როგორც მათ “გურია ნიუსთან” განაცხადეს, თემურ ჭყონიამ მიზერულ ფასად, წინა ხელისუფლებასთან გარიგებით შეიძინა საკმაოდ დიდი ტერიტორია, რომელიც მთლიანად შემოღობა და ამით ათასობით დამსვენებელს მოუსპო ფიჭვნარში გადასვლის საშუალება.
დღეს, ჭყონიას სასტუმროს წინ შეკრებილებმა ხეების მოჭრის ფაქტიც გააპროტესტეს და განაცხადეს, რომ მათ ნაცვლად გაშენებული სათამაშო მოედანს, რომელიც მხოლოდ ჭყონიას რამდენიმე სტუმრისთვის არის, უნიკალური ხეები არ უნდა შეწირვოდა.
“გურია ნიუსის” კითხვაზე, თუ რატომ არ გააპროტესტეს აღნიშნული ფაქტები უფრო ადრე, აქციის მონაწილეებმა გვიპასუხეს, რომ იმ ხელისუფლების პირობებში, “ნაცმოძრაობის” ერთ-ერთი მსხვილი შემომწირველი ბიზნესმენის წინააღმდეგ ბრძოლას აზრი არ ჰქონდა.
სასტუმრო “ჯორჯიან პალასის” მიმდებარე ტერიტორია _ 15 000 კვადრატული მეტრი, ბიზნესმენმა თემურ ჭყონიამ აჭარის ეკონომიკის სამინისტროსგან 27 თებერვალს შეიძინა. ძალიან მალე ცნობილი გახდა, რომ სანაპიროს მიმდებარე ტერიტორიაზე, რამდენიმე ფიჭვისა და ნაძვის ხის ნაცვლად, კოტეჯები და საცურაო აუზი აშენდებოდა.
ტერიტორია, სადაც თემურ ჭყონიამ ხეების მოჭრა დაიწყო, ერთ-ერთ უნიკალურ ზონად ითვლება ქობულეთში თავისი სამკურნალო თვისებებით. არც ის იყო შემთხვევითი, რომ ამ ადგილას, თავის დროზე, მობილიზებული იყო ორი სანატორიუმი: _ ერთი _ “თოლია”, ბავშვებისთვის, მეორე _ სანატორიუმი “საქართველო” გულსისხლძარღვთა დაავადებულთათვის; ადგილის უნიკალურობას კი სწორედ ფიჭვნარის არსებობა განაპირობებდა.
დაახლოებით ერთი წლის წინ, გარდა იმ ფართისა, რომელიც ჭყონიამ შეიძინა, მის მიერ დაქირავებულმა მუშებმა რამდენიმე ხე იმ ტერიტორიაზეც მოჭრეს, რომელიც 3 მეტრითაა დაშორებული თემურ ჭყონიას მიერ შესყიდული ნაკვეთიდან. საზღვრის თვითნებური გადაწევა და ფიჭვების მოჭრა მხოლოდ ბოდიშის მოხდით გამოისყიდეს. მსგავსი ქმედების გახორციელების შემთხვევაში, რიგითი მოქალაქის მიმართ, შეიძლებოდა, სისხლის სამართლებრივი პასუხისმგებლობის საკითხი დამდგარიყო. მაშინ, ადგილობრივების პროტესტს არავითარი შედეგი არ მოჰყოლია _ სიტუაციის გამწვავების შემთხვევაში, მათ პატრულის გამოძახებით დაემუქრნენ.
საჯარო უწყებებში აცხადებენ, რომ კერძო საკუთრების მფლობელს მისი განკარგვა საკუთარი შეხედულების მიხედვით შეუძლია.
აჭარის ეკონომიკის მინისტრის მოადგილემ ზურაბ ჭუკვეიძემ მაშინ გაგვიცხადა, რომ სამინისტრო ინვესტორს ხეების შენარჩუნებას არ ავალდებულებს, მთავარია, მან ხელშეკრულებით გათვალისწინებული ვალდებულებები შეასრულოს.
ზურაბ ჭუკვეიძე: _ კომპანია ვალდებულია, შეასრულოს ხელშეკრულებით გათვალისწინებული ვალდებულებები. ვალდებულია ააშენოს დასასვენებელი კომპლექსი და დაასაქმოს საქართველოს 100 მოქალაქე.
აჭარის ბუნებრივი რესურსების და გარემოს დაცვის სამმართველომ ადგილობრივი ჟურნალისტები ქობულეთის გამგეობასთან გადაამისამართა, სადაც ერთი წლის წინ განუცხადეს, რომ ეს საკითხი მათ არ ეხებოდათ.
“გურია ნიუსი” ამ თემაზე ჯერ კიდევ რამდენიმე თვის წინ წერდა. მაშინ, საქართველოს ენერგეტიკისა და ბუნებრივი რესურსების სამინისტროსაც დავუკავშირდით და შემდეგი კითხვებით მივმართეთ:
_ რამდენად დასაშვებია ასეთი ნებართვის გაცემა ზღვისპირა ზოლში, რადგან ამ ფიჭვნარის წინ მოსახლეობა ცხოვრობს და ეს ხეები გარკვეულწილად დამცავ ფუნქციასაც ასრულებენ?
_ რამდენად სწორია ის განცხადება, რომ სამინისტრო ინვესტორს ხეების შენარჩუნებას არ ავალდებულებს?
სამინისტროდან მიღებული პასუხი ასეთია: “სანაპირო ზოლზე ხეების მოჭრის ნებართვის გაცემის რეგულირება ენერგეტიკისა და ბუნებრივი რესურსების სამინისტროს კომპეტენციას სცილდება. ზოგადად, მშენებლობის პროექტში ხეების მოჭრა გათვალისწინებულია. დღეს მოქმედი კანონმდებლობის შესაბამისად, თბილისის გარდა, კერძო საკუთრებაში არსებული მიწის ნაკვეთებზე ხის მოჭრა ნებართვას არ საჭიროებს, ანუ მესაკუთრეს შეუძლია ხეების მოჭრის გადაწყვეტილება თავად მიიღოს, ხოლო მისი შემდგომი ტრანსპორტირება და გადამუშავება ენერგეტიკისა და ბუნებრივი რესურსების მინისტრის 2011 წლის 24 ივნისის #96 ბრძანების საფუძველზე რეგულირდება.”
რაც შეეხება ჩვენს კითხვას, რამდენად ნებადართულია და ვინ არის პასუხისმგებელი ხეების მოჭრაზე იმ ზონაში, რომელიც არ ეკუთვნის კერძო მესაკუთრეს, ენერგეტიკისა და ბუნებრივი რესურსების დაცვის სამინისტროში გაგვიმარტეს, რომ: “იმ შემთხვევაში, თუ ხეები მოჭრილია თვითმმართველობის ტერიტორიაზე და ხეების მოჭრა შეთანხმებული არ არის, ასეთ შემთხვევაში შესაძლებელია ჩადენილი იყოს ადმინისტრაციულ სამართალდარღვევა და შესაბამისად, თუ დადასტურდა სამართალდარღვევის ფაქტი, შესაბამისად, პასუხისმგებელი პირია თვით სამართალდამრღვევი.”
მიუხედავად იმისა, რომ ხეები იმ ზონაშიცაა მოჭრილი, რომელიც ჭყონიას არ ეკუთვნის, ამ ამბის მომკითხავი არავინ აღმოჩნდა.
“გრინფისის მხარდამჭერთა ჯგუფის” თანათავმჯდომარე, ეკოლოგიის მაგისტრი ლაშა ჩხარტიშვილი აცხადებს, რომ შავი ზღვის სანაპიროს დეკორაციული პიარ-აღმშენებლობა, უნიკალური კულტურული და ბუნებრივი გარემოს განადგურების ხარჯზე ხორციელდება: “ახალი კიტჩური და სანაპიროს გამწვანებული ზოლის განადგურების მიზეზი სააკაშვილისა და მისი ოლიგარქების კორუფციული, ასევე პროპაგანდისტული მოთხოვნილებების დაკმაყოფილება იყო…
“აჭარაში, გურიასა, თუ სამეგრელოში მრავალი წელი მიმდინარეობდა სანაპირო ზოლის ნაგლეჯ-ნაგლეჯ გაყიდვა ქრთამის სანაცვლოდ, ასევე მრავალწლიანი წიწვნარის დაუნდობელი განადგურება ფეშენებელური ვილებისა, თუ კომერციული ობიექტების მშენებლობისთვის…”
ქობულეთში, თემურ ჭყონიასთვის მიყიდულ ტერიტორიაზე დაუნდობლად გაჩეხეს ხეები… ეს ძალიან მტკივნეულია, მაგრამ, სამწუხაროდ, გასაკვირი აღარაა ჭყონიასგან, რომლის მორიგი “მაკდონალდსის” მშენებლობა წერეთლის მეტროს მიმდებარედ არსებული სკვერის ტოტალური განადგურების ხარჯზე დაიწყო…
სანაპირო ზოლის გამწვანებას გააჩნია ესთეტური, ეკოლოგიური, სანიტარული, რეკრეაციული და სხვა მრავალი უმნიშვნელოვანესი ფუნქცია. შესაბამისად, მისი შენარჩუნება და მოვლა-პატრონობა მნიშვნელოვანია, როგორც ადგილობრივი მოსახლეობის ჯანმრთელობისა და სულიერი განვითარებისთვის, ასევე, ტურისტების მოზიდვის თვალსაზრისითაც. გარდა ჰაერის გაწმენდისა და ჟანგბადით გამდიდრებისა, წიწვოვანების მიერ გამოყოფილ ბუნებრივ ნივთიერებებს ბაქტერიების განადგურებისა და სამკურნალო თვისებები გააჩნია. ამასთანავე, სანაპიროს გამწვანებას აბრაზიის საწინააღმდეგო ანუ ნაპირგამაგრებითი ფუნქციაც გააჩნია.
ასე რომ, ქობულეთისა, თუ შავიზღვისპირეთის გამწვანებული ზოლის გაჩეხვა ყოვლად დაუშვებელია და დანაშაულია, როგორც ჩვენი, ასევე, მომავალი თაობების წინაშე. ჩემი აზრით, გამწვანებული ზოლი საერთოდ არ უნდა გასხვისდეს!” _ აცხადებდა ლაშა ჩხარტიშვილი “გურია ნიუსთან.
