შენობაში სახურავიდან წყალი ჩამოდის, კედლები დაბზარულია, მოშლილია საკომუნიკაციო სისტემა. თეატრს არ აქვს წყალი, საკანალიზაციო მილები მთლიანად გამოსულია მწყობრიდან, არ მუშაობს სახანძრო სიგნალიზაცია. სარემონტოა კულისები, საგრიმიოროები, მუზეუმი, საწყობი, გარდერობი. თეატრი 50-იან წლებში შეძენილი აპარატურით ფუნქციონირებს. როგორც აქ მომუშავეები ამბობენ, სენაკის თეატრი სოფლის კლუბს დაემსგავა.
ეკა კოღუა, მსახიობი: – სცენაზე წვიმს, რამდენჯერ ყოფილა, რეპეტიცია ქოლგით გაგვივლია, რომ მაყურებლის წინაშე მომზადებულები გავსულიყავით. სველი წერტილები საერთოდ მოშლილია. არ არის გათბობა, ჭერიდან ყველაფერი ცვივა. რამდენი ხანია ხან ძეგლთა დაცვის სამინისტროს ვწერთ, ხან კულტურის სამინისტროს, მაგრამ არავინ მოგვაქცია ყურადღება. სოფლის კლუბს დაემსგავსა ჩვენი თეატრი, შეიძლება იქაც არ იყოს ასეთი მდგომარეობა. ახალი მთავრობის მოსვლის შემდეგ იმედი გაგვიჩნდა _ დარწმუნებულები ვართ, გურამ ოდიშარია აუცილებლად გაითვალისწინებს ჩვენს თხოვნას და სენაკის თეატრსაც დაადგება საშველი.
მანანა ეჯიბია, თეატრის მუზეუმის გამგე: – წინა ხელისუფლებას არც თეატრი უყვარდა, არც არაფერი ეროვნული. ფაქტია, ხომ არ ვიგონებ?! 120 წლისაა ეს თეატრი და საერთოდ არავინ გვაქცევდა ყურადღებას. მუზეუმში სურათები დაობებულია. სირცხვილია ეს ყველაფერი, არადა რამდენი უცხოელი შეიძლება მოვიდეს აქ და გაეცნოს ჩვენს ისტორიას.
გოჩა დამენია, თეატრის მენეჯერი: – საშინელი მდგომარეობაა. თეატრში ღამურების მეტს ვერაფერს ნახავ. აპარატურა მოძველებულია, მსახიობებს გაუსაძლის მდგომარეობაში უწევთ მუშაობა. ეს ხალხი მართლაც გმირები არიან, მაგრამ უყვართ თავისი საქმე და, რაც მთავარია, სენაკის მოსახლეობა აფასებს მათ შრომას. სენაკში იმართება პრემიერები და ანშლაგით მიდის, მაგრამ გათბობა არ არის, სველი წერტილები არ ფუნქციონირებს. წარმოიდგინეთ, დამლაგებელს წყლის გარედან შემოზიდვა უწევს. საგრიმიორებზე აღარაფერს ვამბობ, იქ თუ შეიძლება შესვლა, არ ვიცი… 6 წლის წინ გადაიხურა თეატრი, მაგრამ სამუშაოები ისე არაპროფესიულად არის ჩატარებული, რომ შენობაში წვიმს. იმედი მაქვს, ახალი მთავრობა აუცილებლად მიაქცევს სენაკის თეატრს ყურადღებას.
როგორც “გურია ნიუსს” სენაკის თეატრის მმართველმა, თენგიზ თოფურიძემ უთხრა, განათებისა და გახმოვანების სისტემა საერთოდ მოშლილია, თეატრში მხოლოდ 12 ნათურა ანათებს, სასწრაფოდ ჩასატარებელია სასცენო–ტექნიკური სამუშაოები. თეატრის მდგომარეობა კიდევ უფრო დამძიმდა 2008 წლის დაბომბვის შემდეგ.
ადგილობრივ თვითმმართველობაში აცხადებენ, რომ რადგან 2008 წელს თეატრს კულტურული მემკვიდრეობის ძეგლის სტატუსი მიენიჭა, ამიტომ მის აღდგენაში მონაწილეობის უფლება არა აქვთ.
