“თუ ხანძარი დენმა გამოიწვია, პასუხისმგებლობა “ენერგო პრო ჯორჯიას” დაეკისრება”

ოზურგეთის მუნიციპალიტეტის სოფელ ბახვში, 11 თებერვალს, ჭელიძეების საცხოვრებელ სახლს ხანძარი გაუჩნდა და მრავალსულიანი ოჯახი, ფაქტობრივად, უსახლკაროდ დარჩა _ ცეცხლი სახლის სხვენში გაჩნდა, რის შედეგადაც სახლის სახურავი მთლიანად განადგურდა.
ოჯახის დიასახლისი ნინო ბაჯელიძე “გურია ნიუსთან” იმ უბედური შემთხვევის დეტალებზე საუბრობს, რასაც საშინელი უამინდობა და  უშუქობა დაერთო.
_ ჩემი მეუღლე მძღოლად მუშაობს ოზურგეთი _ ლანჩხუთის ხაზზე. იმ დროს სახლში არ იმყოფებოდა. ღუმელში ცეცხლი ჩამქრალი იყო და ვიფიქრე, მეზობელთან გადავალ,-მეთქი. ნახევარ საათში მომესმა ჩემი მაზლის ყვირილი, რომელიც იძახდა, სახლი იწვისო. გავიქეცით და ვხედავთ, რომ სახლის სახურავი იწვოდა. ხანძარი სახურავიდან გაჩნდა. ეს სახლი კაპიტალურად არის ნაშენები, 15 წელია, გადახურულია და ელექტროგაყვანილობა სრულიად მოწესრიგებული გვქონდა.
_  ხანძრის გამომწვევი მიზეზი შეიძლებოდა დენი ყოფილიყო?
_ დიახ, ყველაფერი ელქსელების ბრალია. ხან მოვარდება უაზროდ მაღალი ძაბვა, ხან ბჟუტავს. მეზობლებიც დამეთანხმებიან, რომ  ბოლო ხანს რვა ტელევიზორი გადაიწვა ჩვენს კუთხეში. შუქი არასტაბილურია. რითი გაჩნდებოდა, აბა, ჭერში ცეცხლი? სახანძრომ მოგვისწრო და რაღაც გადაარჩინა. 
_ თუ იყვნენ ხელისუფლების წარმომადგენლები და დახმარებას თუ დაგპირდნენ?
_ კი, იყო ჩვენი სოფლის გამგებელი. ყველამ იცის, რა უბედურება დაატყდა თავს ჩემს ოჯახს. ყველა საქმის კურსშია. გამომძიებელი და ექსპერტიც მოვიდნენ და გვითხრეს, ხელი არაფერს ახლოთ, ათი დღე სჭირდება ექსპერტიზის დასკვნასო. იმედი მაქვს, რომ დამეხმარებიან.
ოზურგეთის მუნიციპალიტეტის სოფელ ბახვის მთავარი სპეციალისტი მაყვალა ქიქოძე “გურია ნიუსთან” საუბარში აღნიშნავს, რომ ხანძრის გამომწვევი შესაძლო მიზეზი, ნამდვილად შეიძლებოდა, დენი ყოფილიყო:
_ აბსოლუტურად უმართავია “ენერგო პრო ჯორჯია”. ამ ოჯახს მეზობლებიც თუ დაეთანხმებიან, რომ დენმა გამოიწვია ხანძარი, მაშინ ამ კომპანიამ უნდა აგოს პასუხი და დახმარებით შეეწიოს დაზარალებულ ოჯახს. ელექტროენერგიამ ისედაც დააწყვიტა ნერვები სოფლის მცხოვრებლებს _ ყველა თვეში დავალიანებაა. მიხვალ და პასუხს ვერ გაძლევენ. ასე გვეუბნებიან, თქვენ ხომ იცით, რომელი მეზობელი იპარავს დენს, მიდით და გაუთიშეთო. ერთხელ, მახსოვს, ამის ნიადაგზე მკვლელობა მოხდა. მე ქალაქის ცენტრში ვცხოვრობ, პროკურატურის წინ და ჩემთან შუქი არაა, ჩემს მეზობელთან, მეორე მხარეს კი არის.  რისთვის იღებენ 700-ლარიან ხელფასს, მე თუ ვირბინე და ვეძებე ვინ იპარავს შუქს? რას აკეთებენ ისინი?
რაც შეეხება ჭელიძეების ოჯახს, მისმა წევრებმა პატიოსანი შრომით ააგეს სახლი. რა თქმა უნდა, დავეხმარებით, შუამდგომლობას აღვძრავთ მუნიციპალიტეტის გამგეობასთან და ალბათ, გამოუყოფენ საშენ მასალას ან სამასალე ხის მოჭრის უფლებას მისცემენ.
ოზურგეთის მუნიციპალიტეტის გამგებლის მოადგილე მიხეილ გოგოტიშვილი “გურია ნიუსთან” საუბარში აღნიშნავს, რომ  მთავარია, ხანძრის მიზეზი დაადგინონ:
_ მიმდინარეობს მოკვლევა, რა მიზეზით გაჩნდა ცეცხლი _ თუ ელექტროენერგიაა ხანძრის გამომწვევი მიზეზი, მაშინ პასუხისმგებლობა “ენერგო პრო ჯორჯიას” დაეკისრება. ჩვენ გვაქვს უსახლკაროთა დახმარების პროგრამა და  გარკვეულწილად ვეხმარებით სტიქიით დაზარალებულებს, მაგრამ 100%-ით დახმარებას მაინც ვერ შევძლებთ.
_ ამ ეტაპზე რას  აკეთებს მუნიციპალიტეტი ამ ოჯახის დასახმარებლად?
_  ჩვენთვის ცნობილია, რომ ოჯახის წევრებს აქვთ ღამის გასათევი მეზობელთან. ვიმსჯელებთ და გადავწყვეტთ, რა გავაკეთოთ მათი ელემენტარული საცხოვრებელი პირობების დასაკმაყოფილებლად. ჩვენ უყურადღებოდ არავინ დაგვიტოვებია, _ ამბობს გოგოტიშვილი.