ავტოსაგზაო შემთხვევა მოხდა დღეს ბაკურციხე – თბილისის დამაკავშირებელ გზაზე, ბარჯისხევის მიმდებარე ტერიტორიაზე.
თვითმხილველების თქმით, ტრაილერის მძღოლმა საჭე ვერ დაიმორჩილა, მოცურდა და მსუბუქ ავტომანქანებს დაეცა. შედეგად 4 ადამიანი ადგილზე გარდაიცვალა, ერთი კი მძიმედ დაშავდა. დაშავებული საავადმყოფოშია გადაყვანილი.
გარდაცვლილები არიან რომან ოსიტაშვილი და მისი ვაჟები დავით და ნიკა ოსიტაშვილები, ასევე რომან ოსიტაშვილის ქვისლი დავით ჭუაძე.
როგორც AMBEBI.GE-ს გარდაცვლილი ოსიტაშვილების ახლობლები უყვებიან, ტრაგედია იმ დროს მოხდა, როცა ოსიტაშვილები და ჭუაძე გურჯაანში მიდიოდნენ.
“ტრაგედია დაგვატყდა თავს, მამა და შვილები დაიღუპნენ. გურჯაანში მიჰყავდა დათო ჭუაძეს ქვისლი საოპერაციოდ, სწორედ ამ დროს მოხდა ავარია. საუბარიც მიჭირს, ვერაფერს ვამბობ” – ჰყვებიან ახლობლები.
რომან ოსიტაშვილი და მისი ვაჟები ახმეტის რაიონის სოფელ ახშნის ველებიდან იყვნენ.
ბაკურციხე – თბილისის დამაკავშირებელ გზაზე მომხდარ ავარიაზე გამოძიება უკვე დაიწყო.