ეს განსაკუთრებით რეგიონებში იგრძნობა, სადაც ცვლილებები, და ისიც საკამათო, მხოლოდ საკადრო გადაადგილებებით გამოიხატა.
არჩევნების შემდეგ ჩოხატაურში შეიცვალა გამგებელი, მოადგილეები, სამსახურის უფროსები და სოფლის რწმუნებულები. ამ პოსტებზე “ნაციონალები” “მეოცნებეებმა” ჩაანაცვლეს, თუმცა, კოალიციის რიგი წევრები, რომლებიც ახლა ამტკიცებენ, რომ გამარჯვებისთვის ყველაფერს აკეთებდნენ, სამსახურებში “ნაციონალების” დარჩენის გამო პროტესტს გამოთქვამენ და უფრო მეტიც, აქციებსაც კი აანონსებენ.
კოალიციის საარჩევნო შტაბის უფროსი, გოჩა ჯიქია ამბობს, რომ ამ ადამიანების პროტესტი რაღაც ნაწილში მისაღებია, რაღაც ნაწილში კი _ არა. ჯიქიას თქმით, კოალიციის წევრების ნაწილის განაწყენება იმან გამოიწვია, რომ მათი დასაქმება ვერ მოხერხდა: _ ჩვენ ამ ადამიანებს სამსახურები შევთავაზეთ, მაგრამ უარი გვითხრეს. ალბათ, მათ კვალიფიკაციას არ შეესაბამებოდა, _ ამბობს კოალიციის ადგილობრივი ორგანიზაციის ერთ-ერთი ლიდერი.
ოფიციალურად მოპოვებული ინფორმაციის თანახმად, ჩოხატაურის მუნიციპალიტეტის გამგეობაში, არჩევნების შემდეგ, დასაქმების მოთხოვნით 200-ზე მეტი განცხადებაა შესული. უმრავლესობა “ქართული ოცნების” წევრებს ეკუთვნით (ყოველ შემთხვევაში, ასეა მითითებული განაცხადებში).
განცხადებების ავტორების ნაწილი დასაქმებულია, ნაწილი ისევ მოლოდინში, თუმცა, ორივე შემთხვევაში კითხვები ბევრია.
თანმიმდევრობით რომ მივყვეთ, უნდა ითქვას, რომ სამსახურის მაძიებელთა ნაწილი, რომელიც ახლა საუბრობს “ნაციონალების” მხრიდან შანტაჟზე და ზეწოლაზე, ჩოხატაურში არჩევნებამდე ცოტა ხნით ადრე გამოჩნდა. ყოველ შემთხვევაში, საზოგადოებას და ჩვენს მკითხველს, მათი აქტიურობა ნაკლებად ახსოვს.
მართალია, ახლა იმის გამო გამოთქვამენ პროტესტს, რომ მათი დასაქმება ვერ მოხერხდა და გარკვეულ თანამდებობებზე ისევ “ნაციონალები” რჩებიან, მაგრამ უნდა ითქვას, რომ მათი პროტესტი იმ დროს, როდესაც მათ თანამებრძოლებს აკავებდნენ, იარაღს თუ ტროტილს უდებდნენ, როცა ჟურნალისტებს ადმინისტრაციულ დაწესებულებაში არ უშვებდნენ, ფიზიკურ შეურაცხყოფას აყენებდნენ, არსად დაფიქსირებულა.
შორს რომ არ წავიდეთ, იმის გახსენებაც საკმარისია, რომ ერთი წლის წინ, როდესაც კონტროლის პალატამ გურიაში მასობრივი ეგზეკუცია გაახორციელა, საზოგადოებისთვის ყველაზე პატივსაცემი პირები და ოპოზიციის წევრები დაკითხვაზე დაიბარა, ტანსაცმელი გახადა და შანტაჟზეც კი მიდიოდა, გამგეობასთან მხარდაჭერის გამოსახატავადაც კი არ გამოჩენილან.
როდესაც მამუკა ცინცაძის დაკავების დროს, ჟურნალისტსა და ჩოხატაურის პოლიციის თანამშრომელს შორის მომხდარ ფიზიკურ დაპირისპირებას თითქმის მთელი საქართველო გამოეხმაურა, ყველა ოპოზიციურმა პარტიამ სპეციალური განცხადება გაავრცელა, ჩოხატაურული ოპოზიცია და დღეს გამოჩენილი, მათი თქმით, “ნაციონალებთან” მედგრად მებრძოლი” აქტივისტები მაშინ დუმდნენ და არათუ ოფიციალური განცხადება, უბრალო, სიტყვიერი მხარდაჭერაც კი არ გამოუხატავთ.
არც მაშინ აღშფოთებულან, როდესაც გამგეობაში ჟურნალისტებს გადაადგილება აუკრძალეს. უფრო მეტიც, როდესაც “გურია ნიუსი” ამ საკითხზე ხმამაღლა საუბრობდა, სასამართლოში სარჩელი შეჰქონდა და საკრებულოს დეპუტატებს კანონის დაცვის და ამ საკითხით დაინტერესებისკენ მოუწოდებდა, სიტყვაც არავის უთქვამს, მათ შორის, არც იმ დროინდელ ოპოზიციონერ დეპუტატებს, რომლებიც დღეს ამაყად ამბობენ, რომ “ქართული ოცნების” გამარჯვებაში დიდი წვლილი მიუძღვით.
ასეთი ფაქტების ჩამოთვლა ძალიან შორს წაგვიყვანს, თუმცა, შორს წასვლა არ დასჭირდება იმის მიხვედრას, რომ ადამიანების გარკვეული ნაწილი, ახლა სიტუაციის სათავისოდ შემობრუნებას ცდილობს. თუმცა, ავიწყდებათ მთავარი _ საზოგადოებას, რომელიც ამ წლების მანძილზე ყველაფერს ხედავდა, რომელსაც ყველაფერი ესმოდა, სიყალბე არ ეპარება და ამას არავის აპატიებს.
რაც შეეხება სტატიის დასაწყისში აღნიშნულ ინფორმაციას დასაქმების მსურველთა შესახებ _ როგორც აღვნიშნეთ, თამაზ ჯინჭარაძეს დასაქმებას ბევრი სთხოვს. თანაც კონკრეტულ თანამდებობებზე.
მაგალითად, ერთ-ერთი მოქალაქისთვის, რომელიც, როგორც ირკვევა “ქართული ოცნების” წევრია, მთავარია, დასაქმდეს: “გთხოვთ, ვაკანსიის შემთხვევაში განიხილოთ ჩოხატაურის მუნიციპალიტეტში იურიდიული სამსახურის უფროსის მოვალეობის შემსრულებლის ან ზედამხედველობის სამსახურის უფროსის მოვალეობის შემსრულებლის თანამდებობაზე ჩემი კანდიდატურა. ამ ვაკანსიების არქონის შემთხვევაში, თქვენს მიერ შემოთავაზებული სამსახურის.” _ აღნიშნულია ამ მოქალაქის მიერ გამგეობაში შეტანილ განცხადებაში.
ერთი ჩოხატაურელი 5 თებერვალს შეტანილ განცხადებაში აღნიშნავს: “გთხოვთ, გამოთავისუფლებულ ვაკანსიაზე საინფორმაციო ანალიტიკური სამსახურის უფროსის მოვალეობის შემსრულებლად განიხილოთ ჩემი კანდიდატურა”. იმავე დღეს, იგივე პიროვნებას კიდევ ერთი განცხადება შეაქვს და წერს: “გთხოვთ, გამოთავისუფლებულ ვაკანსიაზე კულტურის, განათლების და სპორტისა და ახალგაზრდული საქმეთა სამსახურის უფროსის მოვალეობის შემსრულებლად განიხილოთ ჩემი კანდიდატურა”.
ასეთი სახის განცხადებები საკმაოდ ბევრია. ასევე ბევრია ისეთი ადამიანების რიცხვი, რომელთა განცხადებებიც დაკმაყოფილებულია, თუმცა, ზოგიერთს უმაღლესი განათლება არ აქვს, ზოგიერთმა წერა-კითხვა საშუალოზე ცუდად იცის და მათი ერთადერთი “დამსახურება” და “პრივილეგია” როგორც ჩანს, მხოლოდ “ქართული ოცნების” წევრობა თუ მხარდაჭერაა, რომლის შესახებაც, რატომღაც, მხოლოდ ახლა გახდა ცნობილი. სხვას თუ არა, ჟურნალისტებს მაინც უნდა გვცოდნოდა, ვინ ვინ იყო და ვინ ვის მხარეს იბრძოდა.
ერთ-ერთი სამსახურის ხელმძღვანელს ბიოგრაფიაში რამდენიმე ჩასწორება აქვს გაკეთებული და მარტივად რომ ვთქვათ, პირად საქმეში ჩაკრული დოკუმენტი გადაჯღაბნილი აქვს.
კოალიციის ერთ-ერთი ლიდერი გოჩა ჯიქია ჩვენს ყოველკვირეულ სატელევიზიო გადაცემა “კვირის თემაში” ამ საკითხზე საუბრისას აღნიშნავს, რომ ამაში გასაოცარი არაფერია და დასძენს, რომ ამ მოქალაქისთვის გამგეობაში ბიოგრაფიის ფორმა უნდა შეეთავაზებინათ (გადაცემა შეგიძლიათ იხილოთ ჩვენს ვებ გვერდზე წწწ.გურიანეწს.ცომ), თუმცა, როდესაც ადამიანს, სამსახურის უფროსობაზე ამბიცია აქვს, განცხადების გამართულად წერა მაინც უნდა შეეძლოს, თანაც ისე, რომ რამდენჯერმე არ ჩაასწოროს.
უნდა ითქვას ისიც, რომ მსგავსი კადრები “მხოლოდ “ქართული ოცნების” არ ჰყავს _ “ნაციონალურ მოძრაობის” ხელისუფლებაში ყოფნის დროსაც უამრავი უდიპლომო და წერა-კითხვის ნაკლებად მცოდნე ადამიანია დანიშნული თანამდებობებზე.
ერთ-ერთი ჩინოვნიკის კადრების აღრიცხვის პირად ფურცელში ვკითხულობთ: “განათლება _ საშვალო”. ასეთივე “საშვალო” განათლების ადამიანები არიან დანიშნულები სხვადასხვა თანამდებობებზე, კიდევ ერთ ჩინოვნიკს კი კადრების აღრიცხვის პირად ფურცელში, განათლების გრაფაში უწერია: “ქართული”.
როგორც ზემოთ აღვნიშნეთ, ეს მხოლოდ მცირედი ნაწილია იმ განცხადებებისა და პირადი საქმეებისა, რომლებიც მუნიციპალიტეტის გამგეობიდან გამოვითხოვეთ. თუმცა, ესეც საკმარისია ვიფიქროთ, რომ ქვეყანას კადრების დეფიციტი აქვს ან ეს დეფიციტი მიზანმიმართულად იქმნება.
ისიც ხაზგასასმელია, რომ საჯარო სამსახურში ადამიანი პროფესიონალიზმის მიხედვით უნდა ინიშნებოდეს და მოსახლეობა საკუთარ ანუ ბიუჯეტის ფულს ვინმეს პარტიული კუთვნილების გამო არ უნდა უხდიდეს.
