შუაფრაცხმის საარჩევნო უბანზე გამგეობის ინფრასტქრურტურის სამსახურის უფროსი ლევან ჩხიკვაძე და შუაფარცხმის საჯარო სკოლის დირექტორი გულიკო უჯმაჯურიძე აქტიურობდნენ. სამივე მათგანი უბანზე დამკვირვებლის სტატუსით იმყოფებოდა და გარეთ ხშირად გამოდიოდნენ, ამომრჩეველს ესაუბრებოდნენ და ისევ უბანზე ბრუნდებოდნენ.
ჩვენ კითხვაზე, რატომ გამოდის გარეთ და რატომ აძლევს მითითებებს ამომრჩეველს, ლევან ჩხიკვაძის პასუხი ასეთი იყო: _ სახლში ვიყავი.
თუმცა, ჩვენს ნათქვამზე, რომ ის ავტომანქანაში მსხდომ ამომრჩევლებთან მოსაუბრე დავაფიქსირეთ, უზრდელობაში არაერთხელ შემჩნეულმა ჩხიკვაძემ, ასეთი კომენტარი გააკეთა: _ მატყუარები ხართ.
შეგახსენებთ, რომ ეს ის ჩხიკვაძეა, რომელმაც რამდენიმე თვის წინ, არასამუშაო საათებში, სამსახურეობრივი მანქანაში არაფხიზელ მდგომარეობაში მყოფმა, “გურია ნიუსის” ჟურნალისტებს შუა თითი აჩვენა. ჩვენ ჩხიკვაძის ამ საქციელის შესახებ საქმის კურსში ჩავაყენეთ ჩოხატაურისა და მხარის ხელმძღვანელობა, გურიის არაოფიციალური “პატრონი” რამაზ ნიკოლაიშვილი, თუმცა, მათი მხრიდან ამ ფაქტს, როგორც ყოველთვის, არანაირი რეაგირება არ მოჰყოლია
ჩხიკვაძემ, მოგვიანებით საარჩევნო უბანზე ფოტოების გადაღებისას აღნიშნა, რომ ამით ამომრჩევლის დაშინებას ვცდილობდით(?!).
ამავე უბანზე, სოფელ შუაფარცხმის რწმუნებულის თანაშემწე ზურაბ გურგენიძე მთელი დღის განმავლობაში ამოწმებდა მოსულ ამომრჩეველს და ფურცლებზე მათ ვინაობას ინიშნავდა.
ანალოგიური სიტუაციაა იყო ხიდისთავის საარჩევნო უბანზე, სადაც რამდენიმე დარღვევა დაფიქსირდა _ უბნიდან ბიულეტენები გაქრა და საჩივარიც დაიწერა. მოგვიანებით კი დაფიქსირდა ფაქტი, რომ გამგეობის შესყიდვების სამსახურის უფროსმა, ბაჩი გოგიბერიძემ ბიულეტენები გარეთ გამოიტანა.
საარჩევნო უბნის შესასვლელთან მობილიზებული საჯარო მოხელეები სპეციალურ სიაში ამომრჩეველს აღწერდნენ. ეს სია “გურია ნიუსმა” სოფელ ხიდისთავის რწმუნებულის, ალექსანდრე სურმანიძის ავტომანქანაში აღმოაჩინა. ფაქტის დაფიქსირებისთანავე, სიის გადამალვას საკრებულოს ნაციონალური ფრაქციის ხელმძღვანელი, ზაზა ბასილია შეეცადა და აღნიშნა, რომ სია მისი ოჯახის წევრებს ეკუთვნოდათ. ჩვენ ჩაძიებას, ეჩვენებინა აღნიშნულ სიაში, თუნდაც მხოლოდ მისი მეუღლე, ამავე სოფლის სკოლის დირექტორის სოსო მეგრელიძის გულისწყრომა მოჰყვა, რომელმაც აღნიშნა, რომ ჩვენ სხვის მანქანაში არსებული სიების ნახვის უფლება არ გვქონდა. ამ მოსაზრებას სურმანიძეც დაეთანხმა.
ზოგადად, ამ არჩევნებზე სკოლის დირექტორების უმრავლესობა “ნაციონალური მოძრაობის” სასარგებლოდ მუშაობდნენ. თითქმის ყველა სოფელში, საარჩევნო უბნებს სკოლის დირექტორები აკონტროლებდნენ და ხშირ შემთხვევაში პედაგოგებს ახსენებდნენ, რომ ხმა “ნაციონალური მოძრაობისთვის” უნდა მიეცათ.
სოფელ დიდვანში, ზემოსურებში, შუასურებში, ზემოსურებში, ქვაბღაში, ნაბეღლავში, როგორც გვითხრეს, სიტუაციების გაკონტროლებას სწორედ სკოლის დირექტორები ცდილობდნენ.
მათი ასეთი აქტიურობა, სავარაუდოდ, მანანა ჯინჭარაძის კანდიდატობით იყო გამოწვეული _ “ნაციონალური მოძრაობის” კანდიდატი საგანმანათლებლო რესურსცენტრის ხელმძღვანელი იყო.
აღსანიშნავია, რომ თავად ჯინჭარაძე მთელი დღის განმავლობაში დაბის 01 საარჩევნო უბანთან იდგა მომხრეებთან ერთად. აქვე იმყოფებოდა მაჟორიტარი დეპუტატის ბიუროს ხელმძღვანელი, ლია ჩიგოგიძე, რომელიც ამომრჩეველს სთხოვდა, რომ მხარი მანანა ჯინჭარაძისთვის დაეჭირათ, რათა სამსახური არ დაეკარგა.
განსაკუთრებული დაძაბულობა იყო კოხნარში, სადაც ამომრჩეველი ხმას ღიად აძლევდა. როგორც გვითხრეს, ამის მიზეზი სოფლის რწმუნებულის დამკვირვებლის სტატუსით უბანზე ყოფნა იყო. ჩვენი ინფორმაციით, ჟიფო ცინცაძემ სოფლის მცხოვრებლებს არჩევნების წინა დღეს მკაცრი გაფრთხილება მისცა და უთხრა, რომ “ნაციონალური მოძრაობა” და მისი კანდიდატი, მეტი დამაჯერებლობისთვის, ღიად უნდა შემოეხაზათ.
რამდენიმე საარჩევნო უბანზე დაფიქსირდა აგიტაციის შემთხვევა _ კანდიდატ ჯინჭარაძის პლაკატები უბნების წინ იყო გაკრული. საჭამიასერში ამომრჩევლის კონვერტი გახსნეს და ყველას დასანახად წაიკითხეს, თუ ვის მისცა ამომრჩეველმა ხმა.
ამაღლებაში კი მამა ათანასე დააკავეს. მამაო, რომელიც რუის-ურბნისის ეპარქიაში მსახურობს და წარმოშობით ამაღლებიდანაა, თავის ახლობლებს მოუწოდებდა, ხმა “ქართული ოცნებისთვის” მიეცათ. დაკავების მიზეზად მამა ათანასე ამას ასახელებდა, პოლიცია კი ამბობდა, რომ მამაოს მართვის მოწმობა არ ჰქონდა და პოლიციელებსაც შეურაცხყოფას აყენებდა. ინციდენტი საბოლოოდ იმით დასრულდა, რომ მამაოს მანქანა ჩამოართვეს, კანონის დარღვევით საჯარიმოზე გადაიყვანეს და მამა ათანასე დააჯარიმეს.
ამ ინციდენტის გადაღების დროს, “გურია ნიუსისთვის” ხელის შეშლას ხელისუფლების მომხრე ამაღლებელი შეეცადა, კამერაზე ხელი აგვიკრა, მოგვიანებით კი ოპერატორთან საქმის “მისებურად” “გარჩევა” სცადა იმ მიზეზით, თუ რატომ ვიღებდით ინციდენტს. ჩვენ ჩაკითხვაზე კი, რა უფლებით იქცეოდა ასე, მისი პასუხი გინება იყო.
აღსანიშნავია, რომ არჩევნების დღეს, “გურია ნიუსის” მობილურ ჯგუფს შავ სამოსში გამოწყობილი უცხო პირები თვალს ადევნებდნენ და რიგ შემთხვევაში ფოტოებს უღებდნენ. გვიან ღამით ამ პირებმა ჩვენს ოფისთან გადმოინაცვლეს და რამდენიმე საათის განმავლობაში რედაქციასთან იდგნენ. ღამის 3 საათზე, საოლქოდან ოფისში მისულ ჩვენ კორესპონდენტს გაესაუბრნენ კიდეც: _ მალადეც თქვენ! მაინც მიაღწიეთ რაც გინდოდათ, _ თქვეს უცნობებმა მკაცრი ტონით.
თუმცა, ამ ინციდენტიდან მალევე წავიდნენ. სავარაუდოდ იმის გამო, რომ 4 საათისთვის არჩევნების შედეგების დიდი ნაწილი უკვე ცნობილი იყო.
