და ყველა დაინტერესებული პირისთვის ხელმისაწვდომი გახადოს მის დაქვემდებარებაში მყოფი ფონდების მიერ, წლების განმავლობაში, თბილისის მერიაში წარდგენილი ანგარიშები. 2008-2012 წლებში პრეზიდენტის სარეზერვო და საქართველოს რეგიონებში გასახორციელებელი პროექტების ფონდებიდან თბილისის მერიას 130 მილიონ ლარამდე გადაერიცხა. პრეზიდენტის გასაიდუმლოებული განკარგულებების მოსაპოვებლად, ორგანიზაციამ არაერთი სასამართლო პროცესი წააგო.
”პრეზიდენტის განკარგულებების მოპოვებასთან დაკავშირებით სერიოზული პრობლემები შეიქმნა. საქართველოს პრეზიდენტის ადმინისტრაცია გამუდმებით აღნიშნავდა, რომ განკარგულებები, რომლითაც 40 მილიონი გადაირიცხა პრეზიდენტის ფონდიდან, წარმოადგენდა საიდუმლო ინფორმაციას, თუმცა სასამართლო პროცესზე მას არ დაუდასტურებია რა ტიპის საიდუმლო იყო ან ვის მიერ გასაიდუმლოვდა. აღმოჩნდა, რომ ინფორმაცია, რომელიც ახლახან მოვიპოვეთ ფინანსთა სამინისტროს საშუალებით, შეუძლებელია ყოფილიყო საიდუმლო, უბრალოდ, პრეზიდენტის ადმინისტრაციამ არ ისურვა ამ ინფორმაციის გამჟღავნება”, _ ამბობს ახალგაზრდა იურისტთა ასოციაციის წარმომადგენელი სულხან ცაბაძე.
საია-მ მოიპოვა საქართველოს პრეზიდენტის 2009 წლის განკარგულებების ის ნაწილი, რომელიც, პრეზიდენტის ადმინისტრაციის ინფორმაციით, საიდუმლოს წარმოადგენდა, თუმცა არც საია-სთვის და არც სასამართლოსთვის პრეზიდენტის ადმინისტრაციას არ წარმოუდგენია განკარგულებების საიდუმლოდ მიჩნევის დამადასტურებელი რაიმე სახის დოკუმენტაცია. სამართლებრივი აქტების შესწავლის შედეგად ირკვევა, რომ უშუალოდ ძველი ქალაქის რეაბილიტაციისა და განვითარების ფონდსა და თბილისის განვითარების ფონდს 2008-2012 წლებში, სახელმწიფო ბიუჯეტით გათვალისწინებული ორი ფონდიდან, ჯამში, სულ 129,980,893 ლარი გადაერიცხათ. საიდანაც საქართველოს პრეზიდენტის სარეზერვო ფონდიდან გამოყოფილი 47,102,000 ლარის უშუალო ადრესატი ძველი ქალაქის რეაბილიტაციისა და განვითარების ფონდი იყო. ხოლო საქართველოს მთავრობის განკარგულებების საფუძველზე, გაცილებით მეტი – 82,878,893 ლარი თბილისის განვითარების ფონდს გადაერიცხა (მათ შორის, მარტო ერთი განკარგულებით – 70 მილიონი ლარი). თბილისის განვითარების ფონდმა თანხები საქართველოს რეგიონებში გასახორციელებელი პროექტების ფონდიდან მიიღო.
გარდა თბილისის მთავრობის მიერ დაფუძნებულ ფონდებში გადარიცხული თანხებისა, თბილისის ისტორიული ნაწილების რეაბილიტაციის მიზნით თანხები გადაერიცხა ასევე ქ. თბილისის მერიასაც. კერძოდ, საქართველოს პრეზიდენტის სარეზერვო ფონდიდან თბილისის მერიამ მარტო 2010 წელს 6,000,000 ლარი მიიღო. ხოლო იმავე თბილისის მერიას, თბილისში რიყის ტერიტორიის სამუშაოების დაფინანსების მიზნით, საქართველოს რეგიონებში გასახორციელებელი პროექტების ფონდიდან საქართველოს მთავრობამ 14,700,000 ლარი გადაურიცხა.
საია-ს საყურადღებოდ მიაჩნია ისე გარემოებები, რომ მიუხედავად სახელმწიფო ბიუჯეტებით გათვალისწინებული სახსრებიდან ფონდებში გადარიცხული მასშტაბური მოცულობის თანხებისა:
თბილისის მთავრობის მიერ დაფუძნებული ფონდების მხრიდან არ ხდებოდა სახელმწიფო შესყიდვების შესახებ კანონმდებლობის გამოყენება, რაც ხელს უწყობდა აღნიშნული თანხების გაუმჭვირვალედ ხარჯვას;
თანხების სახელმწიფო შესყიდვების კანონმდებლობის გვერდის ავლით ხარჯვა კიდევ უფრო ზრდიდა აღნიშნული თანხების ხარჯვის დროს შესაძლო კორუფციული სქემების გამოყენების ალბათობას;
საზოგადოებისათვის დღემდე არ არის ცნობილი, თუ როგორ და რა ფორმით ხდებოდა თბილისის მთავრობის მიერ დაფუძნებული ფონდების მხრიდან გახორციელებული სამუშაოების შესრულების მიზნით შესაბამისი კომპანიების შერჩევა;
ამასთან, თბილისის მერიას დღემდე არ გაუსაჯაროებია ფონდების მიერ გაწეული საქმიანობის შესახებ ყოველწლიურად თბილისის მერიაში წარდგენილი ანგარიშები, რაც კიდევ უფრო ზრდის საბიუჯეტო სახსრებიდან მიღებული თანხების კანონის მოთხოვნათა შესაძლო დარღვევით ხარჯვის შესაძლებლობას.
