_ ერთი მოკრძალებული რჩევა ჟურნალისტებს _ დებატებს აგრარული უნივერსიტეტისთვის ავტორიზაციის შეჩერების მიზანშეწონილობასთან დაკავშირებით ნებისმიერ შემთხვევაში ექნება პოლიტიკური ხასიათი და მას ცოტა საერთო ექნება განათლებასთან. თუმცა, ძალიან საინტერესო იქნება გაიმართოს დისკუსია თავად ავტორიზაცია–აკრედიტაციის კრიტერიუმების ვარგისიანობასთან დაკავშირებით, ვინ და რა არგუმენტებით ეცდება ამ კრიტერიუმების დაცვას.
შევხედოთ სიმართლეს თვალებში _ უმაღლესი სასწავლებლების ავტორიზაცია–აკრედიტაციაზე კამათი ამით არ დასრულდება და ამ გზით შევალთ ჩიხში, რაც განათლების პროცესს ნამდვილად არ წაადგება. სიმართლე კი ისაა, რომ სრულიად უვარგის სისტემასთან გვაქვს საქმე – თავად შემოწმების კრიტერიუმები არ იძლევა იმის დანახვის საშუალებას, რეალურად როგორი ხარისხის განათლებას იძლევა ესა თუ ის უმაღლესი. ამ კრიტერიუმებით გაამტყუნებ, ვისაც გინდა და გაამართლებ, ვისაც გინდა. თავისი არსით ეს არის კორუფციული სისტემა, რომელიც იძლევა ჩაწყობების, გარიგებების საშუალებას.
ეგრეთ წოდებულ მარიფათიან პირებს ფართო ასპარეზი ეძლევათ, რათა ამ პროცესში ჩაერთონ და შუამავალ–მომრიგებლის მანტია მოირგონ.
ვინც ამ სფეროში ერკვევა, ამ სისტემის ვარგისიანობაზე არ იდავებს და ვინ გვაძალებს ახლა, რომ უვარგისი კრიტერიუმებით შევაფასოთ რომელიც გინდა სასწავლებელი, რას მოგვცემს ეს კარგს და დადებითს.
ამგვარი კრიტერიუმები ძალიანაც აწყობდა წინა ხელისუფლებას, რაც, სურვილის შემთხვევაში, მას უმაღლესებისადმი პოლიტიკური მიზანშეწონილობით მიდგომის საშუალებას აძლევდა, მაგრამ თუ განათლების ხარისხის ამაღლება გვსურს და არა მხოლოდ ფორმალური აქტივობები, შესაცვლელია და თავიდან არის შესამუშავებელი ავტორიზაცია–აკრედიტაციის წესი, რათა მან რეალური ვითარება დაგვანახოს. საქართველოში არიან ამ საქმის სპეციალისტები, რომელთაც ამისთვის დიდი დრო არ დასჭირდებათ.
ახალი წესის შემუშავებამდე, უმჯობესი იქნება ავტორიზაცია–აკრედიტაციის პროცესზე დროებით მორატურიუმი გამოცხადდეს, ვინაიდან მისი გაგრძელება არავითარ სარგებელს არ მოიტანს და მხოლოდ არაფრისმომცემ დებატებს გამოიწვევს, იქნება დიდი ვნებათღელვა, თუმცა, საზოგადოება ვერ გაიგებს, რატომ ისჯება ერთი უმაღლესი და არ ისჯება მეორე. გამოჩნდებიან ამ გაურკვევლობის პოლიტიკური მიზნებით გამოყენების მსურველნიც. ცხადია ერთი რამ, არსებული სისტემა არის მანკიერი და იგი აუცილებლად უნდა გამოიცვალოს უმოკლეს ხანში, _ აღნიშნა “გურია ნიუსთან” საუბრისას მაღლაფერიძემ.
