დღეს, რეგიონული განვითარებისა და ინფრასტრუქტურის სამინისტროში კახეთის სტიქიის შედეგების ლიკვიდაციის შემსწავლელი კომისიის სხდომა შედგა. აღნიშნული კომისია საქართველოს მთავრობის დავალებით შეიქმნა და მას რეგიონული განვითარებისა და ინფრასტრუქტურის მინისტრის პირველი მოადგილე თენგიზ შერგელაშვილი ხელმძღვანელობს. დღევანდელ სამუშაო სხდომას რეგიონული განვითარებისა და ინფრასტრუქტურის მინისტრი დავით ნარმანია, პრეზიდენტის რწმუნებული კახეთის რეგიონში ზურაბ ჭიაბერაშვილი, პარლამენტის წევრი თინათინ ხიდაშელი და სამინისტროს და ადგილობრივი მმართველობის წარმომადგენლებით დაკომპლექტებული სამუშაო ჯგუფების ხელმძღვანელები ესწრებოდნენ. ამის შესახებ სამინისტროს საზოგადოებასთან ურთიერთობის სამსახურის მიერ გავრცელებულ პრეს-რელიზშია აღნიშნული.
შეხვედრაზე კომისიამ კახეთის სტიქიის სალიკვიდაციო სამუშაოების შემსწავლელი ჯგუფების მუშაობის შედეგები განიხილა. „შეგახსენებთ, რომ დაზარალებული მოსახლეობისათვის გასაწევი დახმარებების ნუსხაში პირველი რიგის პრიორიტეტი ზამთრის პერიოდში მოსახლეობის ნორმალური საცხოვრებელი პირობებით უზრუნველყოფა, შესაბამისად, დაზიანებული სახლების გადახურვა და არსებული სახურავების შეკეთება გახლდათ. სხდომაზე სწორედ აღნიშნულ საკითხთან დაკავშირებით ჩატარებული სამუშაოების შედეგების შესახებ იმსჯელეს. ასევე განიხილეს იმ კომპანიების მიერ შესრულებული სამუშაოების შედეგები, რომლებიც დაზიანებული სახლების შეკეთებას ახორციელებდნენ. სამუშაო სხდომაზე განხილულ იქნა სტიქიის შედეგად განადგურებული სასოფლო-სამეურნეო დანიშნულების სავარგულების კომპენსაციის მექანიზმიც,“ – აღნიშნულია სამინისტროს მიერ გავრცელებულ პრეს-რელიზში.
2012 წლის 19 ივლისის სტიქიამ კახეთი მნიშვნელოვნად დააზარალა. განსაკუთრებით კი გურჯაანის რაიონის 4 სოფელი: ვაზისუბანი, კალაური, შაშიანი და ვაჩნაძიანი. ამ სოფლების მოსახლეობა 100 პროცენტით დაზარალებულთა სიაში მოხვდა. ადგილობრივებს მთლიანად გაუნადგურდათ მოსავალი. ყველა სახლს ჩაემსხვრა ფანჯარა, უმრავლესობას კი სახურავი გადაძვრა. სახლების გადახურვის პროცესი დასრულებულია, თუმცა შემინვის საკითხი დღემდე მოუგვარებელია. ადგილობრივები ჩვენთან საუბრისას აცხადებენ, რომ მოსახლეობის დიდი ნაწილი ზამთარს ცელოფანაკრული ფანჯრებით და სარჩო-საბადებლის გარეშე ხვდება.
სტიქიის შედეგად დაზარალებულ ოჯახებს წინა ხელისუფლებამ ფულადი კომპესაცია გადასცა, სახლები გადაუხურა, სურსათი დაურიგა და სტუდენტი შვილების საფასური გადაუხადა. გურჯაანის რაიონის ამ ოთხი სოფლის მოსახლეობას, ვინაიდან 100 პროცენტით დაზარალებულთა კატეგორიაში მოხვდნენ, ძველმა ხელისუფლებამ კომპესაციის სახით მაქსიმალური თანხა, 1500 ლარი გადასცა.
“1500 ლარიდან 1300 ლარის შხამ-ქიმიკატები მქონდა აღებული. წავედი და ვალი გავისტუმრე. ვენახის, ატმის, პომიდვრის, კიტრის შესაწამლად მჭირდებოდა. 25 ათასი ლარის მოსავალი უნდა ამეღო. მთლიანად ვიზარალე. თუ მესტუმრებით, ძველ ღვინოს დაგალევინებთ, ახალ წელს არ დამიწურავს,” – ამბობს სოფელ ვაზისუბანში მცხოვრები ნუგზარ დათუნაშვილი.
მოსახლეობა ახალი ხელისუფლებისგან რეალურ დახმარებას ელოდება, თუმცა ჯერ არ იციან, რას მიიღებენ.
“მოსავალი ვერავინ აიღო. ზამთარს დიდი გაჭირვებით ვხვდებით. ახლა აღწერა მიმდინარეობს. ვის რა მოსავალი დაუზიანდა, რა ფართობზე და ა.შ. მოსახლეობას იმედი აქვს, რომ დახმარება იქნება. თუ ასე მოხდა, ზამთარს ხალხი ადვილად გადაიტანს. თუ არა, ძალიან გაჭირდება,” – აცხადებს სოფელ ვაზისუბანში მცხოვრები გოგი ბუსურაშვილი.
რა ზარალი მიაყენა სტიქიამ კახეთს, საბოლოოდ ჯერ არ არის დათვლილი. ზარალის აღწერისა და დაჯამების პროცესი ახლა მიმდინარეობს.
სტიქიის შედეგად დაზარალებული მოსახლეობა აცხადებს, რომ დასეტყვილი ნაკვეთებიდან 2013 და 2014 წლებში სრულფასოვან მოსავალს ვერ მიიღებენ. ისინი ვარაუდობენ, რომ ამ ორი წლის განმავლობაში ნაკვეთებზე მოსავლიანობა გასულ წლებთან შედარებით, 60-70 პროცენტით შემცირდება.
