ევროკავშირის ქვეყნების მოსახლეობას ევროკავშირმა მოუწოდა, მოიმარაგონ საჭმელი პირველადი მოხმარების საგნები ომის ან სხვა მსხვილი საგანგებო სიტუაციის შემთხვევაში _ ეს რეკომენდაცია მოცემულია ევროპის სამოქალაქო და სამხედრო აქტიურობის ანგარიშში, რომელიც ევროკომისიის პრეზიდენტის მრჩეველმა, ფინეთის ექსპრეზიდენტმა საული ნიინისტიუმ წარმოადგინა, _ იუწყება Newsweek.
როგორც აღინიშნა, ევროკავშირი მომზადებული ვერ შეხვდა ვერც კოვიდ 19-ის პანდემიას და ვერ რუსეთის ომს უკრაინის წინააღმდეგ. ამიტომ გადაწყდა რეაქციიდან პროაქტიურ მოქმედებაზე გადასვლა.
დოკუმენტში ევროკავშირის წევრ ქვეყნებს ეძლევათ რეკომენდაცია, მიაწოდონ საკუთარ მოქალაქეებს მითითებები, როგორ მოიმარაგონ საკვები და პირველადი მოხმარების საგნები, როგორ მოახდინონ ევაკუაცია და როგორ მიმართონ საგანგებო სიტუაციების მართვის სამსახურებს.
დოკუმენტში მთავარ საფრთხედ რუსეთის აგრესია მიიჩნევა.
„ჩვენ არ გვაქვს მკაფიო გეგმა, რას გააკეთებს ევროკავშირი წევრ ქვეყნებზე შესაძლო სამხედრო აგრესიის შემთხვევაში. ომის საფრთხე, რომელიც რუსეთიდან მოდის, გვაიძულებს, განვიხილოთ ის, როგორც ჩვენი მზადყოფნის მნიშვნელოვანი ელემენტი; ამასთანავე, არ შევწყვიტოთ მზადება სხვა სერიოზული საფრთხეებისგან თავის დასაცავად“, _ ნათქვამია ანგარიშში.
საული ნიინისტიუ, ასევე, იძლევა რეკომენდაციას, 20 პროცენტით გაიზარდოს ევროკავშირის ბიუჯეტი უსაფრთხოებას და კრიზისებთან გამკლავებისთვის
რამდენადაა შესაძლებელი რუსეთის თავდასხმა ევროკავშირის ქვეყნებზე? Financial Times-ის მონაცემებით, რუსეთის თავდასხმის შემთხვევაში, მთელ ევროპას მხოლოდ 300 000 ჯარისკაცის მობილიზება შეუძლია. ამ ფონზე ნატო ემზადება რუსეთთან შესაძლო სახმელეთო ომისთვის, აშშ-ს ჯარების თანამონაწილეობით. ძირითადად, მზადდება სახმელეთო კორიდორები, რომლებმაც უნდა უზრუნველყონ ჯარების სწრაფი გადასროლა.
Foreign Policy აღნიშნავს, რომ ევროპის ქვეყნებზე რუსეთის თავდასხმა ჰიპოტეტური სცენარიდან თანდათანობით რეალურში გადადის _ ერთი დღეც არ გადის ისე, რომ რუსი ჩინოვნიკები არ დაემუქრონ ხან პოლონეთს, ხან ფინეთს, ხან ბალტიის ქვეყნებს სარაკეტო დარტყმებით ან სამხედრო ინტერვენციით.
ამ დროს, გერმანიის შეიარაღებული ძალების გენერალური ინსპექტორი, გენერალ-ლეიტენანტი კარსტენ ბროიერი დარწმუნებულია, რომ რუსეთი უახლოეს წლებში, შესაძლოა, თავს დაესხას ნატოს.
ამ ფონზე რამდენიმე ქვეყანა, ძირითადად ესტონეთი, იარაღის წარმოებას ზრდის.
როგორ BILD წერს, რუსეთის შესაძლო თავდასხმის მოდელირების მიხედვით, 2027 წელს ნატო აღმოსავლეთ ფლანგს 10 დღე დასჭირდება კოლექტიური თავდაცვის შესახებ მეხუთე მუხლის გასააქტიურებლად.
