ფოთის პორტს ახალი მფლობელი ეყოლება _ ხელიდან ხელში გარდამავალი ნავსადგური, რომელსაც ბოლო ორი წლის განმავლობაში არაბული “რაკია” მართავდა, დანიელების საკუთრება გახდება.
რა ფასად გაიყიდება “საქართველოს საზღვაო კარიბჭე”, ამ ეტაპზე არ კონკრეტდება, თუმცა, ცნობილია, რომ ახალ მფლობელს დამატებით 50 მილიონი დოლარის ინვესტიციის გახორციელება მოუწევს.
“გურია ნიუსმა” გაარკვია, რომ ამ ეტაპზე, აქციების 80% იყიდება და მისი მფლობელი დანიური კომპანია “ეი პი ემ ტერმინალსი” იქნება, რომელიც ბიზნეს-კონგლომერატის “მაერსკის” შვილობილი კომპანიაა. პირველი რეაქცია, რომელიც ამ ინფორმაციის გავრცელების შემდეგ თავად ნავსადგურის თანამშრომლებს ჰქონდათ, უკეთესი მომავლის რწმენაა: “იქნებ, რამე გვეშველოს,” ამბობენ ისინი. მიზეზი გასაგებია _ ბოლო პერიოდში, ხელფასებთან ერთად, სამუშაო ადგილების დაკარგვის შიში ბევრ მათგანს აწუხებდა.
რა იქნება მომავალში, ამის თქმა ამ ეტაპზე ძნელია, რადგან პორტში იგივე მოლოდინი არაბული კომპანიის მოსვლის დროსაც გაჩნდა, თუმცა, ჯერ რუსული ავიაგამანადგურებლების მიერ დაბომბვამ და შემდეგ, მოიჯარე კომპანიების კრიზისმა, ეს იმედები მალევე გააქარწყლა.
მოიჯარე კომპანიებს _ “პრომეთკო ჯორჯიასა” და “ჯე ეს კოს” ფინანსური პრობლემები თანამშრომლებთან, გასული წლის ზაფხულში შეექმნათ. კულუარულად, ამის მიზეზად ვანო ჩხარტიშვილის პოლიტიკური შეხედულებები დასახელდა _ ჩხარტიშვილი ამ კომპანიების თანადამფუძნებელია, ოფიციალურად კი _ ტვირთების შემცირება. არადა, ეს ის ოპერატორი კომპანიები გახლდათ, რომლებიც ფოთის პორტში, ძირითად ტვირთებს იღებდნენ და აგზავნიდნენ მსოფლიოს სხვადასხვა კუთხეში. ამ დროისთვის ორივე კომპანიას ფოთის პორტში მუშაობა შეწყვეტილი აქვს. პარალელურად, უმუშევარი დარჩა 450 თანამშრომელი, რომელთა მხოლოდ მეათედმა მოახერხა სამსახურში დაბრუნება.
“გურია ნიუსთან” საუბარში ფოთის მერი ვახტანგ ლემონჯავა, რომელსაც ამ თანამდებობამდე, პორტის ერთ-ერთი სამსახურის დირექტორის თანამდებობა ეჭირა, თანამშრომლების შემცირებას და ამ ფორმით ქალაქში სოციალური ფონის დამძიმებას გამორიცხავს, პირიქით, ის დამატებით ინვესტირებაზე საუბრობს: _ “მაერსკი” ფოთის პორტის აქციების 80%-ს ყიდულობს. სახელმწიფო ამ კომპანიასთან მუშაობს, რომ მან განახორციელოს ინვესტიციები. ამ მიმართულებით შეთანხმება მიღწეულია _ ხელშეკრულებაში დაფიქსირდება, დაახლოებით, 50 მლნ აშშ დოლარის ინვესტიციების გახორციელების ვალდებულება. ეს არის პოზიტიური ნაბიჯი და ახალი სისხლი ფოთის პორტისთვის, ქალაქისთვის და მთლიანად ქვეყნის ეკონომიკისთვის,” _ ამბობს ლემონჯავა.
მისივე თქმით, უმსხვილესი საზღვაო გადამზიდავი კომპანია “მაერსკის” მიერ შექმნილ “ეი პი ემ ტერმინალსთან” მოლაპარაკებებს “რაკ ჯორჯია” უკვე ორი თვეა აწარმოებს. ლემონჯავას თქმით, პორტის აქციათა 20% “რაკია ჯგუფის” მფლობელობაში რჩება და არაბული კომპანიის წარმომადგენელი ნავსადგურის ჰაიმენეჯმენტში იქნება. კომპანიებს შორის მიმდინარე მოლაპარაკებები “გურია ნიუსს” ეკონომიკისა და მდგრადი განვითარების სამინისტროშიც დაუდასტურეს.
როგორც ინტერნეტ-რესურსების დახმარებით გავარკვიეთ, “მაერსკის” შვილობილი “ეი პი ემ”-ისთვის ფოთის პორტი, 54-ე ნავსადგური იქნება.
“მაერსკი” ბიზნესის სხვადასხვა სფეროში საქმიანობს, მათ შორის სატრანსპორტო და ენერგო სექტორებში. კომპანიას საკუთარი წარმომადგენლობები მსოფლიოს 135 ქვეყანაში აქვს. იგი გადაზიდვებს ამ დრომდეც ახორციელებდა ფოთის პორტის გავლით, შესაბამისად, ფოთის ნავსადგურის პოტენციალი მისთვის ცნობილია.
როგორც კორპორაცია “ფოთის საზღვაო ნავსადგურის” საზოგადოებასთან ურთიერთობის სამსახურის უფროსმა კახა გუგუჩიამ “გურია ნიუსს” უთხრა, დეტალური ინფორმაცია პირობებზე, რომლის მიხედვითაც, ახალი კომპანია პორტის მმართველობაში უნდა მოვიდეს, უახლოეს მომავალში, სპეციალურ ბრიფინგზე გახდება ცნობილი: “პროცესი დასრულებული არ არის, ამიტომ წინასწარი კომენტარებისგან, ამ ეტაპზე, თავს შევიკავებთ,” _ გვითხრა გუგუჩიამ.
არაბულმა “რაკიინ ინვესტმენტმა” ფოთის პორტის აქციების 51% 2008 წელს 90 მილიონ დოლარად, ხოლო 49% 2009 წელს 65 მილიონად შეიძინა.
როგორც ზევით აღვნიშნეთ, ფოთის მერი ახალი მფლობელის მიმართ გარკვეულ ვალდებულებებზეც საუბრობს, კერძოდ, სოლიდურ ფინანსურ ინვესტირებაზე, თუმცა, არ უნდა დაგვავიწყდეს, რომ თავის დროზე, ფოთის პორტი “რაკიასაც” გარკვეული ვალდებულებებით გადაეცა. მათ შორის ერთ-ერთი ფოთში თავისუფალი ინდუსტრიული ზონის (თიზ) მოწყობას ითვალისწინებდა. თუ რამდენად გაამართლა ინდუსტრიული ზონის შექმნის იდეამ ფოთთან მიმართებაში და რა იმედებს ამყარებდნენ მასზე დასავლეთ საქართველოში მცხოვრები ადამიანები, რომლებსაც პრეზიდენტი ამ ზონაში უპირობო დასაქმებას ჰპირდებოდა; იხილეს თუ არა ფოთელებმა შეპირებული საოცრებები _ ამის შესახებ “გურია ნიუსის” უახლოეს ნომერში წაიკითხავთ, მანამდე კი, გეტყვით, რომ აღებული პირობა “რაკიამ” არ, ან ვერ შეასრულა.
