ვგრძნობ, რომ ჩემს ჯანმრთელობას და სიცოცხლეს საფრთხე ემუქრება. ამიტომ, მივმართავ სათანადო ორგანოებს, უზრუნველყონ ჩემი უსაფრთხოების დაცვა. მე ვაგრძელებ სამართლებრივ ბრძოლას ჩემი კუთვნილი წილის და კომპანიის დასაბრუნებლად. იმედი მაქვს, იმ ბიზნესმენების უფლებები, რომლებმაც გავბედეთ და ხმამაღლა ვთქვით ჩვენი გაჭირვების შესახებ, დაცული იქნება.
მე არცერთი იმ პიროვნებების სახელს და გვარს არ დავასახელებ ვინც ჩემს მიმართ მუქარას ახორციელებს, თავს შევიკავებ ამისგან. კიდევ მაქვს იმედი, რომ ისინი გონს მოეგებიან და გაჩერდებიან,” _ განაცხადა კომპანია “ფასტ პლიუსის” ყოფილმა გენერალურმა დირექტორმა და 45% წილის მფლობელმა ნაზი ალასანიამ ჟურნალისტებთან შეხვედრაზე.
საგზაო ბიტუმის მსხვილი იმპორტიორი და რეალიზატორი კომპანია “ფასტ პლიუსი” 2012 წლის 27 აგვისტოს შემდეგ სამჯერ გასხვისდა. მისი ამჟამინდელი მფლობელები საჯარო რესტრის მონაცემებით ირანის მოქალაქეები არიან.
ვინ არიან ის ადამიანები, რა ინტერესები ამოძრავებთ ბიტუმის ბიზნესის მიმართ, რატომ დაათმობინეს 45% წილი 1 ლარად და რატომ ემუქრებიან კომპანიის ყოფილ მეწილეს და დირექტორს “გურია ნიუსი” ამის გარკვევას ნაზი ალასანიასთან შეეცადა.
_ ქალბატონო ნაზი, სანამ ბიზნესს გაგასხვისებინებდნენ, მანამდეც იყო თქვენზე გარკვეული მუქარები, თავიდანვე რატომ არ განაცხადეთ მუქარის შესახებ?
_ ჩემო კარგო, მე უკვე 8 თვეა ტერორის ქვეშ ვარ და არ ვიცი, როგორ ვცხოვრობ. იქამდეც მქონდა პრობლემები, მაგრამ ეს სხვა პრობლემები იყო. მაგრამ მე არ მქონდა იმის საშუალება ღიად განმეცხადებინა ამის შესახებ, რადგან სისტემა იყო სხვანაირი. იმ ხალხს, რომლებიც ჩემთან დაპირისპირებულები იყვნენ, ამ მთავრობასთან გარკვეული ურთიერთობა ჰქონდათ. ძალა მათ მხარეს იყო. ერთმა მათგანმა ისიც კი შემომითვალა, _ “დაგიჭერ და პირველ პაემანზე ერთ კილო ბიტუმს მოგიტან საჩუქრადო.”
_ საუბრობენ იმაზეც, რომ თქვენ კოდუების ოჯახი დაგიპირისპირდათ. თუმცა იმასაც ამბობენ, სანამ დაგიპირისპირდებოდნენ, ხელისუფლებასთან შუამავლობას გთავაზობდნენ. ჯერ კიდევ აქვთ კოდუებს გარკვეული გავლენები და როგორ ფიქრობთ, საშიში ხომ არ არის თქვენი მხრიდან განცხადებების გაკეთება?
_ მე მაშინაც და ახლაც ვიმეორებ: თავს ვიკავებ კონკრეტული გვარების დასახელებისგან. არ ვასახელებ არც კოდუას და არც არავის. კიდევ ერთხელ ვაცხადებ, ლაურასთან მე მქონდა მეგობრული ურთიერთობა.
_ ჩვენ არ გვიხსენებიას ლაურა ღაჭავა, გკითხეთ კოდუებზე…
_ არა, არ ვიტყვი! არ დავასახელებ!
_ თქვენ აცხადებთ, რომ ლაურა ღაჭავასთან მეგობრობთ. მიუხედავად ამისა, საუბრობენ იმაზე, რომ ის და მისი შვილები დაგიპირისპირდნენ. გარდა კონკრეტული ბიზნესისა, ამ საკითხში ხომ არ არის რამე სხვა ინტერესი ჩადებული?
_ ამაზე, ალბათ, თვითონ უნდა შეეკითხოთ. იცით რა, ქალბატონ ლაურასთან მხოლოდ მეგობრული ურთიერთობა მქონდა. მე არ ვარ ორმაგი მოთამაშე, ამიტომ ვერ ვიფიქრებ სხვა რამეზე. როცა ვინმესთან ვმეგობრობ, ვმეგობრობ სუფთა გულით. ვერ წარმოვიდგენ, არ ვიცი. არ შემიძლია ამ კითხვაზე პასუხი გაგცეთ.
_ თქვენ ასევე გაქვთ მეორე ბიზნესი, _ ქართული ცხვრის ექსპორტზე გატანა, ამ ბიზნესშიც პრობლემები შეგექმნათ?
_ ძირითადად მქონდა ორი ბიზნესი, ერთი ბიტუმის, რომელიც მართლა მომგებიანი და კარგი ბიზნესია. მეორე _ ცხვრის ბიზნესი და სხვათაშორის, წარმატებულად. ზუსტად ეს ბიზნესი არ მოეწონათ. ჩემი აზრით, ეს იყო ერთ-ერთი მიზეზი იმისა, რომ მაფიოზური კლანი დამეჯახა. იქ არ იყო მარტო ერთი ან ორი გვარი. ეს ჯგუფი რამდენიმე გვარისგან შედგებოდა.
_ თქვენ განაცხადეთ, რომ ბიტუმის ბიზნესი საკმაოდ მომგებიანია, რომელიც 1 ლარად დაგათმობინეს. მიუხედავდ ამ ყველაფრისა, მაინც არ ასახელებთ კონკრეტულ სახელებსა და გვარებს. ამით რის მიღწევას ცდილობთ?
_ თქვენ წარმოიდგინეთ, რამდენიმე წუთის წინ მუქარა ისეთი ადამიანისგან იყო, რომლის სახელი და გვარიც ვიცი. მე მასთან არანაირი პრეტენზია არ მაქვს და არც შეიძლება მქონდეს. მითუმეტეს, მეგზევეს ცოლთან. ახლა დავრწმუნდი, რომ უკვე გადიან ჩემი კონტრაქტორების ოჯახებზე, რომლებმაც ჩემზე ზეწოლა უნდა მოახდინონ.
_ აპირებთ თუ არა მიმართოთ სასამართლოს?
_ აუცილებლად მივმართავ ყველა სამართალდამცავ სტრუქტურას, სამინისტროს, რომელიც ვალდებულია ჩემს საქმეს გადახედოს. მივმართავ სასამართლოსაც.
2011 წელი დაახლოებით 4 მილიონი ლარის დავალიანებით დავამთავრე, რადგან სისტემა მუშაობდა ისე, რომ ფული ჩემთვის არ უნდა გადაეხადათ, უნდა გადაეხადათ იმ ხალხისთვის, რომლებიც სახელმწიფოსთან იყვნენ გარიგებაში.
_ თქვენმა ირანელმა პარტნიორებმა თუ იციან წილის დათმობისა და ზეწოლის შესახებ?
_ იცით რა? საქმეც მაგაშია… ჩემი ირანელი ბიზნეს-პარტნიორი იმდენად დაარწმუნეს და გადაიბირეს ქართველებმა, რომელსაც ჯერ-ჯერობით არ ვასახელებ, რომ ჩემთან კავშირიც არ აქვს და არ ჩამოდის საქართველოში. მე ვფიქრობ, რომ ისიც დაშინებულია. 10%-ის მეწილე ირანელი ბიზნეს-პარტნიორი ერთი თვის წინ იყო ჩამოსული, რომელთანაც ძალინ კარგი და მეგობრული ურთიერთობა მაქვს. მე დამემშვიდობა და წავიდა ბათუმში, საიდანაც უკან უნდა დაბრუნებულიყო. მოგვიანებით გავიგე, რომ მას აეროპორტში პრობლემა შეექმნა. ვკითხე, რა ხდებოდა და მიპასუხა: არ ვიცი, შემაჩერეს, მე მგონი პრობლემა მაქვს საქართველოში ჩამოსვლასთან დაკავშირებითო. იგი განიცდის იმას, რაც ჩემს ირგვლივ ხდება და არ თმობს მის 10% მეორე პარტნიორის სასარგებლოდ. ელოდება იმას, რომ იქნებ დავიბრუნოთ ჩვენი 45%.
მე გავარკვიე რა პრობლემა შეიძლება ჰქონოდა ჩემს ირანელ პარტნიორს. გაირკავ რომ საბაჟოზე არაფერი პრობლემა არ არის. ეს ყველაფერი მიზანმიმართულად გაკეთეს იმისთვის, რომ ჩემი ირანელი პარტნიორები არ ჩამოვიდნენ საქართველოში.
_ თქვენი პარტნიორები უცხო ქვეყნის მოქალაქეები არიან, თუ მათზეც ხორციელდება მუქარა, რატომ არ საუბრობენ ხმამაღლა?
_ მათთან არ მქონია საუბარი.
_ საჯარო რეესტრში ოფიციალურად წილი თუ არის გადაფორმებული?
_ კი. წილი ერთ თვეში რამდენჯერმე გადაფორმდა და დირექტორად სხვა დაინიშნა.
_ დღეს ეს კომპანია ფუნქციონირებს?
_ არ ვიცი ამ წუთას რა ხდება კომპანიაში. მე არ მაქვს შეხება.
