ქვემო ქართლელი ახალგაზრდა ირაკლი ოქრუაშვილის კადრად სახელდებოდა და ამბობდნენ, რომ “ოქროს ბიჭის” გავლენით, მაღალ თანამდებობაზე 2007 წელს უნდა დანიშნულიყო, თუმცა, მოვლენები მის სასიკეთოდ არ განვითარდა და ოქრუაშვილმა სააკაშვილის მთავრობა დატოვა. შესაბამისად, ფერსაშვილიც “უპატრონოდ” დარჩა, მაგრამ, როგორც აღმოჩნდა, დიდხანს _ არა. როგორც გვითხრეს, მან “პატრონის მონახვა” ადვილად მოახერხა და სამაშველო სამსახურიდან, ტრასის პატრულის სამმართველოს უფროსად გადაიყვანეს. სწორედ ამის შემდეგ დაიწყო მისი პოლიციური კარიერის აღმასვლა.
ფერსაშვილის დაწინაურებაში დიდი წვლილი აქვს შეტანილი გურიის სამხარეო პოლიციის მთავარი სამმართველოს ყოფილ უფროსს, ბესო გელენიძეს. თუმცა, როგორც გვითხრეს, მანამდე ფერსაშვილმა სერიოზული გამოცდა ჩააბარა. უფრო დაზუსტებით კი, სწორედ გოჩა ფერსაშვილს დაევალა დამატებითი ძალების ჩაყვანა 7 ნოემბრის აქციაზე. ამასთან ერთად, ფერსაშვილს და მის რაზმს ოზურგეთელი ოპოზიციონერებისთვის “ჭკუის სწავლებაც” დაავალეს. “ჭკუანასწავლებს” შორის კი, როგორც წყარო ამბობს, ოზურგეთის მუნიციპალიტეტის გამგებლის მოვალეობის ამჟამინდელი შემსრულებელი კოტე შარაშინიძეც იყო.
_ აქციაზე ჩემი მანქანით მივდიოდი. მაშინ პოლიციის სამმართველო რუსთაველის ქუჩის ბოლოში იყო. დამირეკეს და გამაფრთხილეს, რომ პოლიცია მითვალთვალებდა. სამმართველოს გადასახვევთან გავაჩერე მანქანა და შემოვლითი გზით, ფეხით წავედი. როგორც მოგვიანებით მითხრეს, დიდხანს მითვალთვალებდნენ და რომ არ გამოვედი, მანქანა სრულად დალეწეს, _ იხსენებს ჩვენთან საუბრისას შარაშენიძე.
გამგებლის მოვალეობის შემსრულებელი ამბობს, რომ დამნაშავეების ვინაობა მისთვის უცნობია, თუმცა, აღნიშნავს, რომ დალეწილ მანქანაში მეორე დღეს “დუბინკა” იპოვეს: _ როგორც მოგვიანებით მითხრეს, მეორე დღეს პოლიციელები მისულან იმ ოჯახში, სადაც ჩემი მანქანა ეყენა და “დუბინკა” მოუთხოვიათ _ ბალანსზე გვაწერია და უნდა წავიღოთო, _ დასძინა შარაშენიძემ, რომელიც მიიჩნევს, რომ ახლა ამ საქმის გამოძიებას აზრი არ აქვს.
შარაშენიძისგან მკვეთრად განსხვავებული მოსაზრებები აქვთ იმ ადამიანებს, რომლებიც 7 ნოემბრის აქციების დროს თბილისში იმყოფებოდნენ და პოლიციელთა “დუბინკების” სიმწარე საკუთარ მხრებზე იწვნიეს.
ერთ-ერთი მათგანი, რომლის ვინაობას ჩვენ მისივე თხოვნით არ ვასახელებთ, ჩვენთან საუბრისას იხსენებს, თუ როგორ ჩამოვიდა გურულების კოლონა რუსთაველზე:
_ ყველა პოლიციელს კარგად ვიცნობ. მახსოვს, 7 ნოემბერს, გამთენიისას, ორი ავტობუსი შემოვიდა რუსთაველზე. ორივეში გურული პოლიციელები ისხდნენ. უმრავლესობას ნიღაბი არ ეკეთა. მათ შორის იყო გოჩა ფერსაშვილიც. დაზუსტებით ვერ გეტყვით, მიიღეს თუ არა ამ ადამიანებმა ხალხის ცემასა და დასახიჩრებაში მონაწილეობა, მაგრამ იქ რომ იყვნენ, საკუთარი თვალით ვნახე. იმ მოვლენებიდან გამომდინარე კი, რაც იმ დღეს თბილისში განვითარდა, სულაც არ არის იმის ვარაუდი რთული, რომ გურულებიც ისე მხეცებივით დაერივნენ აქციის მონაწილეებს, როგორც სხვები, _ ამბობს ჩვენი რესპონდენტი და დასძენს, რომ ამ თემით გამოძიება აუცილებლად უნდა დაინტერესდეს:
_ ვისაც 7 ნოემბერი საკუთარ თავზე არ გადაუტანია, მისთვის შეიძლება ამის გახსენება სულაც არ იყოს რთული. მაგრამ მე იქ ვიყავი და ჩემი თვალით მაქვს ნანახი ყველაფერი. შეიძლება თქვათ, რომ პოლიციელები ბრძანებას ასრულებდნენ, მაგრამ რაც არ უნდა ბრძანება იყოს, არ შეიძლება ადამიანმა ადამიანი ისე გაიმეტოს, როგორც ისინი იქცეოდნენ. უნდა გენახათ, როგორი ანთებული თვალები ჰქონდათ პოლიციელებს, როგორ გამეტებით ურტყამდნენ ადამიანებს. ყოველ კუთხეში, სადაც კი წაასწრებდნენ, ჯგუფ-ჯგუფად მივარდებოდნენ და სცემდნენ, აგინებდნენ, აფურთხებდნენ. როგორ შეიძლება, რომ ისინი არ დაისაჯონ?! _ აღნიშნავს ჩვენი რესპონდენტი.
ოზურგეთელი ოპოზიციონერი, ლელა ნაცვალაძე “გურია ნიუსთან” საუბრისას 2007 წლის 7 ნოემბრის პერიოდს ასე იხსენებს:
_ პოლიციელებს ნამდვილად არ ვიცნობ და კონკრეტული გვარ-სახელებით არ შემიძლია ჩამოგითვალოთ, მაგრამ ნამდვილად ვიცი, რომ 7 ნოემბერს თბილისში იყვნენ. ისიც კარგად მახსოვს, როგორ აჩერებდნენ თბილისში წასასვლელ მიკროავტობუსებს, როგორ მიჰყავდათ მძღოლები დაკითხვაზე. არ შეიძლება ეს ყველაფერი დაგავიწყდეს, _ აღნიშნავს ნაცვალაძე.
მისივე თქმით, გურული პოლიციელები 21 მაისს, აჭარის აქციებზეც მრავლად იყვნენ და თბილისში, 26 მაისის სისხლიან დღესაც.
მართალია, ნაცვალაძემ ამ ადამიანების ვინაობა არ იცის, მაგრამ პოლიციის ერთ-ერთი ყოფილი გურული მაღალჩინოსანი, რომელიც 7 ნოემბრის და 26 მაისის აქციებში იღებდა მონაწილეობას, ამბობს, რომ ორივე აქციაზე გოჩა ფერსაშვილი და მისი ე. წ. “რაზმი”, რომლის შემადგენლობა 14 ადამიანს შეადგენდა და რომელთა უმრავლესობა დღესაც პოლიციაში მუშაობს (ჩვენ შეგნებულად არ ვასახელებთ მათ ვინაობას) აქციის მონაწილეებს სასტიკად უსწორდებოდა.
თავად ფერსაშვილი, ჩვენს კითხვებს არ პასუხობს და ამბობს, რომ არ იცის, იღებდა თუ არა მონაწილეობას 7 ნოემბრის და 26 მაისის აქციების დარბევაში. არც ის იცის, ჰყავდა თუ არა შექმნილი ე. წ. “სპეცრაზმი”, რომელიც ოპოზიციონერებს დასდევდა და არც ის, ვისი ლობირების დამსახურებაა, რომ არჩევნების შემდეგ (აღსანიშნავია, რომ ფერსაშვილი ოქტომბრის არჩევნებში “ნაციონალების” გასამარჯვებლად ძალებს არ ზოგავდა) სამმართველოს უფროსის მოადგილედ დაინიშნა.
ფერსაშვილი ასევე “არ ვიცი, პასუხის გაცემა არ შემიძლია”-თი პასუხობს ჩვენს კითხვას _ აქვს თუ არა მის დაწინაურებაში მონაწილეობა მიღებული პრემიერ-მინისტრის ძმას, ადიკო ივანიშვილს, რომელიც, როგორც ამბობენ, გურიის საკადრო პოლიტიკას განსაზღვრავს.
ადიკო ივანიშვილი “გურია ნიუსთან” საუბრისას ამბობს, რომ პოლიტიკაში მას შემდეგ აღარ ერევა, რაც მისმა ძმამ ამის შესახებ საჯაროდ გააფრთხილა:
_ ბატონო ადიკო, როგორც გვეუბნებიან ძალოვან სტრუქტურებში თანამდებობაზე დასანიშნ კადრებს თქვენთან არჩევენ…
_ როგორ გეკადრებათ, მე პოლიტიკასთან არანაირი საქმე არ მაქვს. მე არ ვეხები და მაგათთან არანაირი ურთიერთობა არ მაქვს.
_ გვითხრეს, რომ გოჩა ფერსაშვილს, სამმართველოს უფროსის მოადგილის პოსტზე უშუალოდ თქვენ გაუწიეთ რეკომენდაცია…
_ სულ არ ვიცნობ. თუ მენახოს, კაცი არ ვიყო.
_ ბატონო ადიკო, საკმაოდ სარწმუნო წყარომ გვაცნობა, რომ გურიის სამხარეო პოლიციის მთავარი სამმართველოს ყოფილი უფროსი, გურამ ჩანტლაძე, რომელიც არჩევნების შემდეგ თანამდებობაზე დატოვეს, თქვენი დამსახურებით გაუშვეს სისტემიდან და ამის მიზეზი ის იყო, რომ სწორედ ჩანტლაძე უწევდა ორგანიზებას თქვენი შვილისთვის ფარული ჩანაწერის გაკეთებას.
_ არაფერ შუაში არ ვარ მე. შეცდომაში შეჰყავხართ ვიღაცას.
_ გინდათ გვითხრათ, რომ ძალოვნების საქმეში არ ერევით?
_ რა თქმა უნდა. არც ძალოვნების და საერთოდაც, პოლიტიკაში არ ვერევი.
_ არადა, ერეოდით. სწორედ თქვენი კანდიდატურა იყო კოტე შარაშენიძე…
_ ვინ გითხრათ?
_ ეს ინფორმაცია თქვენ დამიდასტურეთ ერთ-ერთ ინტერვიუში…
_ კოტეს კანდიდატურა ჩემ მიერ წარდგენილი იყო “ქართულ ოცნებაში” შტაბის უფროსად. ეს ასე იყო ნამდვილად.
_ და ახლა გინდათ დაგვარწმუნოთ, რომ არჩევნების შემდეგ თქვენ არ ერევით საკადრო პოლიტიკაში?
_ არჩევნების შემდეგ კოტე არც მინახავს.
_ კოტეს ნახვას არ ვგულისხმობ… კადრების შერჩევაში მონაწილეობას იღებთ?
_ არა, რა თქმა უნდა…
_ ეს მას შემდეგ მოხდა, რაც ჩოხატაურში სტუმრობისას თქვენმა ძმამ საჯაროდ გაგაფრთხილათ, რომ პოლიტიკაში არ უნდა ჩარეულიყავით?
_ ხომ გახსოვთ, ეს რომ მითხრა, არ ჩაერიო და საერთოდ დაანებე თავი პოლიტიკასო? იმის მერე თავს ვარიდებ მაგ ამბავს. რად მინდა ახლა მე ვინმეს თავი ვატკინო მაგისთვის. პოლიტიკა უჩემოდაც გავა ფონს. მე ჩემი საქმე მაქვს _ მშენებლობას ვკურირებ აქ. იცოდეთ, მე რასაც გეუბნებით, “ფაიზაღია” ყველაფერი, _ გვითხრა ადიკო ივანიშვილმა.
