ამ უკიდურესად მძიმე გადაწყვეტილების საფუძველი, უნივერსიტეტის რექტორის ლაშა გოცირიძის ინფორმაციით, ის, რბილად რომ ვთქვათ, ღიმილისმომგვრელი “ხარვეზებია”, რომლებიც განათლების ხარისხის ცენტრმა, სასწავლებლის ავტორიზაციისას აღმოაჩინა.
“ხარვეზად ჩაგვეთვალა, რომ პირველკურსელების ერთი ნაწილი სოციოლოგიას სწავლობს პირველ სემესტრში, კლასიკურ ლიტერატურას – მეორე სემესტრში, ხოლო მეორე ნაწილი კი პირიქით. მაგალითად, იმის გამო, რომ ჩვენი დოკუმენტაცია კარგად ვერ შეისწავლეს და ვერ იპოვეს ბევრი შრომითი ხელშეკრულება (რომელიც გვქონდა და გვაქვს), დაასკვნეს, რომ ჩვენ 30-ზე მეტი ლექტორი გვაკლია. არა და ეს ლექტორები მუშაობენ და გიკითხავენ ლექციებს.
შენიშვნად არის მითითებული, რომ “ადამიანური რესურსების მართვა” წერია სილაბუსში, ხოლო პროგრამაში – “ადამიანური რესურსების მენეჯმენტი.” მაგალითად, ზოგიერთი ლექტორის (მეშვილდიშვილი, თავაძე და სხვები) კვალიფიკაციაში ეჭვი ისე შეიტანეს, რომ მათთან გასაუბრებაც კი არ სცადეს; აკადემიკოს თენგიზ ურუშაძის კვალიფიკაციაში ჩაწერეს, რომ ის გაზეთის რედაქტორია. მაგალითად, ხარვეზად მოინათლა, რომ ჩვენს ბიბლიოთეკაში არ აღმოჩნდა 1727 წელს გამოცემული რარიტეტი (რომელიც ბერლინის უნივერსიტეტის ბიბლიოთეკაში ინახება), და არ გაითვალისწინეს, რომ მის ელექტრონულ ვერსიას ლევან ტატიშვილი აწვდის სტუდენტებს საჭიროებისამებრ. ასეთი მაგალითები ბევრია…”
ლაშა გოცირიძის წერილიდან ირკვევა, ყოფილი პროფესორების საჩივრის საფუძველზე, განათლების ხარისხის ცენტრმა უნივერსიტეტში აუდიტი მიავლინა, რომლებმაც აგრარულ უნივერსიტეტში დარღვევა აღმოაჩინეს. რის საფუძველზეც 11 მარტს განათლების ხარისხის ცენტრში გაიმართება საბჭოს სხდომა, აგრარულს უნდა შესაძლოა ჩამოერთვას ავტორიზაცია ან აკრედიტაცია.
“გურია ნიუსს” რამდენიმე სტუდენტი დაუკავშირდა, რომლებიც ამბობენ, რომ მათთვის მიუღებელია პოლიტიკური მოსაზრებების გამო, ქვეყანაში ერთადერთი აგრარული უნივერსიტეტი დაიხუროს და ფართომასშტაბიანი, პერმანენტული აქციების გამართვას გეგმავენ. პროტესტის პირველ დღედ ისინი 11 მარტს ასახელებენ და მხარდამჭერებს 4 საათზე, სპორტის სასახლესთან შეკრებისკენ, შემდეგ კი განათლების ხარისხის ცენტრთან გადაადგილებისკენ მოუწოდებენ. სწორედ ამ დღეს, 7 საათზე უნივერსიტეტის ბედი გადაწყდება.
აგრარული უნივერსიტეტის “ფეისბუქის” დახურული ჯგუფის “ქავერის” ფოტოზე გაჩნდა წარწერა “11 მარტს ჩვენ დავიცავთ აგრარულ უნივერსიტეტს!!!”
აქვე წერია: “აგრარული უნივერსიტეტისა და მისი მფლობელის ბატონი კახა ბენდუქიძის წინააღმდეგ წამოწყებულია პოლიტიკური დევნის კამპანია, რომელიც მიზნად ისახავს აგრარული უნივერსიტეტისთვის ავტორიზაციის ჩამორთმევას და ზოგადად ბატონი ბენდუქიძის საკუთრებისგან განთავისუფლებას. ამ მიზეზით 14 მარტს 4 საათზე იმართება აგრარული უნივერსიტეტის მხარდამჭერი აქცია, რომელიც აპოლიტიკურ ხასიათს ატარებს. ეს აქცია გაგრძელდება საბოლოო შედეგის მიღებამდე. სხდომა ამ საკითხზე დაიწყება 7 საათზე. აქცია იწყება სპორტის სასახლესთან. მობრძანდით და დაუჭირეთ მხარი უნივერსიტეტს, რომელიც ისეთ აგრარულ ქვეყანას, როგორიც არის საქართველო, მისცემს ახალ ბიძგს განვითარებისთვის. ნუ მივცემთ საშუალებას წარსულს აწმყოში თავის გამოჩენისა.”
უნივერსიტეტის რექტორის თქმით, “ყოფილი პროფესორების საჩივრის საფუძველზე განათლების ხარისხის ცენტრმა უნივერსიტეტში გამოაგზავნა რევიზია. მათ დადეს დასკვნა ხარვეზების შესახებ.
26 და 28 თებერვალს იყო განხილვები ავტორიზაციის (და არა აკრედიტაციის) საბჭოს სხდომაზე, სადაც ჩვენ შევეცადეთ დაგვერწმუნებინა ყველანი, რომ: 1) უნივერსიტეტი განათლების ხარისხთან მიმართებაში ყველა აუცილებელ მოთხოვნას აკმაყოფილებს 2) უნივერსიტეტის მიერ გაცემული განათლების ხარისხი დღითიდღე უმჯობესდება 3) ის ფორმალური ხარვეზები, რომელიც დაფიქსირდა უკვე გამოსწორებულია. თუმცა, რომც არ გამოსწორებულიყო, არც ერთ ხარვეზს განათლების ხარისხის გაუარესება არ გამოუწვევია და პირიქით, ასეთი ფორმალური ხარვეზების გამოსწორებით შინაარსობრივად განათლების ხარისხი არ გაუმჯობესებულა ანუ საუბარია ბიუროკრატიისთვის საჭირო ქაღალდების/დოკუმენტების გასწორებაზე. 4) სარევიზიო ჯგუფმა არა სრულყოფილად და არასათანადოდ ჩაატარა რევიზია და ბევრი არასწორი, ზოგიერთ შემთხვევაში სასაცილო დასკვნაც კი დადო. გვეგონა, რომ ასეთ სასაცილო ხარვეზებს საბჭო მხედველობაში არც კი მიიღებდა. თუმცა სამწუხაროდ, მოგვიწია სერიოზული მტკიცება და კამათიც კი.”
გოცირიძე იმედოვნებს, რომ საბჭო გონივრულ გადაწყვეტილებას მიიღებს, თუმცა, შიშობს, რომ საბჭომ პოლიტიზირებული გადაწყვეტილება არ მიიღოს: “მიუხედავად ამისა, მთლიანობაში, მე ვფიქრობ, რომ საბჭო მიიღებს გონივრულ, სწორ და სამართლიან გადაწყვეტილებას და ჩვენი უნივერსიტეტის ავტორიზაცია კითხვის ნიშნის ქვეშ აღარ დადგება. ამის შემდეგ, ჩვენ მოგვიწევს აკრედიტაციის საბჭოზე (ეს კიდევ ერთი საბჭოა) ცალკე ვამტკიცოთ განათლების ხარისხის სტანდარტებთან აგრარულის შესაბამისობა. მე თითქმის დარწმუნებული ვარ, რომ ორივე საბჭოზე პრობლემა არ შეგვექმნება, თუნდაც იმ მარტივი მიზეზის გამო, რომ თუ აგრარულს უნდა ჩამოერთვას ავტორიზაცია ან აკრედიტაციები, სამართლიანობა მოითხოვს, რომ ჩვენამდე ძალიან ბევრ კერძო და სახელმწიფო უნივერსიტეტსაც უნდა ჩამოერთვას. საბჭოს წევრებმაც კარგად იციან, თუ რა მდგომარეობაა ჩვენთან და სხვა უნივერსიტეტებში – ამიტომ სწორი და სამართლიანი გადაწყვეტილების იმედი მაქვს. მიუხედავად ამისა, შეშფოთების საფუძველი მაინც არსებობს – მეშინია, რომ საბჭომ პოლიტიზებული გადაწყვეტილება არ მიიღოს…”
“გურია ნიუსი” აგრარული უნივერსიტეტის ირგვლივ შექმნილ მდგომარეობასთან დაკავშირებით “განათლების აკრედიტაციის ეროვნული ცენტრის” პრესსამსახურის ხელმძღვანელს მაკა ბერაიას ესაუბრა:
“კონკრეტულად რა ხარვეზი აღმოაჩინა აუდიტმა, ამის შესახებ საბჭოსთვის არის ცნობილი. ეს არის დამოუკიდებელი საბჭო, რომელსაც ირჩევს საქართველოს პრემიერ-მინისტრი.
ჩვენი ცენტრის დირექტორის დავალებით, 3 იანვრის ბრძანებით, შეიქმნა მონიტორინგის ჯგუფი რომელსაც დაევალა საქართველოს აგრარულ უნივერსიტეტში გადაემოწმებინა ავტორიზაციის და აკრედიტაციის სტანდარტების შესრულება. ჯგუფმა მუშაობა დაასრულა და მოამზადა დასკვნა, რომელიც გადაეგზავნა აგრარულ უნივერსიტეტს და ასევე განიხილა საბჭომ.
საბჭოს სხდომა 11 მარტს არის დაგეგმილი, სადაც გაგრძელდება საკითხის განხილვა. რა შედეგსაც დადებს საბჭო, ეს საჯარო ინფორმაციაა და განთავსდება ჩვენი ცენტრის ვებ გვერდზე”.
უკავშირდება თუ არა აგრარულ უნივერსიტეტში აუდიტის შესვლა კახა ბენდუქიძის ფაქტორს, ბერაიას განმარტებით, “ეს ბედუქიძის ფაქტორს არანაირად არ უკავშირდება. თვითონ აგრარულიდან დათხოვნილმა პროფესორებმა სამინისტროს მიმართეს და ითხოვეს ავტორიზაციის და აკრედიტაციას სტანდარტების გადამოწმება. ისინი ამბობდნენ, რომ იყო დარღვევები და ამ მიზნით შეიქმნა მონიტორინგის ჯგუფი, რომელმაც იმუშავა აგრარულ უნივერსიტეტში.”
