ამ თემაზე”გურია ნიუსი” სოციალური მომსახურების სააგენტოს გურიის რეგიონული საკოორდინაციო ცენტრის უფროსის მოადგილეს, ლევან ბაიაჯანს ესაუბრა.
_ ამბულატორიული დახმარების კომპონენტი გულისხმობს, როგორც გეგმიურ ამბულატორიულ დახმარებას (უბნის, ან ოჯახის ექიმის კონსულტაცია, სისხლისა და შარდის ანალიზი, ელექტროკარდიოგრამას გაკეთება, აგრეთვე სხვადასხვა დაავადებების მართვა, ცნობების გაცემა და სხვა), ასევე, გადაუდებელ ამბულატორიულ მომსახურებას. აქ იგულისხმება ისეთი ავადმყოფების მომსახურება, რომლებიც გადაუდებელ სამედიცინო დახმარებას საჭიროებენ, მაგრამ არ საჭიროებენ სტაციონარულ მკურნალობას _ მაგალითად: მცირე ტრავმები, ჭრილობები, მოტეხილობები, მცირე ოპერაციები და სხვა.
რაც შეეხება სტაციონარულ დახმარებას, ამ ეტაპზე სახელმწიფო დაზღვევა აფინანსებს მხოლოდ ისეთი დაავადებების მკურნალობას, რომლებიც საჭიროებენ ავადმყოფის მოთავსებას სტაციონარში 24 საათზე მეტი ხნით და მათთვის გადაუდებელი დახმარების აღმოჩენას. ასეთი შეიძლება იყოს სასწრაფო ქირურგიული ოპერაციები, მოტეხილობები, თავის ტვინის ტრავმები და მწვავე დაავადებები, გულსისხლძარღვთა მწვავე უკმარისობა და მრავალი სხვა. დაინტერესებულ პირებს, უფრო დაწვრილებით ინფორმაცია შეუძლიათ მიიღონ სოციალური მომსახურების სააგენტოს ვებგვერდზე www.ssa.gov.ge, სადაც ყველა ინფორმაცია დაწვრილებითაა მოცემული.
_ ანუ, ამ პირობების შემდეგ, პაციენტს არავითარი გადასახადის გადახდა არ მოუწევს?
_ არა, დაზღვევის სხვა, ზოგიერთი პირობისგან განსხვავებით, ეს პირობები სრულად ფინანსდება სახელმწიფოს მიერ.
_ აქვს თუ არა ავადმყოფს სამედიცინო დაწესებულებების არჩევის უფლება?
_ ამბულატორიულ შემთხვევაში, როცა საუბარია საერთო გეგმიურ დახმარებაზე (ექიმთან ვიზიტი), პაციენტს შეუძლია, ამოირჩიოს დაწესებულება და უბნის (ოჯახის) ექიმი, ამისთვის მხოლოდ წინასწარ დარეგისტრირება _ განცხადების სათანადო ფორმის შევსებაა საჭირო. სამკურნალო დაწესებულების ადგილის შეცვლა პაციენტს თვეში მხოლოდ ერთხელ შეუძლია.
რაც შეეხება გადაუდებელ ამბულატორიულ და სტაციონარულ დახმარებას, აქ სამედიცინო დაწესებულებებს პრობლემა არ არის _ ავადმყოფი გადაუდებელ დახმარებას მიიღებს ქვეყნის ნებისმიერ სამედიცინო დაწესებულებებში.
_ თქვენ აღნიშნეთ, რომ დაიწყო საყოველთაო დაზღვევის პირველი ეტაპი. როდის დაიწება მეორე ეტაპი და რას გულისხმობს იგი?
_ საყოველთაო დაზღვევის, უფრო ზუსტად, საყოველთაო ჯანდაცვის მეორე ეტაპი განსაზღვრულია, დაიწყოს ივლისიდან. თუ რას მოიცავს იგი, ჯერჯერობით, დაზუსტებულად ვერ გეტყვით. შემიძლია ვთქვა, რომ დაზღვევის პაკეტი იქნება გაცილებით დიდი და სრულყოფილი. აქ უკვე შევა გეგმიური დაავადებების მკურნალობაც და სხვა კომპონენტები.
_ ბატონო ლევან, მინდა ვისარგებლო შემთხვევით და გკითხოთ ჩოხატაურის საავადმყოფო-პოლიკლინიკის შესახებ. წლები გადის და საავადმყოფოში პირობები არ შეცვლილა, პირიქით _ მატერიალურ-ტექნიკური ბაზა უარესდება, ხელფასები დაგვიანებით რიგდება, იზრდება სამედიცინო პერსონალის უკმაყოფილება. რა ბედი ეწევა ამ საავადმყოფოს?
_ ძალიან რთული და მძიმე შეკითხვაა ჩემთვის, როგორც ექიმისა და უბრალოდ, როგორც ჩოხატაურელისთვის. გული მტკივა, როცა ვუყურებ, როგორ ინგრევა და ნადგურდება ისიც კი, რაც იყო, ეგრეთ წოდებული ინვესტორისთვის მისი გადაცემის შემდეგ. “ეგრეთ წოდებულს” იმიტომ ვამბობ, რომ ორგანიზაციას, რომელმაც მედპერსონალი და შრომითი ანაზღაურება შეამცირა, არც ერთი თეთრი არ დაუხარჯავს დაწესებულების განვითარებისთვის. ასეთ ფირმას არ შეიძლება ინვესტორი უწოდო. რამდენადაც მე ვიცი, აპრილში იწურება ხელშეკრულების ვადა, თუმცა, ჩოხატაურის მედპერსონალისთვის და მგონი, რაიონის ხელმძღვანელობისთვისაც, ხელშეკრულების პირობები ცნობილი არაა. ასეთ ვითარებაში საავადმყოფოს ფუნქციონირების გაგრძელება წარმოუდგენელია. თქვენ იცით, მედპერსონალმა რამდენჯერმე მოაწყო საპროტესტო აქცია დაგვიანებული ხელფასების ასაღებად, ერთხელ გაიფიცნენ კიდეც, მაგარამ მდგომარეობა არ შეცვლილა. დღეისთვის დეკემბრის ხელფასებიც კი არაა გაცემული.
