1990-იან წლებში ამ ტერიტორიაზე განთავსებული იყო და ფუნქციონირებდა სამჭედლო, წისქვილი და საწყობები; დასაქმებული იყვნენ ადგილობრივები.
დღეის მდგომარეობით, იმ შენობების ადგილზე მხოლოდ ნანგრევებია დარჩენილი, ხოლო ეზო ადგილობრივებმა ნაგავსაყრელ ზონად აქციეს. იქვე ახლოს, დაახლოებით 50 მეტრის დაშორებით, მოსახლეობა ცხოვრობს. როგორც იქაურები ამბობენ, ისინი, ცდილობენ ხელი შეუშალონ ამ ადგილის ნაგავსაყრელად ქცევას, რამდენჯერ საკუთარი ძალით გაწმინდეს აღნიშნული ადგილი, მაგრამ ჩხუბისა და თხოვნის მიუხედავად, ნაგავს მაინც ყრიან. მოსახლეობა შეშინებულია, რადგან დასახლებულ პუნქტში არსებული ნაგავსაყრელის გამო, არსებობს ეპიდემიის საფრთხე. როგორც ერთ-ერთმა ადგილობრივმა თქვა, რამდენიმე ხნის წინ, ტერიტორიაზე ტომრებით, ეგრეთ წოდებული “ქათმის ჭირით” დახოცილი შინაური ფრინველი წყალმა გამორიყა: _ მას შემდეგ მთელ ქუჩას შინაური ფრინველი დაგვეხოცა, _ ამბობენ ადგილობრივები, _ იქნებ ვინმემ მოგვაქციოს ყურადღება და ამ ტერიტორიას, რომელიც ნაგავსაყრელადაა ქცეული, დავუბრუნოთ ძველი იერსახე.
ჩვენ ადგილზე გავესაუბრეთ სოფლის მაჟორიტარ დეპუტატს გიორგი ჩახვაძეს, რომელმაც საკრებულოს ერთ-ერთ სხდომაზე დააყენა ეს საკითხი: “მე შევიტანე წინადადება აღნიშნული პრობლემის შესახებ საკრებულოს სხდომაზე. იქნებ, გამოჩნდეს ვინმე დაინტერესებული პირი, რომელიც შეიძენს არასასოფლო-სამეურნეო დანიშნულების მიწას, სადაც განახორციელებს ბიზნესს და დაასაქმებს ადგილობრივ მოსახლეობას. ახლა ვარკვევთ, ვის ბალანსზეა ეს მიწა. ადრე ის საწარმო “კომახურის„ ბალანსზე ირიცხებოდა. ამ საწარმოს დღეს-დღეობით ყადაღა ადევს. დავიწყეთ გარკვევა, ახლა აღნიშნული ტერიტორია ეკონომიკის სამინისტროს ეკუთვნის თუ შემოსავლების სამსახურს. მეც და ადგილობრივებსაც გვინდა, რომ ამ საკითხის გადაწყვეტაში ჩაერთოს ლანჩხუთის საკრებულოს თავმჯდომარე, გამგებელი და ყველა ის პირი, ჩემი ჩათვლით, ვინც პასუხს აგებს მოსახლეობაზე. ვინაიდან მიწა არ არის მუნიციპალიტეტის ბალანსზე, ვერ მოხერხდა მისი გამოყენება. ახლა გვაქვს ორი მთავარი მოთხოვნა: პირველი ის, რომ გამოჩნდეს დაინტერესებული პირი, რომელიც შეისყიდის ამ მიწას, გახსნის საწარმოს და დაასაქმებს ადგილობრივებს, მეორე მოთხოვნაა, აღნიშნული მიწა გადავიდეს მუნიციპალიტეტის ბალანსზე და ამის შემდეგ, ვინაიდან სოფლისთვის პრიორიტეტს სწორედ ამ ტერიტორიის პრობლემის მოგვარება წარმოადგენს, პრობლემის გადაწყვეტა მოხდეს სოფლის პროგრამით”, _ გვითხრა დეპუტატმა.
