თუმცა, დაპირების მიუხედავად, გრიფი ჯერ არც ერთ საქმეს არ მოხსნია. მთავარ პროკურატურაში, რომელსაც საქმეთა განსაიდუმლეობის მოთხოვნით უკვე მიმართა რამდენიმე ყოფილმა პოლიტპატიმარმა, აცხადებენ, რომ ეს მათი პრეროგატივა არ არის.
“გრიფის მოხსნასთან დაკავშირებით გადაწყვეტილებას იღებს შინაგან საქმეთა სამინისტროს კონტრდაზვერვის დეპარტამენტი. საქმეში თუ მოხვდა თუნდაც ერთი დოკუმენტი, რომელსაც ამ დეპარტამენტისაგან გააჩნია დამღა _ “საიდუმლო”, საქმე ავტომატურად ხდება საიდუმლო. ამიტომაც ამ გრიფის მოხსნაც ასეთივე რეჟიმით ხდება _ ჯერ ის მტკიცებულება უნდა განსაიდუმლოვდეს, შემდეგ კი _ საქმე. გარკვეული მუშაობა ამასთან დაკავშირებით უკვე მიმდინარეობს და ჩვენი სურვილიც არის, რომ თუკი არ მოხდება რაიმე ინტერესის დაზიანება, მოხდეს საქმეების გასაჯაროება. თუმცა, იქ თვლიან, რომ ზოგიერთ საქმეში არსებული ინფორმაცია შეიცავს სახელმწიფოებრივ საიდუმლოებას, ამიტომაც, მეტ დროს ითხოვენ და მეტ სიფრთხილეს. ყველას სურვილია, რომ საქმეები ჯაშუშების ბრალდებასთან დაკავშირებით იყოს განსაიდუმლოებული,’ _ აცხადებს მთავარი პროკურორი არჩილ კბილაშვილი.
