გასაკეთებელი რომ ჯერ კიდევ ბევრია, ვიცით. ისიც ვიცით, რომ სამუშაო ადგილების შექმნა, ამ ხელისუფლების თქმით, მმართველი გუნდის მთავარი ამოცანაა და ისიც, რომ ამ საარჩევნო დაპირების ასასრულებლად არაფერი გაკეთებულა.
თანამდებობებზე, კომუნისტების პერიოდიდან მოყოლებული, ერთი და იგივე სახეები მუშაობენ. მათ გაუძლეს ყველა დროს ყველა ხელისუფლებას, მოერგნენ ყველა იდეოლოგიას; უმრავლესობამ საბჭოთა კავშირში და შემდეგ საქართველოში არსებული ყველა მმართველი თუ მისი სატელიტი პარტია გამოიცვალა. ზოგს გაუმართლა და დააწინაურეს კიდეც, მერე ამ დაწინაურებულებმა შინაურები დაასაქმეს და ახლა, როგორც ხელისუფლების წარმომადგენლები ამბობენ, ჩოხატაურში კადრების დიდი დეფიციტია, რასაც მიგრაციის ზრდას აბრალებენ: _ ნასწავლს და გამოცდილს ჩოხატაურში გაჩერება არ უნდა. სწორედ ამიტომაა ჩოხატაურის გამგებლის მოადგილის თანამდებობა დღემდე ვაკანტური _ შესაფერისი კადრი არ მოიძებნა.
ჩოხატაურის მუნიციპალიტეტის გამგეობაში შესულ სამუშაოს მაძიებელთა განცხადებებს, დიდი ხანია მტვერი ადევს. როგორც ჩანს, ეს განცხადებები არავის უნახავს. აქ არც უმუშევართა ბაზა არსებობს. შესაბამისად, გამგეობაში ვერ გვპასუხობენ, ზუსტად რამდენი განცხადება შევიდა ერთი წლის განმავლობაში დასაქმების მოთხოვნით. ადგილობრივმა ხელისუფლებამ არც ის იცის, რა სპეციალობის, რა ასაკის და რა გამოცდილების მქონე კადრები ჰყავთ ადგილზე.
ოფიციალურად მოწოდებული დოკუმენტების თანახმად ირკვევა, რომ მხოლოდ გამგეობაში გასულ წელს 124 განცხადება შევიდა დასაქმების მოთხოვნით. ყველა მათგანი, საკუთარი ისტორიით, საინტერესოა, თუმცა არის გამორჩეულიც.
124-დან 123 განცხადება ხელითაა დაწერილი, მხოლოდ ერთია ნაბეჭდი სახის _ 2010 წლის 25 ივნისს, ჩაისუბანში მცხოვრები ანნა შარაშენიძე იმ დროინდელ გამგებელს, მამუკა დოლიძეს სთხოვს, რომ სოფელ ჩაისუბანში საბავშვო ბაღის გახსნის შემთხვევაში, განიხილონ მისი კანდიდატურა ბაღის გამგის თანამდებობაზე. განცხადების მიხედვით ირკვევა, რომ განმცხადებელს დიდი გამოცდილება აქვს: “დავამთავრე ქ. თბილისის ჰუმანიტარულ ტექნიკური უნივერსიტეტი მთარგმნელ რეფერენტის სპეციალობით _ ინგლისური ენა. ინსტიტუტის დამთავრებიდან დღემდე ვმუშაობდი: ჰელსინკის მოქალაქეთა ასამბლეის საქართველოს ეროვნულ კომიტეტში (მენეჯერი); ქვეითსაწინააღმდეგო ნაღმზე დაზარალებულ ინვალიდთა ასოციაციაში (მენეჯერი); სოციოლოგიური და მარკეტინგული კვლევების ასოციაცია “ლოგოსში” (კოორდინატორი); შპს “ანალისტიკოსში” (სუპერვაიზერი); ტელევიზია “იმედში” (სატელეფონო კვლევების ინტერვიუერი). გავლილი მაქვს სტაჟირების ასამაღლებელი კურსები: საფრანგეთი, ზაფხულის სკოლა; კორსიკა _ ზამთრის სკოლა; ბაქო _ საერთაშორისო კონფერენცია… 2005 წლიდან ვმუშაობ ჩაისუბნისა და ერკეთის საშუალო სკოლებში პედაგოგად,” _ აღნიშნულია შარაშენიძის განცხადებაში.
როგორც მოვიკვლიეთ, ჩაისუბანში ბაღის გახსნა უახლოეს ხანში იგეგმება, თუმცა, შარაშენიძის კანდიდატურა, რომელსაც მასწავლებლის სერთიფიცირების გამოცდები მაღალი ქულებით აქვს ჩაბარებული, ბაღის გამგის თანამდებობაზე არ განიხილება.
სოფელ გოგოლესუბანში მცხოვრები ეკა გოგოლაძე მამუკა დოლიძისთვის მიწერილ განცხადებაში აღნიშნავს, რომ სურვილი აქვს იმუშაოს მის რაიონში: “2008 წელს დავამთავრე საქართველოს უნივერსიტეტის ეკონომიკური ფაკულტეტი _ სპეციალობით ტურიზმის ეკონომიკა, საკურორტო ორგანიზაცია და მენეჯმენტი. გავლილი მაქვს შემდეგი კურსები: ბუღალტრული აღრიცხვის საფუძვლები საერთაშორისო სტანდარტების შესაბამისად, საბუღალტრო სასაწყობო კომპიუტერული პროგრამა “ორისის ბუღალტერია”, სტაჟირების პროგრამა ბუღალტრებისთვის _ საგადასახადო და საბაჟო კოდექსები. მაღალ დონეზე ვფლობ კომპიუტერულ პროგრამებს. 2008-2009 წლებში ვმუშაობდი შპს “სელიოს” მოლარე ოპერატორ-ბუღალტრის თანამდებობაზე,” _ აღნიშნულია გოგოლაძის განცხადებაში.
მიუხედავად იმისა, რომ ცოტა ხნის წინ მუნიციპალიტეტში ბუღალტრის რამდენიმე შტატი დაამატეს, გამგეობაში დაგვიდასტურეს, რომ ეს განცხადება განხილვითაც არავის განუხილავს.
ფარცხმაში მცხოვრები ლია ცინცაძე გამგებლის მოვალეობის შემსრულებელს გია გიორგაძეს სთხოვს დასაქმებას. ცინცაძის ბიოგრაფიაში მითითებულია, რომ ტექნიკური უნივერსიტეტის ენერგეტიკისა და ტელეკომუნიკაციის ფაკულტეტი დაამთავრა. სტაჟირება გაიარა სს “ნიუ ინვესტის” ენერგეტიკის განყოფილებაში. დაეუფლა ბუღალტრის პროფესიას და 2010 წელს მონაწილეობა მიიღო გარემოს დაცვითი ადვოკატირებისა და ორჰუსის კონვენციით განსაზღვრული უფლებების გამოყენების ტრენინგში.
განმცხადებლებს შორის არის ბუკისციხის მცხოვრები კოტე სიხარულიძეც _ შოთა რუსთაველის სახელობის თეატრისა და კინოს სახელმწიფო უნივერსიტეტის კურსდამთავრებული სამსახურს უკვე რამდენიმე წელია ითხოვს. არადა, ამ სპეციალობის კადრები ჩოხატაურში მართლაც ცოტაა.
დაბაში, ბენდელიანის ქუჩაზე მცხოვრები იასონ საბაშვილი წერს, რომ ოჯახში 9 სული ცხოვრობს, ყველა უმუშევარი და აქედან 3 მცირეწლოვანი ბავშვია. საბაშვილი სახანძრო დაცვის სამსახურში რაიმე ვაკანსიის არსებობის შემთხვევაში ითხოვს დასაქმებას.
განცხადება აქვს დაწერილი რუსთაველის ქუჩაზე მცხოვრებ ნინო ლომთათიძეს. განცხადებაში მითითებულია, რომ არის შეზღუდული შესაძლებლობების მქონე: “მაგრამ ჩემი ავადმყოფობა არ შემიშლის ხელს დასაქმების შემთხვევაში,” _ აღნიშნულია განცხადებაში. ნინო ლომთათიძეს მიღებული აქვს საშუალო სპეციალური განათლება; დაამთავრა დაწყებითი განათლების და პედაგოგიკის ფაკულტეტი; გაიარა საბუღალტრო და კომპიუტერული კურსები; იცის რუსული და ინგლისური ენები _ ეს განცხადებაც, სხვა მრავლის მსგავსად, განხილვას არ დაქვემდებარებია.
გოგოლესუბანში მცხოვრებ მამუკა გოგოლაძესაც ჩოხატაურში სურს მუშაობა. დამთავრებული აქვს საქართველოს ტექნიკური უნივერსიტეტის არქიტექტურის ფაკულტეტი _ სპეციალობით არქიტექტურა, ურბანისტიკა და დიზაინი: “მაღალ დონეზე ვფლობ კომპიუტერულ პროგრამებს და ასევე კომპიუტერის ტექნიკურ მხარეს _ დაშლა, აწყობა, ვირუსებისგან გაწმენდა, პროგრამული უზრუნველყოფა, მაქვს უახლესი პროგრამების საკუთარი ნაკრები,” _ წერია გოგოლაძის განცხადებაში.
მიუხედავად იმისა, რომ ჩოხატაურში არქიტექტორი საერთოდ არ ჰყავთ და საჭიროების შემთხვევაში, ოზურგეთიდან ამოჰყავთ, რატომღაც, მამუკა გოგოლაძით არავინ დაინტერესებულა.
“უამრავი განცხადებების და მასზე მოსული საიმედო პასუხების მიუხედავად, მე კვლავ უმუშევარი ვარ. გამიჩნდა სურვილი, კიდევ ერთხელ მოგმართოთ განცხადებით, რათა იქნებ გაჩნდეს ვაკანსია და დააკმაყოფილოთ ჩემი მოთხოვნა,” _ აღნიშნულია ფარცხმის მცხოვრებ ლიანა მეფარიშვილის განცხადებაში.
ეს იმ განცხადებების მცირედი ჩამონათვალია, რომლებიც გამგეობის, საკრებულოს თუ სხვა საბიუჯეტო ორგანიზაციების კარადებში უყურადღებოდ არის ჩაწყობილი.
იურიდიული, ეკონომიკური, კულტურული თუ სხვა საჭირო განათლების მქონე ადამიანები დღეს სახლში უმუშევრები სხედან, სამსახურებში ის ადამიანები ინიშნებიან, ვისაც ახლობლები და გავლენიანი ნაცნობები ჰყავთ; ისინი, რომლებიც არჩევნებში “ნაციონალების” უზომო ერთგულებით თავს გამოიჩენენ ან ოპოზიციურ პარტიებში “შეეგზავნებიან” იგივე ნაციონალებს _ ასეა დასაქმება ჩვენებურად.
შვილი, რძალი, ბიძა, დისშვილი, მეგობარი, ცოლის დაქალი, ბიძაშვილის სიმამრი, ცოლისძმა _ სწორედ ამ “დამსახურებების” გამო დაინიშნნენ კადრები ბოლო რამდენიმე თვის განმავლობაში ჩოხატაურის მუნიციპალიტეტში _ არც ერთ შემთხვევაში პროფესიას მნიშვნელობა არ ჰქონია. განსაკუთრებით მაშინ, როცა სამსახურებს შტატები “ხათრით” დაემატა.
გამგეობის კულტურის და ძეგლთა დაცვის სამსახურში, ზედამხედველობის სამსახურში, სამუზეუმო გაერთიანებაში, სსს “მომავალში” საშტატო ერთეულები ახლახან დაამატეს და ყველგან თანამშრომლები ახლობლობა-ნაცნობობის გათვალისწინებით დანიშნეს; არც ერთხელ, საზოგადოების თვალის ასახვევადაც კი, იმ ადამიანებთან, რომლებსაც დასაქმების მოთხოვნით დიდი ხანია განცხადება აქვთ დაწერილი, გასაუბრებითაც კი არავის შეუწუხებია თავი.
ჩოხატაურში შემოსული განცხადებების ასლები, ჩვენ გურიის გუბერნატორს, მისი თხოვნის შესაბამისად გადავუგზავნეთ, დასტურად იმისა, რომ ნოდარ დუმბაძის და ანა კალანდაძის გამზრდელ რაიონში ნიჭი არ დაკარგულა, რომ აქ ისევ ცხოვრობენ ნასწავლი, მონდომებული და რაც მთავარია პროფესიონალი ადამიანები. უბრალოდ, ამას დანახვა სჭირდება.
