შეხვედრას ესწრებოდნენ გაეროს ქალთა ორგანიზაციის ექსპერტები და წარმომადგენლები, ასევე გენდერის საკითხებზე მომუშავე არასამთავრობო ორგანიზაცია “თანაზიარი”, სტუდენტები, პროფესორ–მასწავლებლები და საზოგადოების ფართო ფენა. სპეციალურ სტუმრად მიწვეული იყო მწერალი დავით ტურაშვილი, რომელმაც ქალთა მიმართ ძალადობის თემაზე შექმნილი საკუთარი პიესა “დოდოს მოლოდინში” წაიკითხა.
ირინა ჯაფარიძე, გაეროს ქალთა ორგანიზაციის წარმომადგენელი: “ქალთა საერთაშორისო დღის აღსანიშნავად, გენდერული კვირეულის ფარგლებში, გაეროს ერთობლივი პროგრამა _ “გენდერული თანასწორობის ხელშწყობისთვის საქართველოში” ატარებს რამდენიმე ღონისძიებას. ღონისძიებების ციკლი დაიწყო თელავში 3 მარტს ფოტოგამოფენით, დღეს მორიგი ღონისძიება ტარდება ზუგდიდში და სიმბოლურია, რომ სწორედ ბატონი დათო ტურაშვილის პიესა “დოდოს მოლოდინი” იკითხება, რადგან ეს პიესა შეეხება ქალთა მიმართ ძალადობის თემას, უფრო ეკონომიკურ ძალადობას და შრომითი მიგრაციის საკითხებს. ეს პიესა შეიქმნა გაეროს ქალთა ორგანიზაციისა და მარჯანიშვილის თეატრის ერთობლივი ინიციატივის ფარგლებში. ეს იყო კონკურსი “ქალთა მიმართ ძალადობის თემაზე” ახალგაზრდა დრამატურგებისათვის და გამარჯვებული 9 პიესა დაიბეჭდა კრებულად, რომელსაც ჰქვია “9 პიესა ძალადობის წინააღმდეგ”. სწორედ ამიტომ აქვს მარჯანიშვილის თეატრს სურვილი თავის სცენაზე გააცოცხლოს დათოს პიესა.”
დათო ტურაშვილი, მწერალი: “ძალიან მიხარია, რომ ასეთი ტიპის ღონისძიებები იმართება. დღეს მე აქ შევხვდი ახალგაზრდებს და მოხარული ვარ, რომ ისინი ასეთი აქტიურები და განათლებულები არიან. თუ გვინდა, რომ თანამედროვე და დემოკრატიულ ქვეყანაში ვიცხოვროთ, არ უნდა იყოს არანაირი ძალადობა და განსაკუთრებით ქალების მიმართ. ყველას გვევალება არ ვიყოთ გულგრილები არანაირი ძალადობის მიმართ. მინდა ვისარგებლო შემთხვევით და დიდი მადლობა ვუთხრა საქართველოს მორაგბეთა ნაკრებს, რომლებიც პირველ ავანგარდში არიან ქალების უფლებების დაცვით”.
შეხვედრაზე იმყოფებოდა ზუგდიდის ერთ-ერთი პროკურორი ქეთი ყიფიანიც. როგორც მან აღნიშნა, ძალადობა არის არასრულფასოვნების კომპლექსი. ეს თემა ძალიან ჩაკეტილია. მიმართავენ მაშინ, როცა უკიდურესობას აქვს ადგილი.
შეხვედრა მიზნად ისახავდა ქალთა მიმართ ძალადობისა და დისკრიმინაციის შესახებ საზოგადოებრივი ცნობიერების ამაღლებას და ამ საკითხებზე სამოქალაქო საზოგადოების, მათ შორის, მედიის ძალისხმევის გააქტიურებას.
ღონისძიება გაგრძელდა შალვა დადიანის სახელობის თეატრის ფოიეში გამოფენით – “ქალთა საკითხი საქართველოში მე-19–მე-20 საუკუნეების მიჯნაზე”.
