ამ ეტაპზე მოქმედებს ერთჯერადი სოციალური დახმარების პროგრამა.
საზოგადოების ნაწილმა ვერ გაიგო, რა კატეგორიაზე გაიცემა დახმარება. “გურია ნიუსს” რამდენიმე განაწყენებულმა ადამიანმა მიმართა. ერთმა ქალბატონმა გვითხრა, განცხადება არ მიიღეს, არადა მრავალშვილიანი ვარო. მეორემ _ ომის ვეტერანი ვარ და დახმარებაზე უარი მითხრესო. საკრებულოს შენობაში ქალბატონი შეგვხვდა, რომელმაც გვითხრა, ახლა ვიყავი საბუთების ჩასაბარებლად და განცხადება არ მიიღეს, დღეს უკვე აღარ მიიღება განცხადებებიო.
ხალხისთვის საინტერესო შეკითხვებზე პასუხი რომ მიგვეღო, ჩვენ აბაშის მუნიციპალიტეტის გამგეობის შრომის, ჯანმრთელობისა და სოციალური დაცვის სამსახურის უფროსს, მამუკა თელიას ვესაუბრეთ.
– ბატონო მამუკა, საზოგადოების ნაწილმა ვერ გაიგო, დახმარების რა სახის პროგრამა მოქმედებს ამ ეტაპზე, ზოგს საერთოდ არ ჰქონდა ინფორმაცია ამ დახმარებების შესახებ და დღეს მოვიდა განცხადების შემოსატანად, მაგრამ უარი ეთქვათ. როგორ მოხდა ინფორმაციის გავრცელება და რატომ არ მიიღეს ამ ადამიანების განცხადებები?
– სულ 11 პროგრამა გვაქვს _ ომის მონაწილე გარდაცვლილ ვეტერანთა ოჯახების, გარდაცვლილ დევნილთა ოჯახების, ომის მონაწილე ვეტერანების, შეზღუდული შესაძლებლობის მქონე ბავშვების, მე-3 და მეტი ახალშობილი მრავალშვილიანი ოჯახების, დედ-მამით ობოლი ბავშვების, ერთჯერადი სოციალური, მოსახლეობის სამედიცინო სტაციონარული მომსახურების, 100 და ასზე უხნესი ასაკის უხუცესთა, სტიქიით მიყენებული ზარალისას (ხანძარი, ქარი, წყალდიდობა) დარჩენილი ოჯახების დახმარების პროგრამები. პროგრამების მიზანია აღნიშნული სტატუსის მქონე პირებისა და ოჯახებისათვის მატერიალური დახმარების გაწევა.
ამ ეტაპზე არის ერთჯერადი სოციალური დახმარების პროგრამა, სარეიტინგო ქულით 200 000-მდე, ვისაც აქვს ჯანმრთელობის პრობლემა და ყოფითი პრობლემა. თუ ჯანმრთელობის პრობლემა აქვთ, უნდა წარმოადგინონ ფორმა 100, რომლის აღება ამბულატორიებში უფასოა, ხოლო ვისაც აქვს სოციალური პრობლემა, მაშინ უნდა წარმოადგინონ ტერიტორიული ორგანოს ხელმძღვანელისგან რეკომენდაცია, სოციალურად დაუცველობის მოწმობის ასლი. ამ პროგრამით შეუძლიათ ისარგებლონ იმ მოქალაქეებს და მათ შორის იძულებით გადაადგილებულ პირებს, რომლებიც აბაშის ტერიტორიაზე არიან რეგისტრირებულნი. დახმარების თანხა განისაზღვრება 100-500 ლარით, სიმძიმის მიხედვით. რაც შეეხება ინფორმაციის გაცემას, სოფლების რწმუნებულებმა იციან, რომ მოქმედებს ეს პროგრამა და თუ მათ სოფელში არიან ისეთი ადამიანები, რომლებიც კატეგორიაში ხვდებიან, აფრთხილებენ.
მართალი ხართ, დღეს მისულ ადამიანებს უარს ეტყოდნენ, რადგან განცხადებების მიღება შეწყდა გუშინ. სამწუხაროდ, პროექტისთვის გამოყოფილი თანხა ახლა მეტის საშუალებას არ გვაძლევს.
– როგორც ვიცი, ეს პროექტი ადგილობრივი ბიუჯეტიდან ფინანსდება. რამდენი იყო პროექტის განხორციელებისთვის გამოყოფილი თანხა?
– დიახ, პროექტი ადგილობრივი ბიუჯეტიდან ფინანსდება. გამოყოფილი იყო 60 000 ლარი. პირველი სხდომა გვქონდა 2013 წლის 25 თებერვალს. იმ დროისთვის რა განცხადებებიც იყო შემოსული, განვიხილეთ. პირველ ეტაპზე შესული განცხადებებიდან დღეისათვის 84 ოჯახმა მიიღო დახმარება, ახლა კი მიმდინარეობს მეორე ეტაპზე შესული განცხადებების განხილვა.
– ვისაც დატოვებული აქვს განცხადება, მეორე ეტაპზე ყველა დაკმაყოფილდება?
– სწორედ ამიტომ მიმდინარეობს განხილვა, იყო შემთხვევა, როცა აბაშაში არ იყო პიროვნება რეგისტრირებული, ასევე, ფორმა 100 იყო 2008 წლის. თუ საბუთები არ იქნება წესრიგში, რა თქმა უნდა, ვერ დაკმაყოფილდებიან. ჩვენ გვყავს კონტროლზე აყვანილი პიროვნებები, მათ შარშან მოგვმართეს და ვნახეთ, რომ საკმაოდ მძიმე მდგომარეობა აქვთ და წელს პირადად შევატყობინეთ.
– ჩვენ მოგვმართა რამდენიმე ადამიანმა და გვითხრა, რომ ფორმა 100 მოითხოვეს მაშინ, როცა ისინი ჯანმრთელობის კი არა, სოციალური მდგომარეობის გამო ითხოვდნენ დახმარებას. გარდა ამისა, თქვენ წეღან თქვით, რომ ფორმა 100–ის აღება უფასოა, ჩვენ კი გვითხრეს, რომ 5 ლარი გადაიხადეს.
– ვინც ჩვენ მოგვმართავს, ყველას ვაკვალიანებთ. ფორმა 100-ის აღება პოლიკლინიკაში, ამბულატორიებში უფასოა, თუ კერძო კლინიკაში მივიდნენ, არ ვიცი.
– თანხის გაცემა როგორ ხდება?
– შედგება კომისიის სხდომის ოქმი, რომელშიც შედის ყველა მონაცემი, მოაწერს ხელს კომისიის ყველა წევრი, კეთდება მოხსენებითი ბარათი კომისიის თავმჯდომარის მიერ საკრებულოს სახელზე, ბრძანების პროექტს ხელს მოაწერს საკრებულოს თავმჯდომარე, მერე გადმოეგზავნება გამგეობას და გამგეობიდან ეგზავნება ბანკს. თანხა ერიცხებათ სიაში შეტანილ ადამიანებს პირად ანგარიშზე. პირადობის მოწმობით მიდიან ბანკში და იღებენ ფულს.
– ბევრი ადამიანი დარჩა დახმარების გარეშე. გაგრძელდება პროგრამა?
– თუ ბიუჯეტში მოინახა თანხა, აუცილებლად გავაგრძელებთ ამ პროგრამებს. პრობლემები ბევრია, დახმარება ბევრს სჭირდება, რასაც შევძლებთ, მაქსიმალურად გავაკეთებთ.
