ისინი, ღვინის ქურდობის ბრალდებით, კიდევ ერთ თანამზრახველთან, ზაალ ზენაიშვილთან ერთად დააკავეს. როგორც ცინცაძისა და ხავთასის ოჯახის წევრები და ახლობლები აცხადებენ, პატიმრები ციხის რესპუბლიკურ საავადმყოფოში არიან გადაყვანილი. ისინი დანაშაულს არ აღიარებენ, პროტესტის ნიშნად შიმშილობენ და მათი ჯანმრთელობის მდგომარეობა უმძიმესია.
21 დეკემბერს, ლაშა ცინცაძის, ლაშა ხავთასის და ზაალ ზენაიშვილის სასამართლო პროცესი წარიმართა. ზაალ ზენაიშვილმა, ღვინის ქურდობის ფაქტი აღიარა და მოსამართლე გიორგი ზვიადაძემ სასამართლო სხდომიდან გაათავისუფლა. მოსამართლემ პროკურორის, მამუკა ნადირაძის შუამდგომლობა დააკმაყოფილა და ზენაიშვილს არ დაეკისრა გირაოს გადახდა. მას მხოლოდ 4-წლიანი პირობითი მსჯავრი დაედო.
ჯანმრთელობაშერყეული ლაშა ცინცაძე სასამართლო პროცესზე ინვალიდის ეტლით შემოიყვანეს ბადრაგებმა.
სასამართლო პროცესი, რომელსაც მოსამართლე ბიძინა სტურუა წარმართავდა, ახლობლების მღელვარების ფონზე მიმდინარეობდა. მოსამართლემ სასამართლო სხდომიდან ბოლო წუთებში გააძევა პატიმარი ლაშა ხავთასი, რომელსაც 100 ლარის გადახდაც კი დააკისრა. დარბაზი დაატოვებინეს პატიმრის დას _ ინეზა ხავთასსაც, მოსამართლისადმი დაუმორჩილებლობის გამო.
პროცესს ესწრებოდა მოწმე ნათელა ზენაიშვილი, რომელიც პროკურორის მამუკა ნადირაძის მიერ იყო წარმოდგენილი.
მოსამართლემ პატიმრებს არ მოუსმინა _ მათ სურდათ, ეთქვათ, რომ ისინი ციხეში შიმშილობენ.
ინეზა ხავთასი, ლაშა ხავთასის და: _ ძალიან ცუდ დღეში ვართ; მე, ბათუმში, ციხის წინ ვშიმშილობ, ჩემი ძმა კი _ ციხეში. ბიჭების ჯანმრთელობის მდგომარეობა საფრთხეშია; ექიმმა მითხრა, თუ ამათ შიმშილობა გააგრძელეს, ძალიან მალე ცუდი შედეგი დადგებაო. ჩემს ძმას გულისა და ფილტვების სისუსტე აქვს; ცინცაძეს, აქვს ტუბერკულოზი, სითხეც გამოუღეს… უდედმამო, უსახლკაროა; მასზე თავიდან იყო ლანჩხუთის პოლიცია გადაკიდებული, რამდენიმეჯერ იჯდა უკვე ციხეში; ახლაც, დანაშაული გავხსენითო _ პრემიები აიღეს ლანჩხუთის პოლიციაში ამათი დაჭერით. 20 ლიტრი ღვინის ქურდობისთვის გვამწარებენ! მივედი ბათუმში პროკურორ ლევან გზირიძესთან, რომელმაც დაურეკა ოზურგეთის პროკურორს კახა კოჩივარს და ასე მიმართა: _ ქართველი ხალხი არ ხართ და არ გრცხვენიათ, 20 ლიტრი ღვინის გამო, ბავშვებს 6 წელს როგორ უსჯით, გადახედეთ მაგ საქმესო!
_ რას ითხოვთ შიმშილობით?
_ გაათავისუფლონ ჩემი ძმა, რომელიც უდანაშაულოა. მომეხმარეთ ჟურნალისტებმა, ძალიან გთხოვთ _ ერთი ძმა გვყავს, სახლი არ გვაქვს, ვართ სოციალურად დაუცველები… ჩემი ძმა რომ ქურდი ყოფილიყო, 15 წელი ბათუმში ვცხოვრობთ, ნაქირავებში და ერთი პრობლემა არ შექმნია, ახლა მოიპარა და ისიც, ღვინო?! _ ამბობს ინეზა ხავთასი და ქურდობის ფაქტის შესახებ დეტალურად საუბრობს:
_ ჩემი ძმა ლანჩხუთში ჩავიდა ნათესავის – ლაშა ცინცაძის სანახავად, რომელიც ციხიდან ახალ გამოსული იყო. ზაალ ზენაიშვილი ლაშა ცინცაძის მეზობელია, რომელმაც ცინცაძე და ჩემი ძმა სახლში დაპატიჟა. დალიეს ღვინო, რომელიც ზენაიშვილს მოუპარავს. ზაალ ზენაიშვილმა თავდაპირველად თქვა, რომ მე ვიყავი მარტო, როცა ქურდობა მოხდაო; შემდეგ შეცვალა ჩვენება და თქვა, რომ ესენიც მახლდნენო.
სულ ლიტრანახევარი ღვინო დაულევიათ; ამის შემდეგ ჩემი ძმა და ლაშა პარკში წამოვიდნენ; ღვინო რომ მოეპარათ და დამნაშავეები ყოფილიყვნენ, პოლიციის წინ გამოჩნდებოდნენ?! ჭიანურდება პროცესი ექვსი თვეა, ხან გადადებენ, ხან გადმოდებენ.
პროკურორმა გვითხრა, თუ აღიარებს თქვენი ძმა დანაშაულს, კაცურ სიტყვას გაძლევთ, სასამართლო დარბაზიდან გავათავისუფლებო.
როცა ლაშა ცინცაძე დაიჭირეს, დაიბარეს ლანჩხუთის პოლიციაში მისი ძმა და დაემუქრნენ ტყეში წაგიყვანთ, გაგატყავებთ, თქვი, რომ შენმა ძმამ მოიპარა ღვინოო _ ასე ახდენდა ზეწოლას პოლიცია. შეეშინდა არასრულწლოვანს და მისცა ჩვენება კი მოიპარა ჩემმა ძმამო, მაგრამ მაშინვე წავიდა მამაოსთან ლანჩხუთში და მოუყვა ყველაფერს.
დავით მამალაძე, ლაშა ცინცაძის ადვოკატი: _ საშინელება ის არის, რომ ბრალდების მხარეს არავითარი მტკიცებულება არ გააჩნია, გარდა ზენაიშვილის ჩვენებებისა. შემდგომ სასამართლოზე დამტკიცდა, რომ ზენაიშვილმა მარტომ მოიპარა ეს ღვინო, მაგრამ რა ვიცი საპროცესო შეთანხმებაზე რა გააკეთეს _ დაპირდნენ რამეს, მოატყუეს, შეაშინეს?!
დამტკიცდა, რომ ზენაიშვილმა აღიარა დანაშაული და ის დღეს გაათავისუფლეს კიდეც. ღვინო მოპარულია _ ეს ფაქტია. მაგრამ ამათ არ მოუპარავთ, არც აღიარებენ და იმიტომაც უსჯიან 7 წლამდე პატიმრობას. ზენაიშვილმა შემდეგ შეცვალა ჩვენება და საპროცესო შეთანხმებით, ბრალდების მხარემ განამტკიცა თავისი მტკიცებულებები ხავთასისა და ცინცაძის საწინააღმდეგოდ.
მე, როგორც ადვოკატი, ამ საქმეში უძლური ვარ, სისხლის სამართლის საპროცესო კოდექსის 43-ე მუხლი ისეთი კაბალურია, პირდაპირ ბრალდების მხარეს აყენებს უპირატეს მდგომარეობაში. მე სასამართლო პირველ ინსტანციაში ჩავერთე ამ საქმეში და ფაქტობრივად, უძლური ვარ ახალი მტკიცებულებების წარმოდგენისთვის. ამ მუხლის გამო, 500 ლარიდან 5000 ლარამდეა ჯარიმა.
მზექალა ზოიძე, ლაშა ხავთასის ადვოკატი: _ დღევანდელი სასამართლო პროცესი წარიმართა კანონის უხეში დარღვევით _ პროკურორმა მამუკა ნადირაძემ მოიყვანა დაინტერესებული მხარე, მოწმე _ ზაალ ზენაიშვილის ბებია, რომელმაც თქვა, რომ ფაქტი, რასაც სახელმწიფო ბრალმდებელი ედავება 177-ე მუხლის მე-2 და მე- 3 ნაწილებით, ბრალდებულებს ზაალ ზენაიშვილს, ლაშა ხავთასს და ლაშა ცინცაძეს, მართალია. სახელმწიფო ბრალმდებელმა გაუკეთა აღიარებითი ჩვენების საფუძველზე საპროცესო შეთანხმება, მობილიზება გააკეთა და საქმე იქეთ წაიყვანა, რომ უდანაშაულო ბიჭები ჩასვა საპყრობილეში.
_ რა მოლოდინი გაქვთ, თქვენი აზრით, როგორ განვითარდება პროცესები?
_ წინასწარ ვერაფერს გეტყვით, თუმცა, დარწმუნებული ვარ, სახელმწიფო ბრალდებისგან იქნება ზეწოლა სხვა დანარჩენ მოწმეებზე, რათა თავისი ბრალდება განამტკიცოს და მიესაჯოს უდანაშაულო ბიჭებს 4-დან 7 წლამდე პატიმრობა.
კობა ესაძე, ზაალ ზენაიშვილის ადვოკატი, ” გურია ნიუსთან” ადასტურებს იმ ფაქტს, რომ მისი დაცვის ქვეშ მყოფმა პირმა, ჩვენება რამდენჯერმე შეცვალა: _ მართლა ასე იყო, მან შეცვალა ჩვენება. თავდაპირველად თქვა, რომ სამივე იყვნენ ერთად, როცა ქურდობა ჩაიდინეს, რის საფუძველზეც დაიჭირეს ცინცაძე და ხავთასი. შემდეგ, როგორც ჩანს, მასზე მოხდა ზეწოლა ამათაგან, რომ მას აეღო ეს თავის თავზე მარტოს და ასეც გააკეთა; თუმცა, შემდეგ ისიც შეცვალა და აღიარა, რომ სამთავე იყვნენ ერთად ქურდობის პროცესში. ყველაფერი ჩატარდა კანონის სრული დაცვით, ამას ვაღიარებ; რაც მთავარია, მან თავისუფლება მიიღო.
” გურია ნიუსმა” , აღნიშნულ საქმეზე კომენტარი თხოვა სახელმწიფო ზედამხედველს მამუკა ნადირაძეს, რომელმაც კომენტარზე უარი განაცხადა.
ორივე პატიმარი სოციალურად დაუცველი ოჯახიდანაა. ლაშა ცინცაძემ 5-წლიანი პატიმრობა მოიხადა. ციხეში იგი ტუბერკულოზით დაავადდა და სასჯელის ნახევარზე მეტი, მძიმე დიაგნოზით, ქსნის იზოლატორში გაატარა.
ახლობლების თქმით, როცა 2012 წლის 23 ივნისს, ლაშა ცინცაძე ლანჩხუთის პოლიციის სამმართველოს განყოფილების თანამშრომლებმა ხელმეორედ დააპატიმრეს, პოლიციის განყოფილებიდან ციხეში სასწრაფო დახმარების მანქანით გადაიყვანეს. პატიმრის ოჯახი ლაშა ცინცაძის ცემაში ლანჩხუთის პოლიციის თანამშრომელს, ლაშა ჩხაიძეს ადანაშაულებს: “ისე იყო ნაცემი, ფეხზე ვერ დგებოდა. ეტყობა, ცემის გამო, ხერხემალი დაუზიანდა და სასწრაფო სამედიცინო დახმარების გამოძახება გახდა საჭირო. ჯერ ერთი, ცრუ ჩვენების გამო დაიჭირეს ჩემი ძმა, მერე არაადამიანურად აწამეს და სამუდამოდ შეურყიეს ჯანმრთელობა,” _ ამბობს ” გურია ნიუსთან” პატიმრის და, ლიკა ცინცაძე.
ცინცაძეების ოჯახი უმძიმეს პირობებში ცხოვრობს. ლანჩხუთის მუნიციპალიტეტის გამგეობამ, გია გოგუაძის გამგებლობის პერიოდში, მათ საცხოვრებელი ფართის უქონლობის გამო, ე. წ. მეურნეობის კორპუსში ერთოთახიანი ბინა გამოუყო. თუმცა, ამ ბინაში მრავალსულიანი ოჯახის და ბავშვების ცხოვრება წარმოუდგენელია _ არ არის ელექტროენერგია, წყალი, სველი წერტილები. ოჯახში მცირეწლოვანი ბავშვი ცხოვრობს, აივანს კი მოაჯირებიც არ აქვს და გამუდმებით არსებობს ბავშვის გადავარდნის რისკი.
ოჯახის ერთადერთი შემოსავალი სოციალური დახმარებაა, რომელიც ხუთსულიანი ოჯახისთვის რამდენიმე დღის სამყოფი პურის ფულია. როგორ უნდა შეინახოს ასეთ მდგომარეობაში მყოფმა სოციალურად დაუცველმა ოჯახმა ავადმყოფი პატიმარი, ძნელი წარმოსადგენია.
მათი თქმით, ლანჩხუთის მაჟორიტარი დეპუტატობის კანდიდატი, გიორგი გოგუაძე წინასაარჩევნოდ ყოფითი პრობლემების მოწესრიგებას ჰპირდებოდა ოჯახს, რომლის წევრები ხანშიშესული, ავადმყოფი ბებია და მცირეწლოვანი ბავშვები არიან. ეს დაპირებები დაპირებებად დარჩა, ისინი კი კვლავ უმძიმეს მდგომარეობაში იმყოფებიან.
სასოწარკვეთილებამდე მისული პატიმრის ოჯახის წევრებისთვის ბოლო იმედად სახალხო დამცველის აპარატი რჩება. ცინცაძის და ხავთასის ჯანმრთელობის მდგომარეობა ძალიან რთულია. პატიმრების ოჯახის წევრები დახმარებას ითხოვენ.
ოზურგეთის რაიონული პროკურორი კახა კოჩივარი ამ საქმესთან დაკავშირებით ” გურია ნიუსთან” კომენტარს აკეთებს: _ აღნიშნულ საქმესთან დაკავშირებით, სასამართლოში მიმდინარეობს საქმის არსებითი განხილვა, რადგან ლაშა ხავთასმა უარი განუცხადა გამოძიებას და სასამართლოს თანამშრომლობაზე და არ აღიარებს დანაშაულს. თუმცა, თავდაპირველად, გამოძიების პროცესში აღიარებდა, მიღწეული იყო საპროცესო შეთანხმება, ფორმდებოდა, ხელიც ჰქონდა მოწერილი… რამდენიმე დღის წინ სასამართლო პროცესზე უარი განაცხადა საპროცესო შეთანხმების დამტკიცებაზე. ამის გამო, კანონის შესაბამისად, საქმე განიხილება არსებითი განხილვით. დაიკითხება სასამართლოზე ყველა მოწმე და ამის შემდგომ მიიღებს სასამართლო გადაწყვეტილებას.
_ ბატონო, კახა რამდენად შეიძლება პატიმარმა შეცვალოს ჩვენება?
_ კი, ამის უფლება აქვთ, თუმცა საბოლოო ჩვენებას ეყრდნობა სასამართლო.
_ ხართ თუ არა საქმის კურსში, რომ როგორც პატიმარი ცინცაძის ოჯახის წევრები აცხადებენ, მასზე პოლიციაში ახდენდნენ ზეწოლას, ის ცემეს კიდეც, როცა დაიჭირეს.
_ ამის შესახებ ცინცაძეს არ მოუმართავს, არ პოლიციისთვის, არც ჩვენთვის, არც სასჯელაღსრულების დაწესებულებაში განუცხადებია ამ 6 თვის განმავლობაში.
_ ბატონო კახა, იცით თუ არა, რომ პატიმრები შიმშილობენ, მათი ჯანმრთელობის მდგომარეობა მძიმეა და არ აპირებენ შიმშილობის შეწვეტას?
_ არც ამის შესახებ უცნობებია ჩემთვის ვინმეს. ჩემი თხოვნა იქნება, რომ ჩვეულებრივად გაყვნენ სასამართლო პროცესს, შიმშილობა კარგს არაფერს მოიტანს, ეს ძალიან ცუდი იქნება.
_ ბრალის არაღიარების შემთხვევაში, მათ მიესჯებათ 4-დან 7 წლამდე პატიმრობა?
_ ამას უკვე სასამართლო გადაწყვეტს.
_ როგორც ვიცით, თქვენ დაგიკავშირდათ ბათუმის პროკურორი ლევან გზირიძე და ამ საქმის გადახედვა გთხოვათ…
_ კი, ბატონო, იყო ეს ფაქტიც. ყველაფერი კანონის ფარგლებში მიმდინარეობს.
