“სისხლის სამართლის კოდექსში” შესატანი შესაბამისი ცვლილებები იურიდიულ საკითხთა კომიტეტმა გუშინდელ სხდომაზე პირველი მოსმენისთვის განიხილა.
საქართველოს მთავრობის საკანონმდებლო ინიციატივის თანახმად, დანაშაულთა ერთობლიობის დროს საბოლოო სასჯელის დანიშვნისას უფრო მკაცრი სასჯელი შთანთქავს ნაკლებად მკაცრს. დანაშაულის რეციდივის შემთხვევაში, საბოლოო სასჯელის დანიშვნისას უფრო მკაცრი სასჯელი შთანთქავს ნაკლებად მკაცრს ანდა ნაწილობრივ ან მთლიანდ შეიკრიბება ამ დანაშაულთათვის განსაზღვრული სასჯელები. ამასთან, რეციდივის დროს დანიშნული საბოლოო სასჯელის ვადა არ უნდა აღემატებოდეს 30 წელს.
წარმოდგენილი ცვლილებების მიხედვით, განაჩენთა ერთობლიობის შემთხვევაში შესაძლებელი იქნება სასჯელთა ნაწილობრივ ან მთლიანად შეკრება, ან ბოლო განაჩენით დანიშნული სასჯელი შთანთქვას წინა განაჩენით დანიშნული სასჯელის მოუხდელ ნაწილს. ამ შემთხვევაშიც არჩევანს გააკეთებს მოსამართლე კონკრეტული საქმის კონკრეტული გარემოებებისა და განსასჯელის პიროვნებიდან გამომდინარე.
კანონში შესატან ცვლილებებს ექნებათ უკუძალა იმ მსჯავრდებულების მიმართ, რომელთაც დანაშაულთა/განაჩენთა ერთობლიობისას საბოლოო სასჯელი დაენიშნათ აღნიშნული ცვლილებების ამოქმედებამდე.
კანონპროექტის ინიციატორის აზრით, ცვლილებები დადებით გავლენას იქონიებს როგორც სისხლის სამართლის პასუხისგებაში მიცემულ პირებზე, ასევე მოსამართლეებზე. კერძოდ, სისხლის სამართლის პასუხისგებაში მიცემულ პირებს ექნებათ სამართლიანობის განცდა, რადგან ადეკვატურ სასჯელს იხდიან, რაც თავის მხრივ მათ რესოციალიზაციას გააადვილებს. მოსამართლეები კი გათავისუფლდებიან სავალდებულოდ გამოსაყენებელი წესისგან, რომელიც მათ სასჯელის დამოუკიდებლად დანიშვნის შესაძლებლობას ართმევს.
იურიდიულ საკითხთა კომიტეტის წევრებმა მხარი დაუჭირეს “საქართველოს სისხლის სამართლის კოდექსში ცვლილების შეტანის შესახებ’’ კანონპროექტის პლენარულ სხდომაზე პირველი მოსმენისთვის გატანას.
“სისხლის სამართლის კოდექსში” შესატანი ცვლილებებიდან გამომდინარე შესაბამისი ცვლილებები შედის “სისხლის სამართლის საპროცესო კოდექსში”. კომიტეტის სხდომაზე წარმოდგენილი პროექტის თანახმად, ცვლილებების ამოქმედებიდან სამი თვის ვადაში შესაძლებელია სასამართლოსათვის მიმართვა დანაშაულთა და განაჩენთა ერთობლიობის დროს სასჯელის დანიშვნის წესის შეცვლასთან დაკავშირებით ახლად გამოვლენილ გარემოებათა გამო განაჩენის გადასინჯვის მოთხოვნით. დეპუტატების მოთხოვნით, ახალი ნორმის მოქმედების ვადა შეზღუდული აღარ იქნება. კომიტეტის წევრებმა მხარი დაუჭირეს კანონპროექტის პლენარულ სხდომაზე პირველი მოსმენისთვის გატანას.
