მათ შორის იუსტიციის უმაღლესი საბჭოს დაკომპლექტების ნაწილშიც, რაც ოპოზიციის ყველზე დიდ უკმაყოფილებას იწვევდა. ინფორმაციაში რომელსაც იუსტიციის სამინისტრო ავრცელებს ნათქვამია:
“ვენეციის კომისიის რეკომენდაციების შესაბამისად, კანონის გარდამავალ დებულებებში გათვალისწინებული უნდა იყოს მოსამართლეთა კონფერენციის ადმინისტრაციული კომიტეტის მიერ მანამდე არჩეული იუსტიციის უმაღლესი საბჭოს წევრების მანდატის განახლების საკითხი. ამგვარი რეკომენდაცია ნიშნავს იმას, რომ არადემოკრატიული წესით არჩეული შემადგენლობა უნდა დაექვემდებაროს ახალ, დემოკრატიულ არჩევნებზე დაფუძნებულ წესებს.”
როგორც ამ ინფორმაციიდან ჩანს, საბჭოს მოსამართლე წევრებისთვის მანდატის გაგრძელება პროექტით დადგენილი დემოკრატიული წესით მოხდება.
ყოფილი მოსამართლე მერაბ ტურავა ამბობს, რომ უფლებამოსილება საბჭოს იმ მოსამართლე წევრებს უნდა გაუგრძელდეთ, რომლებიც მოსამართლეთა კონფერენციამ აირჩია. ტურავას თქმით, მოსამართლე წევრების აბსოლუტური უმრავლესობა არჩეულია არა კონფერენციის, არამედ 9 წევრისაგან დაკომპლექტებული ადმინისტრაციული ორგანოს მიერ, რომელსაც უზენაესი სასამართლოს თავმჯდომარე კოტე კუბლაშვილი აკონტროლებს.
“მოსამართლეს, რომელიც იუსტიციის საბჭოს წევრია და თავის დროზე ზუსტად იგივე წესით და პროცედურით იყო არჩეული, როგორსაც ახალი კანონი ითვალისწინებს, უფლებამოსილება არ უნდა შეუწყდეს. საქმე იმაშია, რომ ბევრი მათგანი კონფერენციის ადმინისტრაციულმა კომიტეტმა აირჩია, რომელიც 9 წევრისაგან შედგება და რომლის თავმჯდომარეც კუბლაშვილია. მათი არჩევის წესი ახალი კანონპროექტით დადგენილ სტანდარტს ვერ აკმაყოფილებს, მათი არჩევა მოხდა არადემოკრატიულად და შესაბამისად, უნდა გათავისუფლდნენ.
ახალი პროექტით მხოლოდ მოსამართლეთა კონფერენცია აირჩევს საბჭოს მოსამართლე წევრებს, მხოლოდ რიგით მოსამართლეებს და მხოლოდ ფარული კენჭისყრით. ამავე დროს და ყველას აქვს კანდიდატურის დაყენების უფლება. ეს არის აბსოლუტურად დემოკრატიული პროცესი,” _ აცხადებს მერაბ ტურავა “გურია ნიუსთან”.
იუსტიციის საბჭოს მოსამართლე წევრები: მამია ფხაკაძე, გიორგი შავლიაშვილი, ილონა თოდუა და მიხეილ ჩინჩალაძე არჩეულები არიან არა მოსამართლეთა კონფერენციის, არამედ კონფერენციის ადმინისტრაციული კომიტეტის მიერ.
