მათი ბინის საფასური ყოველთვიურად რამდენიმე ასეული დოლარია. თითოეული მოსამართლის უსაფრთხოებას სახელმწიფო დაცვა იცავს. დაცვის სამსახური აკონტროლებს მათ საცხოვრებელი სახლებსაც. საკონსტიტუციო სასამართლოს მოსამართლის უფლებამოსილება ათწლიანია, ხოლო სასამართლოს თავმჯდომარისა 5 წელი. საკონსტიტუციო სასამართლოს თავჯდომარის ხელფასი 5650 ლარია. თავმჯდომარეს ხელფასით ოდნავ ჩამორჩება სხვა მოსამართლეები.
საკონსტიტუციო სასამართლომ 2012 წლის განმავლობაში 10 სხდომა გამართა. გასულ წელს კი 12, ხოლო 2010 წელს ცხრა სხდომა.
საკონსტიტუციო სასამართლომ ბოლო ტენდერი მიმდინარე წლის 26 ოქტომბერს კომპიუტერული ტექნიკის შესაძენად 10 400 ლარზე გამოცხადდა. ტენდერში მონაწილეობა ერთადერთმა კომპანია “ალტამ” მიიღო და შესყიდვა 10 075 ლარად განახორციელა.
სატენდერო დოკუმენტაციაში ვკითხულობთ: “დეკსტოპ კომპიუტერი (All in one). პროცესორი მინიმუმ 2 გიგაჰერცი; ოპერატიული მეხსიერება მინიმუმ 4 გიგაბაიტი; ოპერატიული მეხსიერება მინიმუმ 4 გიგაბაიტი; ეკრანი მინიმუმ 27 ინჩი; აქტიური მატრიცული ეკრანით; გრაფიკული დამაჩქარებელი მინიმუმ ეიდი 6770მ; დამატებითი მოწყობილებები ვაელეს კლავიატურა და მაუსი. ტენდერში გამარჯვებულ კომპანიამ მსგავსი პარამეტრების ე.წ. მაკი 3835 ლარად მიყიდა. ასევე სახელმწიფო შესყიდვების სააგენტოს ვებ გვერდზე ვკითხულობთ, რომ მეორე ლეპტოპი მონაცემებით: ეკრანი 13 ინჩი; ოპერატიული მეხსიერება მინიმუმ 4 გიგაბაიტი და სხვა ძლიერი მახასიათებლები მახასიათებელი, წონით 2,06 კილოგრამი. – ეს მაკბუქი 3330 ლარი დაჯდა. ხოლო ასუსის კომპიუტერი კი 1435 ლარი. ცალკე შეისყიდეს 5 სამსუნგის ფირმის მონიტორები – ერთეულის ღირებულება 295 ლარად (5 ცალი 1475ლარი). ჯამში ძვირადღირებული კომპიუტერული ტექნიკისთვის 10 075 ლარი დაიხარჯა.
საკონსტიტუციო სასამართლომ მიმდინარე წლის ივლისის თვეშიც შეიძინა კომპიუტერი. ასუსის პლანშეტური ლეპტოპი 1600 ლარი დაჯდა. კიდევ ერთი პორტაბელური კომპიუტერი 5 მაისს შეიძინეს, ისიც 1600 ლარად.
მარტში კი საკანცელარიო საქონელის შესყიდვა განხორციელდა. 500 ცალი სხვადასხვა ფერის კალამი, 80 მარკერი, 200 ფანქარი, 50 კორექტორი, 100 ბაინდერი, 20 საკანცელარიო დანა, ქსეროქსის ქაღალდის 450 შევკრა, 5000 სავიზიტო ბარათი და 20 მაგიდის კალენდარი. – დაახლოებით 13 200 ლარი დაჯდა.
ცოტა ადრე, თებერვლის თვეში კი 10 990 ლარის ღირებულების სხვადასხვა ქონების შეძენა მოხდა შპს “ექბის” მიერ. ამ შესყიდვის დროს ლეპტოპის ჩანთაში 170 ლარი გადაიხადეს, ოთხ სისტემურ ბლოკში 3520 ლარი. ასევე შეიძინეს ტერაბაიტიანი და ნახევარტერაბაირიანი მყარი დისკი ჯამში ფასით 1055 ლარი.
საკონსტიტუციო სასამართლომ იანვრის თვეში ტენდერის გზით 153 540 ლარად შპს “უნიგრუპი”-ს საშუალებით შეიძინა საწვავი. სატენდერო დოკუმენტაციაში მითითებულია, რომ კომპანიის წლიური ბრუნვა 2007-08 წლებში 117 მილიონ ლარზე მეტია, ხოლო უშუალოდ 2010 წელს 35 მილიონ 900 ათასი.
საჯარო რეესტრის მიხედვით შპს “უნიგრუპი”-ს დირექტორი და დამფუძნებელი და 50 %-ის მფლობელი ვინმე გიორგი პირველია, ხოლო 50 % 2012 წლის 25 იანვარს სეიშენის კუნძულებზე რეგისტრირებული კომპანია “ნიულაით იუნაითიდ Ltd” ეკუთვნის. ასევე საჯარო რეესტრიდან ირკვევა, რომ ჯერ კიდევ 2010 წელს დეკემბერში კომპანიის 50%-ის მფლობელი ყოფილი თავდაცვის მინისტრი დავით კეზერაშვილი იყო.
წელს “უნიგრუპმა” პრემიუმ ავანგარდის ერთი ლიტრი საკონსტიტუციო სასამართლოს 2,16 ლარად მიყიდა. სასამართლომ წელს 52 500 ლიტრი პრემიუმ ავანგარდის და 18 000 ლიტრი ევროდიზელი შეიძინა მოახდინა. ჯამში საწვავში 152 540 ლარი იქნა გადახდილი.
საკონსტიტუციო სასამართლოს “უნიგრუპმა” მიაწოდა საწვავი 2011 წელსაც. მიმდინარე წლისგან განსხვავებით შარშან ტენდერში ორი კომპანია მონაწილეობდა. “ვისოლ ჯორჯია საქართველოს” “უნიგრუპმა” ტენდერი 300 ლარის სხვაობით მოუგო და საკონსტიტუციო სასამართლოსათვის საწვავის მიწოდების ხელშეკრულება 152 000 ლარზე გააფორმა.
2011 წლის ტენდერის თანახმად უნიგრუპმა ბულგარული წარმოების პრემიუმ საწვავი 2,05 ლარად შესთავაზა. 70 000 ლიტრი საწვავი ბიუჯეტს 143 500 ლარი დაუჯდა. ზუსტად იგივე ფასად მიჰყიდა ევრო დიზელიც. 6 000 ლიტრი 12 300 ლარად.
2013 წელს საკონსტიტუციო სასამართლოს დაფინანსება უცვლელი რჩება. მისი წლიური ბიუჯეტი 2 მილიონ 615 ათასი ლარია. საქართველოს კანონის “საქართველოს საკონსტიტუციო სასამართლოს წევრთა სოციალური დაცვის გარანტიების შესახებ” მოსამართლის ხელფასის შემცირება მისი უფლებამოსილების ვადის ამოწურვამდე დაუშვებელია. უფლებამოსილების ვადის გასვლის შემდეგ კი ენიშნება სახელმწიფო კომპენსაცია 1200 ლარის ოდენობით. კანონის მიხედვით სახელმწიფო ვალდებულია საკონსტიტუციო სასამართლოს წევრს შეუქმნას მოღვაწეობისა და ცხოვრების ღირსეული პირობები. მოსამართლეები სახელმწიფოს ხარჯზე ცხოვრების ღირსეულ პირობებს ამჯერად 4 ათას ლარიანი კომპიუტერებით, პლანშეტებით და სხვა თანამედროვე კომპიუტერული ტექნიკით შეიქმნიან.
