“ეს არის მშვენიერი გზა ეკონომიკური სიძლიერისთვის”

11 სექტემბერს, დაბა ურეკში, პირველად ჩატარდა აგრო-ტურისტული ფესტივალი, რომლის ორგანიზება ასოციაცია “ჩაის გზამ” გასწია.

ფესტივალში თხუთმეტამდე ორგანიზაციამ მიიღო მონაწილეობა, რომლებიც თავად არიან აღნიშნული ასოციაციის წევრები. ესენი არიან ჩაის, ჩურჩხელის, თაფლის, სხვადასხვა პროდუქციის, ღვინის მწარმოებელი ფერმერები.

აგრო-ტურისტული ფესტივალი ერთგვარი სიახლეა, მსგავს სიახლეთა შორის, რამაც შესაძლოა, კარგი ხელმძღვანელებისა და ორგანიზატორების ხელში, სერიოზული ძვრა მოახდინოს გურულ მეწარმეთა საქმიანობის წინსვლაში, მცირე ბიზნესის გაძლიერებაში.

გურიის სამივე მუნიციპალიტეტიდან წარმოდგენილმა პროდუქციამ სხვადასხვა კუთხით მიიქცია ყურადღება.

_ მე, როგორც მესამე შვილს, ისე ვუყურებ ჩემს ახლად დაწყებულ საქმეს. “ტაბერნე გურიაში”, დღითიდღე ახერხებს, დაიმკვიდროს საკუთარი ნიშა და ასეთი ფესტივალი საუკეთესო სტიმულია ჩემთვის და ზოგადად, ყველა მცირე მეწარმისთვის, რომელიც ბიზნესს იწყებს. აქ თავი ვიგრძენი ღირსეულ მეწარმედ. აქ, სხვა პროდუქციასთან ერთად, წარმოვადგინე “ბრინჯულა”, რომელიც გურული კერძია. კონკრეტულად კი მისი დამზადების ისტორია ლანჩხუთში იღებს სათავეს. ძალიან მოეწონათ “ბრინჯულას” ვარიაციები და ეს მიხარია, _ გვითხრა მცირე მეწარმემ კესო მახარაძემ.

ინდმეწარმე მზია შარაშიძემ, რომელიც ჩურჩხელებს დიდი ხანია, ამზადებს, თქვა, რომ მისთვის, როგორც მარტოხელა დედისთვის და ქალბატონისთვის, საუკეთესო გზამკვლევი და დამხმარე საშუალებაა ასეთი ფესტივალი.

_ ეს არის ჩვენნაირი საშუალო ფენის, იმ ადამიანებისთვის დახმარების ხელის გაწოდება, ვინც აპირებს ბიზნესში ფეხი შედგას. მე წარმატების გზას უკვე დავადექი. მიხარია, რომ ამ ასოციაციის წევრი ვარ. ვიმედოვნებ, ჩვენს ფენასაც გაეხსნება გზა სერიოზული წარმატებებისკენ და ამ სივრცეში სწორედ “ჩაის გზა” გაგვიყვანს, _ თქვა ქალბატონმა მზიამ.

_ “ჩაის გზა” გურიაში, ზოგადად, დასავლეთ საქართველოში და ჩვენს ქვეყანაში, ვფიქრობ, სერიოზულ საქმეს გააკეთებს. საამისო წინაპირობა სახეზეა, _ გვითხრა ჩაის მწარმოებელმა, ცნობილმა ფერმერმა დავით თენიეშვილმა.

_ გურიაში ღვინის ინდუსტრიის განვითარება მნიშვნელოვნად არის დაკავშირებული მის განვითარებასთან. ასეთი ფესტივლის მიზანი ისიც არის, რომ აღნიშნულ საქმეს არ სჭირდება პოპულიზმი და რომ გურიამ უნდა გაიგოს, რომ საღვინე ჯიშების მაღალი პოტენციალი არსებობს. ჩემთვის ეს არის საქმე, რომელსაც სიამოვნებით ვაკეთებ. ის მაძლევს შესაძლებლობას, თვალსაწიერი გავიფართოვო. ამ ეტაპზე მხოლოდ იმას ვახერხებთ, რომ ბიზნესმა, ასე ვთქვათ, საკუთარი თავი არჩინოს. სამომავლოდ კი ყველასთვის, ვინც აქ არის ან არ არის და ამ საქმეს მოჰკიდა ხელი, წარმატებულ ბიზნეს საქმიანობას შეუდგეს, _ გვითხრა “მენაბდის მარანის” წარმომადგენელმა ვახუშტი მენაბდემ.

 “ბახვიჰესის” გარემოს დაცვისა და სოციალური საკითხების მენეჯერი, დავით მიქელაძე ამბობს, რომ ეს დღე უმნიშვნელოვანესია , როცა “ჩაის გზა” პირველ აგროფესტივალს ატარებს:

_ ჩვენ ამ ასოციაციას შევუძინეთ დახლები, რომლებიც ყველა გამოფენაზე გამოადგებათ მეწარმეებისთვის. სამომავლოდ ეს გზა აუცილებლად დაეხმარება ადამიანებს აგროტურისტული მიმართულების კარგად განვითარებისთვის, რათა მათ გაუჩნდეთ დამატებითი შემოსავლები, _ განაცხადა მან.

გურული მეწარმეების წარმოდგენილ პროდუქციას შორის გამორჩეულად ჩანდა ღვინის, საწებლების, თაფლის, ჩურჩხელის მწარმოებელთა პროდუქცია. მათ გვერდით კი, განსაკუთრებით საინტერესო და მიმზიდველი იყო გურულ მოსწავლეთა ნამუშევრების გამოფენა. აქ უხვად იყო სამკაულები, სხვადასხვა აქსესუარები, საყოფაცხოვრებო ნივთები…

_ ჩვენ აქ გვიდევს “სიკეთის ყუთი”. თანხას, რომელსაც ჩვენი ნამუშევრების გაყიდვით ავიღებთ, აქ ვათავსებთ. ნახევარს გადავცემთ მეგობრებს, ვისაც უჭირს. ნახევარს კი კვლავ საჭირო მასალის შეძენას მოვახმართ, _ გვითხრეს ოზურგეთელმა მოსწავლეებმა _ ნინი და ლიკა მამეშვილებმა.

ასეთივე აზრი გამოთქვეს ლიხაურის საჯარო სკოლის მოსწავლეებმა, რომელთაც წარმოდგენილი ჰქონდათ, სასოფლო სამეურნეო შრომისთვის აუცილებელი ნივთები.

_ ამერიკის საელჩოს პროექტი: “ახალგაზრდების მომზადება უკეთესი მომავლისთვის”, ხელს უწყობს მოსწავლეთა პროფესიული და სამეწარმეო უნარების განვითარებას. ჩვენ ავირჩიეთ გურული ხელსაქმე. ბავშვებს ხალხური რეწვის გაკვეთილებს უტარებს სოფელში ამ საქმის ერთადერთი მცოდნე, მერაბ სალუქვაძე. მოსწავლეებმა საუცხოოდ აითვისეს გიდლის, გოდრის დაწვნის ხელოვნება. სულ 15 მოსწავლე, რომელიც აღნიშნულ სწავლებას ესწრებოდა, სექტემბრიდან ისწავლიან ჩიჩილაკის დამზადებას. შემდეგ კი საკალანდო ბაზრობაზე გავყიდით და შევიძენთ სკოლისთვის საჭირო ინვენტარს, _ თქვა ისტორიის მასწავლებელმა ირმა გორდელაძემ.

აქ წარმოდგენილი იყო ასევე ჩოხატაურიდან _ ამაღლების და იანეულის საჯარო სკოლების მოსწავლეების კუთხეები.

ამაღლების საჯარო სკოლის დირექტორმა, ლალი ყაჭეიშვილმა ისაუბრა ამერიკის საელჩოს პროექტის დიდი მნიშვნელობაზე:

_ აღნიშნული პროექტის გახორციელება ჩვენს სკოლაში ადრე გაზაფხულზე დავიწყეთ. ოცამდე ბავშვი სწავლობდა თექაზე მუშაობას. ამ მოსწავლეებში ყველა ასაკის წარმომადგენლობა იყო. ისინი ძალიან დაინტერესდნენ თექის ხელოვნებით და შეძლეს, რომ დღეს ფესტივალზე ასე კარგი ნამუშევრებით წარმოდგენილი იყვნენ, _ გვითხრა მან და “სიკეთის ყუთის” დანიშნულებაც განმარტა, _ ნახევარი მოხმარდება გაჭირვებულ ბავშვებს, ნახევარი კი სამუშაო მასალის შესაძენად იქნება განკუთვნილი.

იანეულის საჯარო სკოლის დირექტორმა ლალი წულაიამ განმარტა, რომ აღნიშნული პროექტის ფარგლებში, სასკოლო ნაკვეთზე სათბურის დადგმა გადაწყვიტეს:

_ დავდგით სათბური და დავრგეთ სამასი ძირი მარწყვი. ძალიან შეგვიშალა ხელი გვალვამ. მიუხედავად ამისა, რომ წყალიც გვქონდა და არაფერს ვაკლებდით მცენარეს, მაინც დავზარალდით. თუმცა, დღეისთვის ასი ძირი ნერგი უკვე გამოყვანილი გვაქვს. ასევე გუშინ მოვკრიფეთ მოკრძალებული მოსავალი და დღეს აქ გასაყიდად აქვთ ბავშვებს გამოტანილი. ნერგებს შეჭირვებულ ოჯახებს დავურიგებთ. პროექტი ოქტომბრისთვის დასრულდება და ვიმედოვნებ, რომ უკეთესი გაგრძელებაც ექნება ამ საქმიანობას, _ გვითხრა სკოლის ხელმძღვანელმა.

ფესტივლის დასასრულს, “გურია ნიუსი” ასოციაცია “ჩაის გზის” ხელმძღვანელს, ღონისძიების ორგანიზატორს, ალეკო მამეშვილს ესაუბრა:

_ ასოციაცია “ჩაის გზის” მხარდამჭერი არის USAID-ის ეკონომიკური უსაფრთხოების პროგრამა, “ბახვიჰესის” წარმომადგენლობა და ოზურგეთის მუნიციპალიტეტი. ასევე მოვიწვიეთ პროექტ “ღვინის სოფელის” მონაწილეები. ფესტივალზე იყვნენ ამერიკის საელჩოს მიერ დაფინანსებულ პროექტში მონაწილე ბავშვები, რომლებიც სხვადასხვა მარტივ სამუშაოებს ასრულებენ და ეჩვევიან შრომას, ეუფლებიან პროფესიას. ჩვენი მიზანია, ასეთი ღონისძიებით სეზონი გახანგრძლივდეს. სამომავლოდ გვინდა, კიდევ უფრო ორგანიზებულად გავაკეთოთ ღონისძიებები. ოქტომბერში ასოციაცია გეგმავს გურჯაანში ფესტივალში მონაწილეობას და მომავალი წელი უფრო დახუნძლული იქნება ასეთი ღონისძიებებით.

ეს ხელს შეუწყობს, პირველ რიგში ქართული, გურული პროდუქტის პოპულარიზაციას. ყველა კარგ ამბავთან ერთად, გაზრდის გურული, ქართული პროდუქციის ცნობადობას და ასევე გაზრდის მეწარმეების შემოსავლებს! ეს არის და იქნება მშვენიერი გზა ჩვენი მეურნეების, მშრომელი ადამიანების ეკონომიკური სიძლიერისთვის! მიზანიც ეს არის! _ თქვა ალეკო მამეშვილმა.