ოზურგეთის მუნიციპალიტეტის ხელმძღვანელობამ ახალი “აქცია” _ სკვერების გაყიდვა-გასხვისება წამოიწყო. ნაკვეთი გასხვისდა ექვთიმე თაყაიშვილის ქუჩაზე მდებარე “ვარდების რევოლუციის სკვერში”, სადაც ნაკურთხი ჯვარი აიღეს და მშენებლობა დაიწყეს. იმ ნაკვეთის პრივატიზების შესახებ გადაწყვეტილება კი, სადაც ეგნატე ნინოშვილის ძეგლი დგას, ოზურგეთის მუნიციპალიტეტის საკრებულომ რამდენიმე დღის წინ მიიღო.
_ ოზურგეთის მუნიციპალიტეტის გამგეობას, ქალაქის განაშენიანებისა და კეთილმოწყობის გაუმჯობესების მიზნით, მიზანშეწონილად მიაჩნია, პრივატიზაციის წესით გასხვისდეს ეგნატე ნინოშვილის ქუჩაზე 298 კვადრატული მეტრი მიწის ნაკვეთი. გამგეობის მოსაზრებით, მიწა უნდა გასხვისდეს პირობით, რომ აშენდეს თანამედროვე ტიპის საზოგადოებრივი დანიშნულების შენობა, კაფე-ბარი, მარკეტი და ასე შემდეგ. გამგეობამ წარმოადგინა ლამაზი და კარგი პროექტი. რომლის თანახმადაც, იქაურობა აბსოლუტურად შეიცვლება. ამავე დროს, პირობა არის ჩადებული, რომ ეგნატე ნინოშვილის ძეგლი გადავიტანოთ სხვა ადგილზე, რათა გურული კლასიკოსი მწერალი მომავალში უგულებელყოფილი არ დარჩეს _ ეს არ გვეკადრება. უკვე შერჩეულია ორი სავარაუდო ადგილი და შეიძლება, მესამეც გამოჩნდეს, მაგრამ ვიტყვი, რომ ეს ლამაზი შენობა ნამდვილად დაამშვენებს იქაურობას და გმირთა მოედანს, _ ეს განცხადება ოზურგეთის მუნიციპალიტეტის ინფრასტრუქტურის განვითარების კომისიის თავმჯდომარემ, თამაზ სალუქვაძემ, 2 მარტს, ოზურგეთის მუნიციპალიტეტის საკრებულოს სხდომაზე გააკეთა.
ფრაქცია “ქრისტიან-დემოკრატების” ლიდერი კახა ღლონტი დაინტერესდა, მხოლოდ ის ტერიტორია უნდა გასხვიდეს, სადაც ძეგლი დგას თუ მიმდებარე ტერიტორიაც.
სალუქვაძემ დაუკონკრეტა, რომ გასხვისდება მხოლოდ ის ტერიტორია, სადაც ნინოშვილის ძეგლი დგას, სადაც მისივე თქმით, უსუფთაობა და კარტის თამაშია. დეპუტატებზე ვიზუალური ეფექტის მოხდენის მიზნით, მან კაფე-ბარის პროექტის ფოტომასალაც დაარიგა.
_ რაღაც, აღარაა ახლა ბიუსტები მოდაში და უნდა მოხდეს რაიმე კარგი მემორიალის აშენება, _ თქვა სალუქვაძემ. საგულისხმოა, რომ მიწის ნაკვეთის გასხვისება და ფოტომასალის წარმოდგენა ერთსა და იმავე სხდომაზე მოხდა.
საკრებულოს თავმჯდომარის ალეკო მამეშვილის აზრით, “ის ტერიტორია, სადაც პსპ-ს კლინიკა-აფთიაქის მშენებლობა მიმდინარეობს და რომლის გარშემოც ამდენი მითქმა-მოთქმა იყო, წარმოიდგინეთ, სამომავლოდ როგორ დაამშვენებს ქალაქის იერსახეს: _ ყველამ ვიცით ახლა იმ ადგილზე რა ხდება (საუბარია იმ სკვერზე, სადაც ეგნატეს ბიუსტი დგას. შ. ღ.) _ შეურაცხყოფილია ის ადგილი. თუ გალამაზდება, მივესალმები, მაგრამ ჩემი მოთხოვნაა, ამ ქუჩაზევე დაიდგას ეგნატე ნინოშვილის ბიუსტი, _ თქვა მამეშვილმა.
ეს საკითხი საკრებულოს სხდომაზე არც ოპოზიციური პარტიის წევრებს, არც არასამთავრობო ორგანიზაციის წარმომადგენლებს და ოზურგეთის მაჟორიტარ დეპუტატს გოჩა შანიძეს არ გაუპროტესტებიათ.
“სასწრაფოდ აღიკვეთოს საქართველოს დასახლებულ პუნქტებში გამწვანების ზონების, პარკების, ბაღებისა და სკვერების ხელყოფა, მათი საზღვრების ფარგლებში და მიმდებარე ტერიტორიებზე”, _ ვკითხულობთ საქართველოს პარლამენტის მიერ 1998 წლის 17 ივლისს მიღებულ დადგენილებაში.
აქვეა მითითებული, რომ საქართველოს პარკებში, ბაღებსა და სკვერებში, სადაც უკანონოდ აშენდა ან შენდება მათთვის შეუფერებელი ფუნქციის მქონე ნაგებობები, მკაცრად დაისვას იმ თანამდებობის პირთა პასუხისმგებლობის საკითხი, რომლებმაც გასცეს ბაღ-პარკების (განსაკუთრებით, კულტურის ძეგლთა კატეგორიის) ტერიტორიებზე ფართობების გამოყოფის ნებართვა მშენებლობებისა და სხვა მიზნით.
თუმცა, აქაც არის გამოსავალი _ ეს გადაწყვეტილება შევარდნაძის ავადმოსაგონარი ეპოქის პარლამენტმა მიიღო, მერე რა, რომ ის პარლამენტი დღევანდელი ნაციონალებით იყო სავსე!
