ეს შეხვედრა ოზურგეთის მუნიციპალიტეტის საკრებულოს სხდომათა დარბაზში შედგა. სტუმრებმა ადგილობრივ ჩინოვნიკებს თვითმმართველობის რეფორმის კონცეფცია გააცნეს. აქვე განიხილეს საქართველოს მთავრობის მიერ მოწონებული დეცენტრალიზაციისა და თვითმმართველობის განვითარების სტრატეგია.
შეხვედრას, საქართველოს რეგიონული განვითარებისა და ინფრასტრუქტურის სამინისტროსთან არსებული მრჩეველთა საბჭოს წევრები, დავით ლოსაბერიძე და კოტე კანდელაკი ესწრებოდნენ.
თენგიზ შერგელაშვილმა ადგილობრივი ხელისუფლების წარმომადგენლებს დეტალური ინფორმაცია მიაწოდა, დაგეგმილი რეფორმის შესახებ და უთხრა, რომ უნდა ჩაერთონ რეფორმის მომზადების პროცესში და გამოთქვან საკუთარი შენიშვნები და მოსაზრებები.
კოტე კანდელაკი, ინფრასტრუქტურის სამინისტროსთან არსებული მრჩეველთა საბჭოს წევრი:
_ იყო საუბარი, რომ ამ სტრატეგიის შემუშავების დროს, არ იყო გამჭვირვალე პროცესი, მაგრამ არჩევნების შემდგომ, როცა დაკომპლექტდა სამინისტროები, დეკემბრის თვეში სამინისტროსთან შეიქმნა საბჭო, სადაც შევიდნენ არასამთავრობო ორგანიზაციების წარმომადგენლები და აქტიური მონაწილეობაც მიიღეს ამ კონცეფციის შემუშავებაში. ერთადერთი, რაც ცოტა განსხვავებულ აზრს იწვევს, ეს არის სამხარეო წარმომადგენლობითი ორგანოების ჩამოყალიბების წესი.
ამირან გიგინეიშვილი, ლანჩხუთის მუნიციპალიტეტის საკრებულოს თავმჯდომარე:
-როდესაც ეს პროექტი იქმნებოდა, მე ვიყავი გურიის კოორდინატორი და გარკვეული წვლილიც მაქვს მიღებული პროექტის შექმნაში. აქ საუბარია იმაზე, რომ მეტი ადეკვატური მომსახურება მიეწოდოს ადგილობრივ მოსახლეობას, რომელიც ნაკლებად არის ჩართული პროცესებში, როცა მუნიციპალიტეტი არის დიდი. შემოსავლის წყარო არ იყო საკმარისი მუნიციპალიტეტის არსებობისთვის. არსებული კანონპროექტი კი გარკვეულ ბალანსს ქმნის.
თენგიზ შერგელაშვილი, რეგიონული განვითარების მინისტრის მოადგილე:
_დღეს ვიმსჯელეთ საქართველოს მთავრობის დეცენტრალიზაციისა და თვითმმართველობის განვითარების სტრატეგიის ძირითად პრინციპებზე, ასევე ცალკეულ საკითხებზე გაიმართა დისკუსიაც. პირველი შეხვედრა გაიმართა გურიაში. როგორც წინასწარ განვაცხადეთ, ჩვენ ამ რეფორმის ყველა ეტაპზე აქტიურ კონსულტაციებს გავივლით ცენტრალურ ხელისუფლებასთან.
2013 წელს რეგიონებში გასახორციელებელი პროექტებისთვის 200 მილიონი ლარია გათვალისწინებული, ანუ 140 მილიონით მეტი, ვიდრე ამავე ფონდისთვის 2012 წელს იყო გამოყოფილი. განისაზღვრა საპროექტო წინადადებების პრიორიტეტებიც – ფონდიდან დაფინანსება გამოიყოფა წყლის სისტემების, ხიდების, გზების, გარე განათებისა და ა.შ. სხვა მშენებლობა-რეაბილიტაციისთვის. რეგიონებში გასახორციელებელი ფონდიდან დაფინანსების მისაღებად პროექტების წარდგენის უფლება აქვთ, როგორც თვითმმართველ ერთეულს (მუნიციპალიტეტს), ისე სახელმწიფო რწმუნებულს. პროექტების მიღება რეგიონული განვითარებისა და ინფრასტრუქტურის სამინისტროში უკვე დაწყებულია და მათი მიღება 11 მარტს, 16:00 საათზე შეწყდება. შესაბამისად, მუნიციპალიტეტების წარმომადგენლებსა და სამხარეო რწმუნებულებს შეუძლიათ, საპროექტო წინადადებები დამტკიცებული ფორმით, უკვე სამინისტროს წარუდგინონ.
