როგორც გია მუხიაშვილი “გურია ნიუსსთან” აცხადებს ის, 1986 წლიდან მუშაობს ფინანსთა სამინისტროში.
_ ვმუშაობდი სხვადასხვა თანამდებობაზე საგადასახადო დეპარტამენტში, საგადასახადო პოლიციაში, ფინანსურ პოლიციაში, ასევე შემოსავლების სამსახურში რეგიონული ცენტრების უფროსის მოადგილედ. 2011 წლის ოქტომბრიდან წამოვედი სამსახურიდან ვისვენებდი რაღაც მიზეზების გამო. ვარ ოფიცრის ჩინით, ვიცეპოლკოვნიკი და უპარტიო. განსაკუთრებით მინდა აღვნიშნო, რომ გურულების მიმართ ძალიან დიდი სიმპატია მაქვს, -გვითხრა გია მუხიაშვილმა.
_ ბატონო გია, განხორციელდება თუ არა თქვენს სამსახურში რეორგანიზაცია?
_უბნის ოფიცრები, რომლებიც იყვნენ მომსახურეობის სამმართველოს დაქვემდებარებაში, გადმოდიან ჩვენთან შემოსავლების სამსახურში. ეტაპი დაწყებულია. გარდა ამისა, ჩვენი სამმართველო გააგრძელებს კომპეტენციის ფარგლებში კონტროლის განხორციელებას გადამხდელების მიმართ. კანონმდებლობაში არაფერი ცვლილება არ არის. არცერთი თანამშრომლის გათავისუფლება არ მომხდარა, თითოეული მათგანი გააგრძელებს ჩვეუებრივ რეჟიმში მუშაობას. მე შევხდი ყველას და ვესაუბრე.
_ალბათ უკვე საქმის კურსში ხართ, ოზურგეთში ერთ-ერთი მსხვილი ბიზნესმენის მერაბ ვასაძის ობიექტში შემოსავლების სამსახური შევიდა და დალუქა. ..
_ კი, რა თქმა უნდა, ყველაფერი ვიცი და ახლავე მოგახსენებთ. ანგარიშსწორების გეგმიური საფინანსო- საბუღალტრო შემოწმება ხორციელდება აუდიტის დეპარტამენტის მიერ, რომელიც რესპუბლიკაში არის ერთი და იქედან ხორციელდება სრული კონტროლი, შემოწმება გადამხდელებისა. ეს არის ერთი კონკრეტული კონტროლი, ღონისძიების გატარება აღურიცხავი საქონლის გამოვლენის მიზნით.
ასეთი ღონისძიებები გათვალისწინებულია იმ გადამხდელების მიმართ, ვისზეც გვაქვს ინფორმაცია, რომ აქვს აღურიცხავი საქონელი სასაქონლო ზედნადების გარეშე შეძენილი.
_ბატონო გია, გავრცელებული ინფორმაციით, ვასაძეები იყვნენ „ნაციონალური მოძრაობის“ მხარდამჭერები და სწორედ ამიტომ დაიწყო შემოსავლების სამსახურმა მისი არაგეგმიური შემოწმება?
_არ შეესაბამება ეს ინფორმაცია სიმართლეს. აი ეხლა რომ პირისპირ ვსაუბრობდეთ, უფრო შემეძლება აგიხსნათ და დაგარწმუნოთ რომ, არანაირი მსგავსი რამ არ შეიძლება მოხდეს. არ შეიძლება ეს ყველაფერი პოლიტიკური ნიშნით განხორციელდეს.
_მოხდა თუ არა კიდევ სხვა ობიექტების შემოწმება და რამდენ ხანს გაგრძელდება ეს პროცესი?
_ კი, რა თქმა უნდა. მუშავდება ინფორმაცია ყველა გადამხდელის მიმართ, ინფორმაცია არის ჩვენს საგადასახადო ბაზაში ყველანაირი და კონკრეტული ფაქტების გადამოწმების შედეგად ხდება გადამხდელთან შესვლა.
_ბატონო გია, რა დარღვევები აღმოაჩინეთ შემოწმების დროს, თუნდაც ვასაძეებს რაიმე სერიოზული სახის დარღვევები ჰქონდათ?
_ობიექტი დალუქულია და ცუდად ნუ გაიგებთ. ობიექტი დაილუქა კანონის შესაბამისად, ეს არის წესი, კანონით გათვალისწინებული. ჩვენ მას მივეცით ვადა, იცის ამ ვადის შესახებ და უნდა წარმოგვიდგინოს მისი ბუღალტრული ნაშთი. ამის შემდეგ გაიხსნება ობიექტი და მათთან ერთად მოხდება ინვენტარიზაცია.
_ოზურგეთში მხოლოდ ერთ კონკრეტულ ობიეტზე შევიდა შემოსავლების სამსახური?
_არა. ჩვენ მოგვიწევს გაცილებით მეტ ობიექტზე შესვლა.
_ ანუ იგეგმება მასობრივი შემოწმება?
_ კი ბატონო აუცილებლად.
_ რას გვეტყვით კერძო აგენტებზე, ალბათ მოგეხსენებათ მათი საქმიანობის შესახებ. „გურია ნიუსი“ მათ მიერ დაჯარიმების ფაქტებზე ბევრჯერ წერდა. საზოგადოება აპროტესტებდა ამ ფაქტებს და ადამიანები ამბობდნენ, რომ ეს იყო ტერორი, რომელსაც საგადასახადო ახორციელებდა მეწარმეებზე. .
_ ვიცი ყველაფერი, მსმენია მსგავსი ფაქტების შესახებ. მინდა აღვნიშნო, რომ მათ აქვთ ხელშეკრულება დადებული შემოსავლების სამსახურთან, მათ უფლება აქვთ განახორციელონ მსგავსი სამუშაო. თუმცა, ჩემი კომპეტენციის ფარგლებს სცილდება. გეტყვით, რომ გაგრძელდება, მაგრამ ვფიქრობ, რომ არა იმ ფორმით როგორც ხდებოდა. მათ უკვე მიეცათ ამის შესახებ მითითება, რომ ღონისძიებები ცუდი ფორმით აღარ გააგრძელონ.
