მერიის თემში 4 სოფელი: მერია, ნაღობილევი, ხვარბეთი და ჭახვათა შედის. სოფელ მერიისთვის 2011 წელს “სოფლის მხარდამჭერი პროგრამით” გასახორციელებელი სამუშაოებისთვის გამოყოფილი იყო 26 705 ლარი, ნაღობილევში _ 15 783 ლარი, სოფელ ხვარბეთში _ 15 710, სოფელ ჭახვათაში _ კი 4 539 ლარი.
ოფიციალური დოკუმენტების თანახმად, 2011 წელს, სოფელ მერიაში 26 705 ლარით უნდა შესრულებულიყო შემდეგი სამუშაოები: გზის მოწყობა გოგორეთის უბანში რკინა-ბეტონის ფილებით _ 7 744 ლარი დაჯდა, ადმინისტრაციული შენობის სახურავის რემონტი _ 10 101 ლარი, სპორტული მოედნის რემონტი _ 2 515, წყალგაყვანილობისთვის მასალების შეძენა _ 2 727 ლარი, სასაფლაოზე სველი წერტილის მოწყობა კი _ 1099 ლარი.
სოფელ ნაღობილევში გამოყოფილი 15 783 ლარიდან შემდეგი სამუშაოები უნდა შესრულებულიყო: გზის მოწყობა რკინა-ბეტონის ფილებით 6 676 ლარი, მილხიდების რემონტი _ 3 404, ხრეშოვანი გზის რემონტისთვის _ 3 742 ლარი, საბავშვო ბაღის ეზოში სათამაშო მოწყობილობების მონტაჟი _ 1416 ლარი.
სოფელ ხვარბეთში _ 15 710 ლარი უნდა გადაენაწილებინათ: საყანე ფართობების ღობის მასალების შეძენისთვის _ 11 246 ლარი, სანიაღვრე არხების გაწმენდისთვის _ 1837 ლარი, წყალგაყვანილობის მასალის შეძენისთვის _ 4571 ლარი.
სოფელ ჭახვათაში გამოყოფილი 4 539 ლარიდან ნაპირსამაგრი ყრილის მოწყობისთვის _ 1 459 ლარი და წყალგაყვანილობის მილების შესასყიდად 4 200 ლარი დახარჯეს.
ოზურგეთის მუნიციპალიტეტის სოფელი მერია 10 კილომეტრით არის დაშორებული ოზურგეთიდან. მერიაში 3 925 ადამიანი ცხოვრობს, რომელთა პრობლემები გურიის რეგიონის სხვა სოფლების მოსახლეობის პრობლემების ანალოგიურია. მერიელები ამბობენ, რომ ყველაზე დიდი პრობლემა უმუშევრობაა. აწუხებთ უგზოობა, მათი თქმით, სოფლის დახმარების პროგრამით ყველა წელს აკეთებენ გზას, რომელიც არ კეთდება კაპიტალურად და ეს პრობლემა, მიუხედავად ძალიან დიდი დანახარჯისა, ერთ თვეში ისევ იჩენს თავს.
სოფელში ერთ-ერთ ყველაზე დიდ პრობლემას უწყლობა წარმოადგენს. სოფლის მცხოვრებთა და რწმუნებულის, ვაჟა ჩანჩიბაძის თქმით, სოფელ მერიაში არ არსებობს წყლის ცენტრალური მომსახურება, მოსახლეობა საკუთარი არტეზიული ჭებით სარგებლობს, სოფელ ნაღობილევში, ხვარბეთში და გოგორეთის უბნებში მოსახლეობა ზაფხულში წყალს ხელით ეზიდება. არის, ასევე, შიდა გზების მოუწესრიგებლობის პრობლემაც.
სოფელ მერიის მცხოვრებლები არსებული ინერტული მასალების კარიერების პრობლემებზეც საუბრობენ. ოზურგეთის მუნიციპალიტეტის სოფელ მერიაში, მდინარე ნატანების სანაპირო ზოლი, დიდი ხანია, ქვიშის კარიერად იქცა და 40 ჰექტრამდე საყანე მიწის ფართობი, თითქმის მთლიანად წალეკა. პრობლემა ძალიან მწვავეა: _ მას შემდეგ, რაც მდინარე ნატანებში ქვიშისა და ხრეშის მოპოვება დაიწყეს, წყალმა შეიცვალა კალაპოტი, წაიღო რამდენიმე ჰექტარი მიწის ფართობი და ყველა ადიდებისას იგივე მეორდება, _ ამბობენ სოფელ მერიის მცხოვრებლები “გურია ნიუსთან. მათი თქმით, სოფელს არ აქვს საბავშვო ბაღიც, რაც ძალიან დიდ პრობლემას ქმნის.
რწმუნებულის ვაჟა ჩანჩიბაძის თქმით, მერია ძალიან დიდი სოფელია და ეტაპობრივად ხდება შიდა გზების მოწესრიგება:
_ შიდა გზები ნამდვილად მოუწესრიგებელია. არ არის გზა სოფელში, სადაც მანქანას არ უჭირს გავლა.
_ სოფელ ხვარბეთში, 2011 წელს, “სოფლის მხარდამჭერი პროგრამით”, გათვალისწინებული იყო წყალგაყვანილობის მასალების შეძენა, რომლისთვისაც დაიხარჯა 4 571 ლარი, თუმცა, როგორც მოსახლეობა ამბობს, წყალგაყვანილობის სისტემა მოწესრიგებული არაა, ფაქტობრივად, მერიაში წყლის პრობლემა გადაუჭრელია…
_ კი, ბატონო, შევიძინეთ წყალგაყვანილობის მასალები და ნაწილობრივ არის გაკეთებული.
_ ბატონო ვაჟა, როგორც ჩვენ ვნახეთ, ეს მასალები ხვარბეთში ერთ-ერთ ოჯახში ინახება, რატომ ვერ მოხერხდა მოსახლეობის წყლით უზრუნველყოფა?
_ კი, ინახება ერთ-ერთ ოჯახში. გეტყვით, რატომაც ვერ კეთდება _ ჩვენ, რაც მთავარია, შევიძინეთ მასალები, გაკეთებით კი თავად მოსახლეობას უნდა გაეკეთებინა, მაგრამ არ ინდომებენ. მოვა გაზაფხული, თურქეთში გარბიან სამუშაოდ და ა.შ.
_ იყო თუ არა ჩართული თავად მოსახლეობა ამ საკითხის განხილვაში?
_ რა თქმა უნდა, მათი მოთხოვნა იყო ის, რომ ჩვენ შეგვეძინა მასალები, დანარჩენს კი თავად გააკეთებდნენ. გაფრთხილებები ჩვენის მხრიდან მიცემული აქვთ.
_ რას იტყვით ინერტული მასალების კარიერებთან დაკავშირებით და თუ იცით, მერიის ტერიტორიაზე სულ რამდენი კარიერია დარეგისტრირებული?
_ ჩვენ აზრზე არ ვართ, რა ხდება, ვინაა მფლობელი, ვინ რას აკეთებს მაგ მხრივ. ეს ჩვენთან დარეგისტირებული არაა და აქედან გამომდინარე, ვერაფერს ვერ გეტყვით. ჩვენ არც ურთიერთობა გვაქვს კარიერების მეპატრონეებთან. ალბათ, 20 მაინც იქნება. ის კი ვიცი, რომ მდინარე ნატანების კალაპოტის შეცვლის შემდეგ, საყანე ფართობების ძალიან დიდი ტერიტორია წაღებულია.
უკვე დიდი ხანია, არ გვაქვს საბავშვო ბაღი. ბაღის მშენებლობა დიდ თანხებთან არის დაკავშირებული, რაც ჩვენ ბიუჯეტი გვაქვს და სოფლის პროექტების თანხებიც რომ შეკრიბო ერთად, ისიც არ ეყოფა. იქნებ, გამოჩნდეს იმის საშუალებაც, რომ საბავშვო ბაღი ჰქონდეს მერიის მოსახლეობას.
