წამლის მწარმოებელი კომპანიის ინფრასტრუქტურის შიდა პერიმეტრი მთლიანად ავტომატიზირებულია. მედიის წარმომადგენლებმა დაათვალიერეს მაღალი ტექნოლოგიებით აღჭურვილი ლაბორატორია, წამლის წარმოების და შეფუთვის პროცესი.
“გურია ნიუსის” კითხვაზე, _ რამდენად ახერხებს სახელმწიფო ადგილობრივი წარმოების წამლის შესყიდვას, ფარმაცევტული კომპანია “ავერსის” დამფუძნებელმა პაატა კურტანიძემ განაცხადა, რომ: “2011 წელს მიღებული იქნა ბრძანება, რომლის საფუძველზეც როდესაც ჯანდაცვის სამინისტრო ახორციელებს სახელმწიფო შესყიდვებს, ყიდულობს მხოლოდ ევროკავშირში, ამერიკაში, იაპონიაში წარმოებულ მედიკამენტებს. სამწუხაროდ საქართველო იმ ჩამონათვალში არ არის. მე პირადად, წინა მთავრობის წარმომადგენლებთან ეს წინადადება გავაპროტესტე, სამწუხაროდ უშედეგოდ. იმედი მაქვს, ახალ მთავრობასთან შედეგს მივაღწევთ.”
ამასთან დაკავშირებით, საქართველოს შრომის,ჯანმრთელობისა და სოციალური დაცვის მინისტრმა დავით სერგეენკომ “გურია ნიუსთან” განმარტა:
“სახელმწიფოსთვის მნიშვნელობა არ აქვს, რომელი ქვეყნის ნაწარმი იქნება ესა თუ ის მედიკამენტი იზოლირებულად. მნიშვნელობა აქვს ფასს და ხარისხს. ზოგადად, ძალიან გამოკვეთილი პოზიცია აქვს სახელმწიფოს ადგილობრივ წარმოებას შეუწყოს ხელი და განავითაროს. მაგრამ, ამისთვის ის უნდა აკმაყოფილებდეს ზემოთ აღწერილ პირობებს, ხარისხს და ფასს. არანაირი აქცენტირება იმაზე, რომ არ ვიყიდოთ ქართული პროდუქტი და ვიყიდოთ უცხოური, არც კი მოიაზრება. თავში არავის არ მოსვლია აზრად ამ ნიშნის მიხედვით განვახორციელოთ ეს ყველაფერი. პირიქით, ადრე რამდენჯერმე განვაცხადე, რომ ჩვენი ამოცანა არის ხარისხის კონტროლი, როგორც მედიკამენტების ასევე ზოგადად სამედიცინო მომსახურების გავხადოთ ძალიან თანამედროვე, მკაცრი და შესაბამისი. ვინც დააკმაყოფილებს ამ პირობებს, შესაბამისად სერვისების, სახარჯი მასალების თუ მედიკამენტების შესყიდვა მოხდება მათგან.”
საქართველოს შრომის,ჯანმრთელობისა და სოციალური დაცვის სამინისტროს ჯანდაცვის დეპარტამენტის განმარტებით, “საქართველოს შრომის, ჯანმრთელობისა და სოციალური დაცვის სამინისტრო და მისი სტრუქტურული ერთეულები მედიკამენტების შესყიდვას ახორციელებს „სახელმწიფო შესყიდვების შესახებ“ კანონის მოთხოვნათა შესაბამისად, რაც ნიშნავს, რომ ტენდერში გამარჯვება შეუძლია ნებისმიერ ქვეყნაში წარმოებულ მედიკამენტს, თუ კი ის აკმაყოფილებს არსებულ მოთხოვნებს.
თუ გადავხედავთ უკანასკნელი წლების განმავლობაში შესყიდულ ფარმაცევტულ ნაწარმს, მწარმოებელი ქვეყნები იყვნენ: დანია, უნგრეთი, საქართველო, ესპანეთი, აშშ, უკრაინა, ჩეხეთი, გერმანია, თურქეთი, ირლანდია, შვეიცარია, იტალია, დიდი ბრიტანეთი, ავსტრია, ბელგია, ინდოეთი და სხვა. სამინისტროს მიერ განხორციელებულ ტენდერში, უმეტეს შემთხვევებში, ქართული კომპანიები იმარჯვებენ, რომლებსაც ამა თუ იმ დასახელების მედიკამენტი შემოაქვთ ქვეყანაში. ამ ეტაპზე სამინისტროს (ან მისი სტრუქტურული ერთეულების) მიერ შესყიდულ მედიკამენტების ჩამონათვალში არის რამდენიმე ქართული წარმოების წამალიც – მაგალითად, შაქრიანი დიაბეტით დაავადებული პირებისათვის, “მუკოვისციდოზით” დაავადებული ბავშვებისათვის. აქვე განვმარტავთ, რომ მოქმედი კანონმდებლობის შესაბამისად, ტენდერში დაუშვებელია, რომ მითითებულ იქნას მწარმოებელი ქვეყანა/მწარმოებელი კომპანია და სხვა ისეთი მახასიათებლები, რომლებიც პირდაპირ მიუთითებს კონკრეტული მედიკამენტის წარმომავლობას.
შესყიდვისას მწარმოებელი ქვეყანასთან მიმართებაში რაიმე ექსკლუზიური პირობები განსაზღვრული არ არის. თუ საქართველოში იწარმოება ეს მედიკამენტები და ამასთან, აკმაყოფილებს ტენდერით განსაზღვრულ მოთხოვნებს, მწარმოებელს აქვს საშუალება, რომ მიიღოს მონაწილეობა ტენდერში და გაიმარჯვოს.
სამინისტროს სისტემებში მაღალხარისხიანი მედიკამენტების შესყიდვის უზრუნველყოფისათვის და ამასთან სახელმწიფო ბიუჯეტით გამოყოფილი თანხების ეფექტურად გამოყენების მიზნით, მიმდინარეობს მუშაობა საერთაშორისო ბაზრების მოკვლევის მიმართულებით, რათა მეტად ხარჯთ–ეფექტური გახდეს წარმოებული შესყიდვები.
სამინისტროსა და მისი სტრუქტურული ერთეულების მიერ განხორციელებული ნებისმიერი შესყიდვის შესახებ დეტალური ინფორმაცია განთავსებულია შესყიდვების ერთიან ელექტრონულ სისტემაში და ხელმისაწვდომია ყველა დაინტერესებული პირისთვის.”
