ამ განცხადებით აფხაზეთის დე ფაქტო პრეზიდენტი ალექსანდრე ანქვაბი საქართველოს პრემიერ მინისტრის ბიძინა ივანიშვილის განცხადებას გამოეხმაურა, რომელიც რუსეთისა და სამხრეთ კავკასიის შორის სარკინიგზო მიმოსვლის აღდგენის აუცილებლობას ეხებოდა. სტატიას ამის შესახებ ”ნეზავისიმაის გაზეტა” ავრცელებს.
ანქვაბის განცხადებით, თუკი კონკრეტული შეთავაზებები იქნება, ”დავსხდებით და ერთობლივად განვიხილავთ, ჯერჯერობით კი სასაუბრო არაფერია”.
გამოცემა აღნიშნავს, რომ “სარკინიგზო მიმოსვლის აღდგენის წინადადება აფხაზურმა მხარემ გასული წლის ოქტომბერში, ”ქართული ოცნების” ხელისუფლებაში მოსვლისთანავე მიიღო. სახელმწიფო მინისტრმა იმ პროექტებს შორის, რომელიც ქართულ და აფხაზურ მხარეებს შეეძლოთ ერთობლივად განეხორციელებინათ, ყველაზე აქტიურად სწორედ რკინიგზის საკითხი მოიაზრებოდა. თუმცა, აფხაზმა ჩინოვნიკებმა მაშინ ეს წინადადება კატეგორიულად უარყვეს. პროექტი იმ დროს არ შეესაბამებოდა მათ ეროვნულ ინტერესებს”.
“დღეს კი რიტორიკა შეიცვალა. ანქვაბის თქმით, _ იუწყება ”ნეზავისამაია გაზეტა”, _ აფხაზეთის რკინიგზის აღდგენით ბევრი რეგიონული მოთამაშეა დაინტერესებული: “მე ბუნდოვნად წარმომიდგენია, თუ როგორ მოხერხდება ეს. საბჭოთა ეპოქაში ამიერკავკასიის აფხაზეთის რკინიგზა რეგიონში შემოსული ტვირთის 15 პროცენტს ატარებდა. იმ დროს სატვირთო და სამგზავრო მატარებლებით ეს ხაზი ძალიან დატვირთული იყო. დღეს რთულია რაიმეს თქმა. საჭიროს სპეციალისტებმა შეისწავლონ, თუ რას მიიღებს ამით აფხაზეთი და რა მიზნები ამოძრავებთ პროცესში ჩართულ მხარეებს,” – აცხადებს ანქვაბი”.
”ნეზავისამაია გაზეტა”-ს მიმომხილველის აზრით, “ანქვაბის სკეპტიციზმი შესაძლოა აფხაზეთის რკინიგზის ცუდ მდგომარეობის შედეგიც იყოს, რომელიც დღეისათვის მძიმე მდგომარეობაშია. ფაქტიურად ოჩამჩირის შემდეგ ენგურისაკენ რკინიგზის ხაზი არ არსებობს, აღდგენა კი დაახლოებით მილიარდიან დაბანდებას მოითხოვს”.
ბიძინა ივანიშვილმა, რამდენიმე დღის წინ, სომხეთში სტუმრობისას განაცხადა, რომ აფხაზეთის რკინიგზის აღსადგენად საქართველო ყველაფერს გააკეთებს: “მე ვფიქრობ, რომ ეს შესაძლებელია”, _ განაცხადა ივანიშვილმა.
ივანიშვილის ამ განცხადებამ სააკაშვილის კრიტიკა გამოიწვია. მიხეილ სააკაშვილის განცხადებით, აფხაზეთის გავლით სარკინიგზო მიმოსვლის აღდგენა მხოლოდ რუსეთის ინტერესებში შედის, რომ დაასუსტოს საქართველოს ეკონომიკა და და შეამციროს ბაქო-თბილისი-ყარსის მშენებარე სარკინიგზო ხაზის მნიშვნელობა.
