ჟურნალისტებთან შეხვედრისას ღარიბაშვილმა შსს-ს ძველ კადრებზე ისაუბრა და განაცხადა, რომ უშეცდომო არავინ არის და ეს ადამიანები წინა ხელისუფლების რეჟიმის მსხვერპლნი იყვნენ.
“ჩვენ სამინისტროში მუშაობს 42 ათასი ადამიანი. მე მიდა ის გითხრათ, რომ ამ არჩევნებში სამინისტროს თანამშრომლების უმრავლესობამ ხმა მისცა “ქართულ ოცნებას”. ის რომ ძალიან ბევრი ადამიანი მუშაობდა ძველი ხელისუფლების დროს, ეს მე დანაშაულად არ მიმაჩნია. ისინი არიან პროფესიონალები. ადამიანები, რომლებიც მუშაობდნენ ამ სამინისტროში წლების განმავლობაში. რა თქმა უნდა, უშეცდომო არავინ არის, ბევრი მათგანი იყო უბრალოდ მსხვერპლი წინა რეჟიმის, წინა ხელისუფლების. მათ უწევდათ სამწუხაროდ უსამართლო ბრძანებების და დავალების შესრულება. ისინი დაჭერილი ჰყავდათ სხვადასხვა მექანიზმებით. მათ უკან დგანან ოჯახები. აქ საუბარია ათასობით ადამიანზე. შესაბამისად მე არავითარ დისკომფორტს არ განვიცდი. პირიქით, მე ვხედავ ჯანსაღ განწყობას. მე აბსოლუტურად მესმის მათი. მე მესმის რომ ბევრ მათგანს უწევდა ძალიან არასასიამოვნო დავალების შესრულება. ეს სამწუხაროა. ეს იყო სირცხვილი მთელი სამინისტროსთვის.”- განაცხადა მინისტრმა.
მთავარი პროკურორის, არჩილ კბილაშვილის შემდეგ, ირაკლი ღარიბაშვილი მეორე ძალოვანი მინისტრია, რომელიც უკანონო დავალებების შემსრულებლებს “მსხვერპლებად” მოიხსენიებს.
არჩილ კბილაშვილის მიერ “გურია ნიუსისთვის” მიცემულ ამგვარ განმარტებას საზოგადოების მხრიდან საკმაოდ მძაფრი რეაქცია მოყვა და მათ კონკრეტული საქმეები მოგვაწოდეს, სადაც უწყებებში მომუშავე ძალოვნების მხრიდან ჩადენილ უკანონო ქმედებებს ჰქონდა ადგილი.
“გურია ნიუსმა” შეხვედრაზე შსს მინისტრს შეახსენა, რომ შსს კრიმინალური ექსპერტიზის სამმართველოდან 2006-2007 წლებში, ყველა წამყვანი კადრი გაათავისუფლეს. მხოლოდ იმიტომ, რომ მათ არ შეასრულეს დაკვეთები.
“დღეს ძალიან ბევრი ისეთი კადრი რჩება, რომლებსაც სერიოზული დარღვევებში ადანაშაულებდნენ. მათი ქმედებები განსაკუთრებულად კარგად ჩანდა სასამართლო პროცესებზე. შეგიძლიათ ეს კითხოთ იმ ადვოკატებს, რომლებიც ახლა საპარლამენტო უმრავლესობას წარმოადგენენ, მაგალითად ქალბატონ მანანა კობახიძეს, ბატონ შალვა შავგულიძეს…” _ ასეთი იყო ჩვენი კითხვა.
შსს მინისტრმა ირაკლი ღარიბაშვილმა “გურია ნიუსის” კითხვებს უპასუხა და ჟურნალისტების წინაშე პირობა დადო, რომ შეისწავლიდა ჩვენ მიერ მიწოდებულ ინფორმაციებს.
_ რამდენად მიზანშეწონილად მიგაჩნიათ ამ ადამიანებს ანდოთ ისეთი უმნიშვნელოვანესი მტკიცებულებების შესწავლა, როგორიც არის ვიდეო-აუდიო ჩანაწერების ექსპერტიზა?
_ ვის გულისხმობთ?
_ მაგალითად, ეთერ კუნელაშვილს და გიორგი ხიზანაშვილს. ჩვენ და საზოგადოებას კარგად ახსოვს, მათი დასკვნის საფუძველზე, რომელიც ვიდეომტკიცებულებაზე დადეს, 2011 წელს ე. წ “ნარკოტრაფიკის” საქმეზე ადამიანთა გარკვეულ ჯგუფს როგორ მიუსაჯეს თავისუფლების სამუდამო აღკვეთა, 21, 27 და 30 წლიანი პატიმრობა…
_მე დავინტერესდები აუცილებლად.
_ ისევ საკადრო პოლიტიკას უნდა შევეხოთ, ბატონო ირაკლი. ბიზნესმენი ვალერი შოშიაშვილი “გურია ნიუსისთვის” მიცემულ ვრცელ ინტერვიუში აცხადებს, რომ პროკურატურის და ფინანსური პოლიციის თანამშრომლები წლების განმავლობაში იბარებდნენ და “ერთიანი ნაციონალური მოძრაობის” ანგარიშზე ფულის შეწირვას აიძულებდნენ. ადამიანი რომელსაც ის ასახელებს ზაზა მალუძე, დღესაც მუშაობს თქვენს უწყებაში.
თქვენ ძველ კადრებზე გააკეთეთ განმარტება და მაინტერესებს, რამდენად მიზანშეწონილად მიგაჩნიათ შსს-ში ასეთ კადრებთან ერთად მუშაობა და როგორი იქნება თქვენი რეაგირება თუ დადასტურდა ამ საქმეში თქვენი კონკრეტული თანამშრომლის დანაშაული?
_ უნდა შევისწავლოთ კონკრეტულად ეს ფაქტი. რა თქმა უნდა, გამიჭირდება ასე ზეპირად გითხრათ თუ რა რეაგირებას მოვახდენ და ინდივიდუალურად უნდა შევისწავლოთ ესა თუ ის ფაქტი.
მე აუცილებლად შევისწავლი წინა ფაქტსაც. (გულისხმობს შსს კრიმინალური ექსპერტიზის სამმართველოს ექსპერტების, ეთერ კუნელაშვილს და გიორგი ხიზანაშვილის საქმეს. ავტ)
ფაქტია, ჩვენს მიერ მიწოდებული ინფორმაციების შესახებ მინისტრი საქმის კურსში არ იყო. აქვე უნდა აღვნიშნოთ, რომ ორივე ინფორმაციის გადასამოწმებლად ჩვენ სწორედ ამ დღეებში დავუკავშირდით შსს-ს საზოგადოებასთან ურთიერთობის სამსახურის უფროსს ნინო გიორგობიანს…
