სოფლის მეურნეობის თემა საკმაოდ საინტერესო და აქტუალურია, ამიტომ “გურია ნიუსი” დაუკავშირდა ალექსანდრე ლომოურს იმ ინიციატივების შესახებ, რომელთა განხილვაც საჯაროდ გამოიტანა ექსპერტმა და საზოგადოების მხარდაჭერაც მოიპოვა.
_ ბატონო ალექსანდრე, ძალიან საინტერესოა თქვენს მიერ წარმოდგენილი იდეა რეგიონული სარწყავი მანქანების პარკის შესახებ. იქნებ, გაგვიმარტოთ, რას გულისხმობთ?
_ რეგიონული სარწყავი მანქანების პარკი აუცილებელია იქიდან გამომდინარე, რომ ქვეყანაში არ არის სამელიორაციო სარწყავი სისტემები მოწესრიგებული.
_ რა აუცილებლობას წარმოადგენს აღნიშნული პარკი სოფლის მეურნეობის განვითარებისათვის?
_ წარმოიდგინეთ სოფლები და რეგიონები, სადაც, პრაქტიკულად, არ არსებობს სარწყავი სისტემები. ამ დროს არის მიწები, რომლებიც უწყლობის გამო არავარგისიანი ხდება. მაგალითად, გლეხს აქვს თუნდაც ერთი ჰექტარი სასოფლო-სამეურნეო დანიშნულების მიწა და ამ მიწას ვერ ამუშავებს, რადგან არ აქვს სარწყავი წყალი. აი, რატომ არის აუცილებელი, რომ ქვეყანაში არსებობდეს სოფლის მეურნეობის ხელშეწყობისთვის სარწყავი მანქანების პარკი.
_ ვის და რა ფასად მოემსახურება აღნიშნული პარკი?
_ ჩვენ ვისაუბრეთ ზოგადად იმ ადგილებზე, სადაც სარწყავი წყალი არ არის. სწორედაც მართებული იქნება, თუ რეგიონული სარწყავი მანქანების პარკი, პირველ რიგში, მოემსახურება უსასყიდლოდ იმ სოფლებსა და რეგიონებს, სადაც გვალვის პერიოდში გლეხს უჭირს მორწყვა.
_ მხოლოდ მათ მოემსახურება უფასოდ თუ ყველას?
_ არა, ყველას არ მოემსახურება. თუ ვინმეს სურვილი ექნება გადაიხდის შესაბამის ღირებულებას ამ მომსახურებაში.
_ სახელმწიფოს აქვს აღნიშნული პარკის შექმნის შესაძლებლობა?
_ მთავარია, სახელმწიფო პოლიტიკა და ნება აღნიშნული პარკის შექმნისა. თუ ნამდვილად გვინდა სოფლის მეურნეობისთვის ხელშეწყობა და განვითარება, რესურსი გამოინახება. ფინანსები არ უნდა იხარჯებოდეს უყაირათოდ _ მას უნდა ჰქონდეს მიზანმიმართული პოლიტიკა.
_ ვის შეიძლება ექვემდებარებოდეს ეს პარკი და როგორ მოხდება საქმიანობის კონტროლი?
_ პარკი უნდა ექვემდებარებოდეს სოფლის მეურნეობის სამინისტროს და როგორი ფორმით, ეს თავად მისი გადასაწყვეტი იქნება, თუ ამ საკითხზე დაიწყებენ მუშაობას.
_ ბატონო ალექსანდრე, იყო თუ არა გამოხმაურება სოფლის მეურნეობის სამინისტროსგან თქვენს ინიციატივაზე?
_ დიახ, ინიციატივა მეკუთვნის მე, მაგრამ ამჯერად სოციალური ქსელის მეშვეობით ხდება მისი საჯაროდ განხილვა. სახელმწიფო უწყებებიდან ამჟამად გამოხმაურება არ ყოფილა.
_ თქვენ სოციალურ ქსელში გააჟღერეთ კიდევ ერთი ახალი ინიციატივა “გლეხთა დარბაზის” შესახებ.
_ ეს ინიციატივა არის ძალიან კარგი და სასარგებლო, იქედან გამომდინარე, რომ სოფლის მეურნეობის განვითარებაში თავად საზოგადოება მიიღებს მონაწილეობას. მინდა გაგახსენოთ სააკაშვილის დროინდელი სოფლის მეურნეობის მინისტრები _ მათ საზოგადოებასთან კავშირი სამუდამოდ ჰქონდათ გაწყვეტილი და აკეთებდნენ იმას, რაც ქვეყნისა და ხალხისთვის იყო მიუღებელი, ამიტომაც გვაქვს დღეს ასეთი სოფლის მეურნეობა. ავიღოთ, თუნდაც, ჩავარდნილი “ჰიბრიდული სიმინდის პროგრამა”.
_ რა ფუნქცია შეიძლება ჰქონდეს “გლეხთა დარბაზს”?
_ მე იმედი მაქვს და დარწმუნებული ვარ, რომ ახალი ხელისუფლება და სოფლის მეურნეობის ახალი მინისტრი, წინამორბედისგან განსხვავებით, საზოგადოებრივ მიმართულებაში აქტიურ მონაწილეობას მიიღებს. რაც შეეხება გლეხთა დარბაზის ფუნქციას, ეს იქნება ძალიან სასარგებლო. მაგალითად, “გლეხთა დარბაზი” თვეში ორჯერ სოფლის მეურნეობის მინისტრს, მოადგილეებს შეხვდება და სოფლის მეურნეობის განვითარების შესახებ ინფორმაციებს და მოსაზრებებს გაცვლიან; ასევე, იქნება დისკუსია ამა თუ იმ თემის ღირებულებიდან გამომდინარე. შესაძლებელია, ბევრი საკითხი ვერ იქნეს გათვალისწინებული, მაგრამ საზოგადოების აქტიურობა ამ დარგის განვითარებისთვის ძალიან კარგი იქნება.
_ ვინ შევა “გლეხთა დარბაზში”?
_ სოფლად მცხოვრები ადამიანები, რომლებსაც აქვთ გამოცდილება სასოფლო-სამეურნეო საქმიანობაში.
_ რამდენად შესაძლებელია, აღნიშნული ინიციატივა გახორციელდეს?
_ ყველაფერი დამოკიდებულია სახელმწიფო პოლიტიკაზე, მიმართულებაზე და მუშაობის სტილზე, რამდენად ახლო იქნება ის ადამიანებთან.
