მიმდინარე წელს, ნაგავსაყრელების მოვლა-შენახვისთვის 1 მილიონი ლარი იყო გამოყოფილი. ამ მიზნით, ძველ ხელისუფლებას 2013 წლის ბიუჯეტშიც მილიონი ლარი ჰქონდა გათვალისწინებული. ახალმა მთავრობამ კი საკითხი შეისწავლა და გადაწყვიტა, რომ დაფინანსება გაზარდოს.
შპს “საქართველოს მყარი ნარჩენების მართვის კომპანიას”, რომელმაც ნაგავსაყრელების მოვლა-შენახვის სამუშაოები უნდა განახორციელოს, 2013 წელს სახელმწიფო ბიუჯეტიდან 12 მილიონი ლარი გამოეყოფა. “ნაგავსაყრელებზე არსებული მდგომარეობიდან გამომდინარე, 12 მილიონი ლარი, შესაძლოა, სასაცილო იყოს, მაგრამ გასულ წელთან შედარებით, დაფინანსება მნიშვნელოვნად არის გაზრდილი… როგორც ვიცით, ნაგავსაყრელების თემა და ზოგადად, გარემოს დაცვითი საკითხები საქართველოში პრიორიტეტული არ იყო. ახალი ხელისუფლება კი აცხადებს, რომ ნაგავსაყრელების საკითხის შესწავლა და ეტაპობრივად მოგვარება უნდა მოხდეს. პრობლემა მასშტაბურია და ერთ წელიწადში ვერ მოგვარდება, თუმცა გვინდა, რომ წელს მინიმალური ღონისძიებები მაინც განვახორციელოთ,” – განაცხადა რეგიონული განვითარებისა და ინფრასტრუქტურის მინისტრის მოადგილემ შოთა მურღულიამ ნაგავსაყრელების თემასთან დაკავშირებით სამინისტროში გამართულ შეხვედრაზე. დისკუსიაში მონაწილეობას ნაგავსაყრელების საკითხზე მომუშავე სახელმწიფო, არასამთავრობო და საერთაშორისო ორგანიზაციების წარმომადგენლები იღებდნენ. შპს “საქართველოს მყარი ნარჩენების მართვის კომპანიის” ხელმძღვანელობამ კი შეხვედრის მონაწილეებს 2013 წელს გასახორციელებელი საქმიანობის გეგმა გააცნო.
მყარი ნარჩენების კომპანია გასული წლის აპრილში ეკონომიკისა და მდგრადი განვითარების სამინისტრომ დაფუძნდა. კომპანიის 100 პროცენტიანი წილი, მართვის უფლებით, რეგიონული განვითარებისა და ინფრასტრუქტურის სამინისტროს გადაეცა. დაარსებიდან დღემდე, მყარი ნარჩენების კომპანია სტრატეგიაზე მუშაობს. 2013 წლის თებერვლის ბოლოსთვის, მას ქვეყნის მასშტაბით არსებული 58 ნაგავსაყრელი დაუკანონდება, რომლის შემდეგაც, საკუთრებაში არსებულ ტერიტორიებზე მოვლა-შენახვის სამუშაოების გახორციელებას დაიწყებს.
“2013 წელს ვაპირებთ 8 ნაგავსაყრელი მოვაწესრიგოთ, ესენია: თელავის, მცხეთის, გორის, ახალციხის, ქუთაისის, ამბროლაურის, ზუგდიდის და ოზურგეთის ნაგავსაყრელები. მოხდება ამ ტერიტორიებთან მისასვლელი გზების რეაბილიტაცია, საკონტროლო-გამშვები ჯიხურების მშენებლობა, ნაგავსაყრელებზე არსებული ნარჩენების მიწით გადაფარვა, სანიაღვრე სისტემის შექმნა და ნაგავსაყრელების შემოღობვა… ამ მიმართულებით არსებული პრობლემის მოსაგვარებლად, საქართველოს ისტორიაში პირველად, დაფინანსება 12-ჯერ იზრდება. 2013 წელს 12 მილიონი ლარი იქნება გამოყოფილი,” _ ამბობს “საქართველოს მყარი ნარჩენების მართვის კომპანიის” დირექტორი ნუგზარ კევლიშვილი.
