის კომპრომისული ვარიანტი, რომელზედაც „გურია ნიუსი“ უკვე წერდა და ამ „შეუზღუდავი ფოტოვიდეოგადაღების“ უკან უამრავი შეზღუდვა დგას, რაც ჟურნალისტებს არჩევნების დღეს, სერიოზულ ბარიერს შეუქმნის მუშაობაში, მათ შორისაა ინტერვიუების ჩაწერა და კომუნიკაცია კომისიის თავმჯდომარეებთან და წევრებთან.
“რეგიონული მედიის ასოციაციის თავმჯდომარე“ ია მამალაძე აცხადებს, რომ კომპრომისულ ვარიანტს არ დათანხმდებიან: “კომპრომისულ ვარიანტზე თანახმა არავინ არაა, კანონი არსებობს და კეთილი ინებოს ცსკო-მ და მას დაემორჩილოს. ცსკო პარლამენტი არაა, კანონები რომ შეცვალოს, მითუმეტეს ორგანული კანონი.“
ამ წუთებში სხდომა განახლდა, სადაც მოხდება გარკვეული დეტალების დაზუსტება და ცსკო საბოლოო პასუხს იტყვის. შეგახსენებთ, რომ სხდომა უკვე სამი საათია მიმდინარეობს და შესვენება ორჯერ გამოცხადდა.
პროექტი, რომლის მიხედვითაც საარჩევნო უბნებზე ფოტოვიდეოგადაღების აკრძალვას აპირებდნენ და რომელსაც დიდი ხმაური მოყვა, გულისხმობს შემდეგს:
საქართველოს საარჩევნო ადმინისტრაციის მიერ შემუშავებული დადგენილება-პროექტის მე-3 მუხლის თანახმად, კენჭისყრის დღეს საარჩევნო უბანზე პირველი ამომრჩევლის მისვლის პერიოდიდან ბოლო ამომრჩევლის მიერ ხმის მიცემის პერიოდში ფოტოვიდეოგადაღება განიხილება საარჩევნო პროცესის ხელისშეშლად გარდა ქვემოთ ჩამოთვლილი შემთხვევებისა:
1. კენჭისყრის შენობაში ყოფნის უფლების მქონე პირებს შეუძლიათ დაუბრკოლებრივ გადაიღონ კენჭისყრის პროცესის ის პერიოდი საარჩევნო უბნებში, სადაც მაღალი საზოგადოებრივი ინტერესის მქონე ამომრჩევლები, პოლიტიკური თანამდებობის პირები, (საარჩევნო სუბიექტებისა და პოლიტიკური გაერთიანებების ხელმძღვანელები, რელიგიური ლიდერები და ა. შ _ წყვეტს კომისიის თავმჯდომარე) აძლევენ ხმას, რის შემდგომაც ფოტოვიდეოგადამღები აპარატები უნდა გატანილ იქნას კენჭისყრის დღიდან.
2. ერთიდაიგივე პრესისა და მასობრივი ინფორმაციის სხვა საშუალებას უფლება აქვს ერთ საარჩევნო უბანზე ფოტოვიდეოგადაღება ერთხელ აწარმოოს არა უმეტეს 5 წუთისა. ასეთი მოთხოვნის შემთხვევაში, საუბნო კომისიის თავმჯდომარე წინასწარ გააფრთხილებს ამ დროისთვის კენჭისყრის შენობაში მყოფ ამომრჩევლებს ვიდეოგადაღების დაწყების თაობაზე და თუ ყველა ამომრჩეველი განაცხადებს თანხმობას, ასეთ შემთხვევაში იქნება შესაძლებელი ფოტოვიდეოგადაღების განხორციელება. აღნიშნულ პერიოდში, საარჩევნო უბანზე, ერთდროულად შეიძლება იმყოფებოდეს 2 პრესისა და მასობრივი ინფორმაციის სხვა საშუალების ფოტოვიდეოგადამღები აპარატურა.
