“საახალწლო კონცერტის შემდეგ, იმედი სულ გაგვიცრუეს. მაშინ, როცა პენსიონერებს 2011 წლის ნოემბრის თვიდან ხელფასი არ გვქონდა მიღებული, საახალწლო კონცერტზე თბილისიდან მოიწვიეს ჯგუფი “ფემილი”და ერთ კონცერტში გადაურიცხეს 45 ათასი ლარი. ეს თანხა ანსამბლის ორი წლის ხელფასია. ნუთუ, არ შეიძლებოდა, საახალწლო კონცერტი გამართულიყო ადგილობრივი ძალებით და ჩვენთვის გამოეწერათ დაპირებული ხელფასი?!” _ კითხვას სვამენ ანსამბლის წევრები.
_ 2011 წლის ნოემბრში, ოზურგეთის მუნიციპალიტეტის კულტურის ცენტრთან არსებული ხალხური ანსამბლის “იადონის” პენსიონერ წევრებს ხელისუფლებამ “სიურპრიზი” მოგვიწყო _ კუთვნილი პენსია არ ჩამოგვირიცხეს. როგორც გავარკვიეთ, მიზეზი ის ყოფილა, რომ კულტურის სფეროში რაკი 80 ლარს ვიღებთ ხელფასის სახით, თურმე, არ შეიძლება, ბიუჯეტიდან კუთვნილი პენსიისა და ხელფასის ერთად მიღება. არადა, ხალხური ფოლკლორი, სიმღერა იქნება ის თუ ცეკვა, ხანდაზმულ ადამიანებში ინახება, _ ამბობენ ამაგდარი მომღერლები.
ანსამბლის პენსიონერი წევრები ამბობენ, რომ რეპეტიციებზე მუნიციპალიტეტის სხვადასხვა სოფლებიდან, 15-20 კმ. მანძილის დაშორებით დადიან, რასაც ძირითადად, ფოლკლორის უდიდესი სიყვარულის გამო აკეთებენ, რომ არა ეს სიყვარული, აღნიშნული სახელფასო ანაზღაურება გზის ხარჯადაც არ კმარა.
_ რაიონის ხელმძღვანელობამ დაგვაყენა არჩევნის წინაშე, რომ ან პენსიაზე გვეთქვა უარი, ან ხელფასზე და ისე გვევლო რეპეტიციებზე. ჩვენ, ოზურგეთის ხალხური სიმღერის ანსამბლის პენსიონერ წევრებს ასეთი “სიურპრიზი” ერთხელ, 2009 წელსაც მოგვიწყვეს; მაშინ იძულებულნი გავხდით, განცხადებით მიგვემართა პრეზიდენტისთვის, რის შემდეგაც ვიღებდით პენსიას და იმ მცირე ხელფასს, რომელიც ხელისუფლებას გათვლილი ჰქონდა გზის ხარჯზე, _ ამბობენ მომღერლები.
მათი განმარტებით, რაიონის ხელისუფლებას სურდა, რომ კულტურის სფეროში ნაკლები დანახარჯი ჰქონოდა. თუმცა, ეს გაბერილი შტატების შემცირების ხარჯზე უნდა ექნა და არა ისეთ მომღერლებზე უარის თქმით, რომლებმაც თავიანთი შეგნებული ცხოვრება მოახმარეს ქართულ ხალხურ ფოლკლორს.
_ ოზურგეთის კულტურის ცენტრში თანამშრომელი ქალბატონები მეტია, ვიდრე ფოლკლორული ანსამბლების მომღერალი წევრები. ხალხურ სიმღერებს გადაშენება ემუქრება. რა პატივია, ხალხური სიმღერების ლოტბარებს, რომლებიც თითზე ჩამოსათვლელნი არიან ჩვენს მუნიციპალიტეტში, კუთვნილ პენსიაზე 60 ლარით მეტი მისცე ხელფასი და ამით უარი ათქმევინო იმ პენსიაზე, რომელიც თითოეულმა საკუთარი დამსახურებით მიიღო?! _ ამბობენ ისინი.
ლოტბარი პენსიონერები დაინტერესებული არიან იმითაც, რატომ დაამთხვიეს ეს ფაქტი არჩევნების მოახლოებას, როცა, თავად ხელფასებთან ერთად პრემიებსაც იღებდნენ: _ თუკი ხელისუფლებას საკუთარი კეთილდღეობისთვის კანონში ცვლილებების შეტანა შეუძლია, ხელოვანმა პენსიონერებმა რა დავაშავეთ? სულ გვაყვედრიდნენ, ბიუჯეტი კოლოსალურად გაიზარდაო _ გაზრდილი ბიუჯეტიდან თვითონ ფინანსდებოდნენ. როცა მათი შემოსავალი რამდენიმე ათასი ლარია, კულტურის მუშაკებისთვის თვეში 100 ლარი რატომ არ ემეტებოდათ? რატომ უნდა განსხვავდებოდნენ პარლამენტარები და საზოგადოების სხვა სოციალური ფენები ერთმანეთისგან?
პენსიონერი მუშაკები იმასაც იხსენებენ, რომ მათ რაიონის ხელმძღვანელობა შეჰპირდა, რომ არ დაუკარგავდა ნაშრომს და რადგან ყოველთვიურად ვერ გასცემდნენ ხელფასს, სამაგიეროდ, დაგეგმავდნენ კონცერტებს დღესასწაულებზე და ამის საშუალებით გამოუწერდნენ კუთვნილ ხელფასს.
ოზურგეთის კულტურის ცენტრთან არსებული ხალხური სიმღერის ანსამბლ “იადონის” წევრებს 2011 წლის ნოემბრის თვიდან დღემდე, მიღებული აქვთ მხოლოდ 2 თვის ხელფასი.
პენსიონერი მომღერლები სთხოვენ ქვეყნის ახალ პრემიერ-მინისტრს, ბატონ ბიძინა ივანიშვილს, გამოყოს კომისია, რომელიც შეისწავლის მათ საქმეს: სად გაქრა ანსამბლისთვის გამოყოფილი 2012 წელს მისაცემი თანხა, რომელიც საკრებულოს თავმჯდომარეს, ალეკო მამეშვილს უნდა გადაეცა მისი წევრებისთვის.
ოზურგეთის მუნიციპალიტეტის კულტურის ცენტრის დირექტორი, კობა ბანძელაძე “გურია ნიუსთან”საუბარში კანონს იშველიებს:
_ არსებობს შესაბამისი კანონი, რომელიც ამ წესს არეგულირებს. პენსიონერებს, თუ ისინი მუშაობენ, ხელფასი არ მიეცემათ. მათი გადასაწყვეტია, თუ აირჩევენ სამსახურს, მაშინ პენსია არ ექნებათ.
_ ბატონო კობა, მათი განცხადებით, საახალწლოდ შეპირებული თანხა, რომელიც კონცერტისთვის უნდა მიეღოთ, არ მისცეს, სამაგიეროდ, ჯგუფ “ფემილის”45 000 ლარი გადაუხადეს.
_ ზუსტად არ ვიცი. როცა ანსამბლის წევრები შეიკრიბებიან, მათ შევხვდები და შევისწავლი ამ საკითხს, _ გვპირდება ბანძელაძე.
