ფოთის მიმდებარე სოფლებში მგლები გამოჩნდნენ _ მსგავსი რამ ხობის რაიონის დაბალი ზონის სოფლების მოსახლეობას გასული საუკუნის პირველი ათეული წლების შემდეგ არ ახსოვს.
არადა, ბოლო ერთი თვეა, მტაცებლები სოფლების ყველაზე დასახლებულ ადგილებში გამოჩნდნენ და მსხვილფეხა პირუტყვი დაგლიჯეს.
სოფლის მოსახლეობამ დახმარებისთვის ხობის მუნიციპალიტეტს მიმართა და ჩვენთან საუბარში ერთმნიშვნელოვნად განაცხადა, რომ მგლები, არც მეტი და არც ნაკლები, გურიიდან გადმოვიდნენ.
_ გურიიდანაა მაგენი ჩამოსული, ბაბა! ასეთი ამბავი, ამ შემოგარენში, კომუნისტები რაც მოვიდნენ იმის მერე არ ყოფილა. ეტყობა იქცევა ქვეყანა. მგლებს ფოცხვერი და დათვიც მოყვება, როგორც ადრე იყო და ისედაც დამშეული ხალხი მთლად დაიღუპება. აქ ხალხის შემოსავალი საქონელია. ისეც თუ მგლებმა დაგლიჯა, მშივრები დავიხოცებით, _ გვითხრა სოფელ ჭალადიდის მკვიდრმა, 80 წლის გოგი ჭოჭუამ.
“გურული მგლები” რომ მოსახლეობის თავსატეხად იქცა, ჭალადიდში არავის უკვირს და ამას გურიასთან ტერიტორიული სიახლოვით ხსნიან. მონადირეების თქმით, გურიის სოფლებამდე, პირდაპირი გზით, 7 კილომეტრია, ამიტომაც მგლების გამოჩენა, მაშინ, როცა გურულებისთვის ეს სერიოზულ პრობლემას წარმოადგენს, არც ჭალადიდის მოსახლეობას უნდა გაუკვირდეს.
_ მთელი ჩემი ცხოვრებაა, ვნადირობ, მაგრამ მგლები არასდროს მინახავს ამ ადგილებში. გურიაში რომ დიდთოვლობა იყო, იმიტომ ჩამოვიდნენ ბარში. ამას ასე ვერავინ უშველის _ უცებ მრავლდებიან და 100 მონადირეც რომ გამოვიდეს თოფით, ისეთ ადგილებში, სადაც ბზის კორომებია, მგლებს ვერაფერს უზამ. თანაც, მათ მოკვლას ნებართვა სჭირდება, _ გვეუბნება მამუკა ჯვარელია.
ზემოაღნიშნული ნებართვა, ოღონდ მხოლოდ 15 მგლის მოკვლაზე, გარემოს დაცვის ინსპექციის სამეგრელო-ზემო სვანეთის რეგიონულმა სამმართველომ უკვე გასცა. მონადირეებმა, ამ დრომდე, მხოლოდ 3 მგლის მონადირება მოახერხეს.
ხობის მუნიციპალიტეტის გამგეობაში ამბობენ, რომ ერთი წლის განმავლობაში, რაიონის მასშტაბით, მგლებმა 250 სული პირუტყვი დაგლიჯეს.
