“ბათუმი ჯერ კიდევ პატარა ქალაქია და ყველა ვიცნობთ ერთმანეთს. ჩვენი უკვე სტაჟიანი ურთიერთობა ბათუმის საკრებულოში, გვაძლევს იმის საფუძველს, რომ ჩვენი განცხადება სწორად იქნება გაგებული. სწორედ ამ ურთიერთობის გამო იყო, რომ ამდენ ხანს შემოვრჩით უმრავლესობას, თორემ ციხის საშინელი კადრების ნახვის შემდგომ, რომლის გამოც მაშინვე გამოვხატეთ პრესის საშუალებით ჩვენი აღშფოთება, გადაწყვეტილება კარგა ხანია მიღებული გვაქვს. უბრალოდ, გზაში ვერ მივატოვეთ ადამიანები, რომლებთან ერთად, ვფიქრობთ, არა ერთი კარგი საქმე გვიკეთებია ჩვენი ქალაქისთვის. იმასაც გეტყვით _ მეტი თავისუფლება რომ ყოფილიყო ცენტრალური ხელისუფლების მხრიდან, გაცილებით მეტ სარგებელს მოვუტანდით ბათუმს. არსებობს რაღაც ზღვარი მორიდებაშიც და მეგობრობაშიც. ყოველდღე ახალ-ახალ საშინელებებს ვხედავთ და ვისმენთ ტელევიზიით და არ გვინდა ჩვენი სახელი და გვარი ასოცირდებოდეს იმ გუნდთან, რომელმაც ნაციონალური მოძრაობის სახელით შეურაცხყო თავად ჩვენი ეროვნული იდეები.
არაფერს გიხსნით, მშვენივრად იცით, რომ ზოგიერთებივით რაღაც პრაგმატული მოსაზრებების გამო, ვიღაცასთან მიკედლებას არ ვაპირებთ. ვტოვებთ რა უმრავლესობას, ვრჩებით თავისუფალ დეპუტატებად. ბოლოს და ბოლოს, არც დეპუტატობა ყოფილა ოდესმე ჩვენთვის კაცობის განმსაზღვრელი,” _ ნათქვამია განცხადებაში.
ბათუმის საკრებულოს 25 დეპუტატი ჰყავს. თავიდან 20 მანდატი ნაციონალურ მოძრაობას ერგო, 5 კი ოპოზიციას. რამდენიმე კვირის წინ “ქრისტიან-დემოკრატმა” ვაჟა ვერულიძემ დატოვა პარტია და დამოუკიდებელ დეპუტატად განაგრძო საკრებულოში მოღვაწეობა.
ამჟამად ბათუმის საკრებულოში 4 დამოუკიდებელი დეპუტატი, 4 ოპოზიციური პარტიის წარმომადგენელი და 16 ნაციონალია.
რამდენიმე დღის წინ, ბათუმის მერიის აპარატის უფროსმა გელა მახარაძემ თანამდებობა დატოვა. როგორც ბათუმის მოქმედი მერი ამბობს, მახარაძემ კერძო სექტორში გადაინაცვლა. გელა მახარაძე ყოველთვიურად პრემიის სახით 750 ლარს იღებდა, მერს კი 500 ლარი ჰქონდა პრემია.
