კომისიის აზრით, პროექტის ეს ნაწილი ბუნდოვანია და დახვეწას საჭიროებს. კომისია ფიქრობს, რომ ვიდეოკამერა, განსაკუთრებით სისხლის სამართლის საქმეების განხილვის დროს, ბევრ პრობლემას შექმნის, რადგან, შესაძლოა, დაირღვეს მოწმის, დაზარალებულის ან განსასჯელის უფლება, დაცული იყო მისი პირადი და ოჯახური ცხოვრების საიდუმლო გასაჯაროებისგან.
ამავე დროს, კომისია ფიქრობს, რომ პროცესის აუდიოჩაწერა ნაკლები საფრთხის შემცველია და მისი დაშვება სავსებით შესაძლებელია.
იუსტიციის მინისტრი თეა წულუკიანი აცხადებს, რომ დღეს, ქართულ საზოგადოებას გამჭვირვალე და ღია მართლმსაჯულება სჭირდება, შესაბამისად, სასამართლო პროცესებზე, მინიმუმ, ერთი ვიდეოკამერა იმუშავებს.
“მედიასთან გვქონდა ძალიან სერიოზული და შორს მიმავალი რეფორმა. გვინდოდა, რომ მედია ყოფილიყო (და ეს სურვილი ძალაში რჩება) მაქსიმალურად წარმოდგენილი სასამართლო დარბაზში, მაგრამ იმ წესების დაცვით, რაც საშუალებას მისცემდა მოსამართლეს, განეხორციელებინა მართლმსაჯულება. ვენეციის კომისიამ მოიწონა ის, რომ მედიას ჰქონდეს აუდიოჩაწერის უფლება. მიუხედავად იმისა, რომ ვენეციის კომისიამ ამ საკითხთან დაკავშირებით დასვა ბევრი შეკითხვა, ჩვენ ვრჩებით იმ აზრზე, რომ საზოგადოებრივ მაუწყებელს ჰქონდეს ის მდგომარეობა, რაც უნდა ჰქონდე ხალხის წარმომადგენელ ტელევიზიას _ ფიქსირებული კამერის საშუალებით მოახდინოს მისთვის ანუ საზოგადოებისთვის საინტერესო პროცესის ჩაწერა და ტრანსლაცია.”
იუსტიციის მინისტრის თქმით, ვენეციის კომისიის რეკომენდაცია მოწმის დაცვას და მართლმსაჯულების სწორად გახორციელებას გულისხმობს, ამავე დროს, თავიდან უნდა იქნას აცილებული გადაღებული მასალის ფართოდ გაცემის შესაძლებლობა.
“ამ საკითხზე ვენეციის კომისიას გაუჩნდა ძალიან ბევრი შეკითხვა, თუმცა, როგორც მათი დასკვნიდან ვხედავ, ჩვენთან შეხვედრის შემდეგ მან დაუშვა აზრი, რომ ქართულ საზოგადოებას სჭირდება მაქსიმალური გამჭვირვალე მართლმსაჯულება, თუნდაც, ვიდეო გადაღებების გზით. კომისიამ მოგვცა რამდენიმე რეკომენდაცია, რომ დაცული იყოს მოწმის უფლება, რომ დაცული იყოს მართლმსაჯულების სწორად გახორციელების პრინციპი და ნუ მივცემთ იმ გადაღებულ მასალას ფართოდ გაცემის საშუალებას და ა.შ. ამაზე დღეს ვმსჯელობთ, რომ მოვახდინოთ კანონპროექტში დაზუსტებები და დავიცვათ მთავარი პრინციპი _ სასამართლო ხალხისთვის უნდა გაიხსნას და ეს ვერ მოხდება ისე, თუ მედიისთვის არ იქნება პროცესი გახსნილი,” _ აცხადებს იუსტიციის მინისტრი
