ისინი ამბობენ, რომ უცხოელმა ინვესტორმა ადგილობრივი მოხელეების და დაინტერესებული პირების ხელშეწყობით, უსამართლოდ იყიდა მიტაცებული მიწის 50 ჰექტარი. ისინი ითხოვენ კანონდარღვევით წართმეული მიწების უკან დაბრუნებას.
ოზურგეთელი მოქალაქე ლევან თოიძე, აღნიშნული წერილის გამოქვეყნების შემდეგ, ჩვენთან საუბარში განმარტავს, რომ არავითარი კანონდარღვევა არ ჩაუდენია _ იყიდა და შემდეგ გაყიდა სასოფლო-სამეურნეო მიწა.
_ მე ეს მიწა იჯარით ავიღე 2002 წელს და 2006 წელს შევისყიდე. შემდეგ გავყიდე უცხოელზე, ეს არის ებრაელი ინვესტორი, იგორ ასკაროვი, რომელსაც ახლა საკუთრებაში აქვს და ვერც ვერავინ წაართმევს.
_ ბატონო ლევან, როგორ მოხდა, რომ ლაითურის არა ერთ მცხოვრებს საკუთრებაში 3 000 კვ. მეტრი მიწის ფართობიც არ აქვს მიზომილი და თქვენ 50 ჰექტრის ყიდვა მოახერხეთ?
_ მე რატომ მისვამთ ამ კითხვას? მე შევისყიდე.
_ ეს კანონდარღვევა არ იყო?
_ რა ჩემი საქმეა? მე სახელმწიფოსგან ვიყიდე და დარღვევა თუ იყო, რეესტრში ხომ მეტყოდნენ?
_ ლაითურელთა უმრავლესობა აცხადებს, რომ მიწის ნაკვეთები მათ მიზომილი და საკუთრებაში დამტკიცებული ჰქონდათ. თქვენ კი მათთვის არაფერი გიკითხავთ.
_ ეს არასწორია. თუ არ გჯერათ, წამოდით და ლაითურში 300 ჰექტარ მიწას აგაღებინებთ, თუ გინდათ, იქ იმდენი მიწაა. გელა აბაშიძე თვითონ არის შემოჭრილი ჩემს ფართობში. მე მაგ მიწაში ფული გადავიხადე. რა ჩემი საქმეა და რა ჩემი ბრალია, თუ მათგან ზოგს აქვს მიწა და ზოგს _ არა?!
_ თქვენი ბრალი არა, მაგრამ ვინც პრივატიზაციის დროს არ მიუზომა დადგენილი ნორმით, იმათი ბრალი ხომ არის?
_ არ ვიცი. მაგ მიწაში 35 ათასი ლარია გადახდილი.
მე მინდოდა თხილის პლანტაციის გაშენება, თუმცა, მერე ისეთი დრო დადგა, კრედიტი ვერ ავიღე და აქედან გამომდინარე, ვერ გავაკეთე, რაც ჩაფიქრებული მქონდა. ამიტომ გავყიდე. ის აბაშიძე კი, ვინც ახლა ჩივის, ჩემს მიწაზეა შემოსული.
_ ლაითურის მკვიდრი, გელა აბაშიძე, თავის მეზობლებთან ერთად, აცხადებს, რომ უცხოელ ინვესტორთან მიწის გამო დავას შეეწირებიან.
_ იმ უცხოელს ახლა 50 კაცი ჰყავს დასაქმებული და ვინ უნდა გააგდოს? ის მიწა ნაყიდი აქვს და მისია. მისი საკუთრებაა.
_ მთელი სოფელი რომ მისი წინააღმდეგია?
_ იყოს მერე, რა ვქნათ? სახელმწიფომ მიიღო ასეთი დადგენილება, რომ დაბა ლაითურში, თითოეულ ოჯახს საკუთრებაში ჰქონოდა 3 000 კვ. მეტრი მიწის ფართობი. ხომ ჰქონდა აბაშიძეს მაგდენი, აბა, ახლა ნახეთ, რამდენი აქვს.
_ ლაითურელთა უმრავლესობა უმიწოდაა და ამის გამო დავის გაგრძელებას აპირებენ. ეს კონფლიქტი ხომ უნდა მოგვარდეს?
_ როგორც ვიცი, ახლა საქმე პროკურატურაშია და მიმდინარეობს გამოძიება. ალბათ, დადგინდება სიმართლე, გაირკვევა მტყუან-მართალი. თქვენ რომ ჟურნალისტი ხართ, უნდა უთხრათ მათ, რომ არ ეკუთვნით ეს მიწა და უსამართლოდ დაობენ. მე როგორც ვიყიდე, თუ უნდათ, დღესვე ვაყიდვინებ 10 ჰექტარს.
_ ასე ადვილად შეგიძლიათ?
_ რა შეძლება უნდა, იყიდონ, თუ უნდათ. მე თავის დროზე ვიყიდე, მორჩა და გათავდა.
ყოველივე ამის შემდეგ, “გურია ნიუსის” რედაქციაში კიდევ ერთხელ დარეკა ლაითურის მკვიდრმა, გელა აბაშიძემ. იგი ამჯერად შეშფოთებული იყო იმის გამო, რომ უცხოელმა ინვესტორმა მის თხილის ნარგავებს ცეცხლი წაუკიდა.
_ თუ დროულად არ ჩაერევა ხელისუფლება და სამართალი არ აღდგება, აქ მკვლელობას მოხდება. ამოვიდა ყელში ამდენი უსამართლობა! თუ ვინმე იყო თანახმა მათთვის მიწის მიყიდვაზე, თქვან. საიდან აღმოაჩნდათ ჯერ _ 26, მერე კი 50 ჰექტარი საერთო ჯამში? ჩვენმა ადვოკატმა ბათუმის პროკურატურაში შეიტანა საჩივარი, იქედან ოზურგეთში გადმოაგზავნეს, ოზურგეთის პროკურატურამ პოლიციას დაავალა გამოძიება. იმედი არ მაქვს, რომ სიმართლე დადგინდება. ხალხი მეუბნება, დღევანდელი სასამართლო შეცვლილი არ არის და ვერაფერს გახდებიო, _ ამბობს აბაშიძე.
ადვოკატი ირაკლი ნაკაშიძე “გურია ნიუსთან” საუბარში აცხადებს, რომ ახლა საქმეს პოლიცია იძიებს: _ ეკონომიკის სამინისტროში გაგზავნილია შეკითხვები. ველოდებით პასუხს. ძირითადად, ჯერ არაფერია გადაწყვეტილი. საინტერესოა, 2006 წელს, როცა ლევან თოიძეს იჯარით ჰქონდა აღებული 26 ჰა მიწის ფართობი, უცებ საიდან აღმოაჩნდა 50 ჰექტარი? აი, ესეც გასარკვევია, _ ამბობს ნაკაშიძე.
_ ბატონო ირაკლი, თქვენ თუ ჰკითხეთ მას, როგორ მოხვდა ამდენი მიწა მის საკუთრებაში?
_ მე არა ერთხელ გადავწყვიტე მისთვის კითხვის დასმა, მაგრამ საერთოდ არ მხვდება. უნდა დაველოდოთ გამოძიებას. მართალია, ხალხი გამწარებულია, მაგრამ საჭიროა საკითხის ცივილური ფორმით გადაწყვეტა.
_ გელა აბაშიძე ამბობს, რომ უკიდურეს შემთხვევაში, გენერალურ პროკურორს, არჩილ კბილაშვილს მიმართავს. თქვენ რას ფიქრობთ, შეძლებთ ამ საქმის ბოლომდე სამართლიანად ძიებას თუ ამისთვის უფრო მაღალი ინსტანციის ჩარევა გახდება საჭირო?
_ ვნახოთ, რა მოხდება. თუ სამართლიანი მოკვლევა მოხდება, მაშინ ფირმის საკუთრების მოწმობა მიწაზე უნდა გაუქმდეს, რადგან ეს უცხოელი აშკარად გაცილებულია ფარგლებს. ვფიქრობ, სამართალი უნდა აღდგეს.
