_ოზურგეთელი ჩინოვნიკები სოფელ-სოფელ, რესტორან-რესტორან თანამდებობებზე დარჩენას აღნიშნავენ, ეს განწყობა კი ოზურგეთელ პოლიციელებსაც გადაედო. მინდა, მათ შევახსენო, რომ 2011 წლის 26 მაისს, ღამით, მომიტინგეთა სასტიკ დარბევაში მონაწილეობდნენ. სატელიტური ანტენების დადგმის გამო, პოლიციაში დაკითხვებზე იბარებდნენ მოქალაქეებს, 31 სექტემბერს ურეკავდნენ „ქართული ოცნების“,აქტივისტებს და 2 ოქტომბერს იბარებდნენ დაკითხვაზე… ხალხს კი, იმ ხალხს, რომელსაც არჩევნების დროს აშანტაჟებდნენ, აშინებდნენ და ემუქრებოდნენ, არ სურს, რომ ისინი ისევ თანამდებობაზე იხილოს. ოზურგეთში რამაზ ნიკოლაიშვილი არ ჩანს, თორემ ის ადამიანები, რომლებიც მის გვერდით იდგნენ, კვლავ თანამდებობაზე არიან, კვლავ ცუდ საქმეებს აკეთებენ, _ განაცხადა პრესკონფერენციის დროს ლელა ნაცვალაძემ.
“გურია ნიუსი” ამ განცხადებასთან დაკავშირებით შსს გურიის სამხარეო პოლიციის სამმართველოს უფროსს, გურამ ჩანტლაძეს დაუკავშირდა.
გურამ ჩანტლაძემ “გურია ნიუსთან” სატელეფონო საუბრის დროს განაცხადა, რომ 2 ოქტომბერს ის ხალხი იყო დაბარებული პოლიციაში, ვინც კოალიციიდან ხელფასს იღებდა.
_ ყველა ის ადამიანი იყო დაბარებული, რომლებიც პოლიტიკური პარტია „ქართული ოცნების“ სახელფასო ანაზღაურება აიღო, უბრალოდ ეს იყო გარკვევის თემა და ამ ამბავს აწარმოებდა შინაგან საქმეთა სამინისტრო, რეგიონის დონეზე არ ყოფილა ეს და ჩვენ გთხოვეს, რომ ყველა ის ხალხი ვინც იღებდა ხელფასს დაგვებარებინა, მიმდინარეობდა გამოძიება, მოქალაქის მოსყიდვასთან დაკავშირებით ხომ არ ჰქონდა რაიმე ფაქტს ადგილი.
_ პრესკონფერენციაზე ლელა ნაცვალაძემ ასევე განაცხადა, რომ ბაჩო ახალაის კადრები თანამდებობებზე არ უნდა დარჩნენ, თქვენ სწორედ ახალაიას მინისტრობის დროს დაინიშნეთ ამ თანამდებობაზე…
_ მე, 2000 წლიდან ვმუშაობდი ძალოვან სტრუქტურებში. ვმუშაობდი, შსს კონსტიტუციური უსაფრთხოების დეპარტამენტის გურიის სამხარეო ადმინისტრაციის უფროსი, ამ პერიოდში ბაჩო ახალაია თუ არ ვცდები თავდაცვის მინისტრი იყო. ბატონ ბაჩოსთან ახლო ურთიერთობა არ მქონია. მე, ვფიქრობ, რომ საზოგადოების კადრი ვარ. თუ შეიძლება ასე ითქვას. ჩემს შესახებ ნებისმიერ ადამიანს შეუძლია კითხოს შინაგან საქმეთა მინისტრს ირაკლი ღარიბაშვილს. _ განცხადა ჩვენთან საუბრის დროს გურამ ჩანტლაძემ.
