როგორც პროკურატურა ირწმუნება, სასამართლოში მათ ბრალეულობას 118 მოწმე დაადასტურებს, რომელთა დაკითხვაც თბილისის საქალაქო სასამართლოში მომავალი კვირიდან დაიწყება.
პროკურატურის ინფორმაციით, სპირტის იმპორტიორებმა ნიკოლოზ დავითაშვილმა და იოსებ იმნაძემ, რომელთა ბიზნესსაც კეზერაშვილი პირადი გამორჩენის სანაცვლოდ მფარველობდა, პროკურატურასთან ითანამშრომლეს, ბრალი აღიარეს და უახლოეს დღეებში საპროცესო შეთანხმების გაფორმებას ელიან.
საბრალდებო დასკვნის მიხედვით, დავითაშვილმა და იმნაძემ ყურძნის მასალასთან ეთილის სპირტის შერევით და ტექნოლოგიური მანიპულაციებით, ფალსიფიცირებული საკონიაკე სპირტის წარმოება განიზრახეს.
განზრახვის სისრულეში მოსაყვანად, მათ დაარეგისტრირეს შპს „განთიადი“ და შპს „ნაფარეული“ და სახელმწიფო გადასახადებისაგან თავის არიდების მიზნით შეადგინეს დანაშაულებრივი სქემა, თუ როგორ უნდა შემოსულიყო ეთილის სპირტი შიდა ბაზარზე ისე, რომ არ მოქცეულიყო იმპორტის დაბეგვრის რეჟიმში.
დავითაშვილმა და იმნაძემ სუფრაზე გაიცნეს ფინანსური პოლიციის იმჟამინდელი უფროსის დავით კეზერაშვილის დის ქმარი მეირი ჯანაშვილი, გაანდეს დანაშაულებრივი გეგმა და სთხოვეს შუამდგომლობა დავით კეზერაშვილთან.
ჯანაშვილი მოელაპარაკა კეზერაშვილს, რომელმაც ბიზნესის მფარველობის სანაცვლოდ 1 ლიტრ სპირტზე 0,3 ამერიკული დოლარის გადახდა მოითხოვა.
გამოძიების მასალებით, კეზერაშვილისგან თანხმობის მიღების შემდეგ. იმნაძემ და დავითაშვილმა უკრაინული სპირტის საწარმოს შეუკვეთეს 480 ტონა ეთილის სპირტი და საქმიანობა დაიწყეს.
2007 წლის 8 იანვარს, 240 ტონა სპირტი დავით კეზერაშვილის დახმარებით, საქართველოში შემოვიდა, რის სანაცვლოდაც მან ქრთამის სახით 72 000 აშშ დოლარი აიღო. ამავე წლის 5 თებერვალს, აღნიშნულმა პირებმა საქართველოში კვლავ 240 ტონა სპირტი შემოიტანეს _ კეზერაშვილს ისევ 72 000 აშშ დოლარი ერგო.
2007 წლის 7 თებერვლიდან 11 მაისის ჩათვლით, საქართველოში 2445 065 ლიტრი სპირტის შემოტანის სანაცვლოდ, კეზერაშვილმა ქრთამის სახით 733 519 აშშ დოლარი მიიღო.
2007 წლის მაისის ბოლოს, უკვე თავდაცვის მინისტრმა კეზერაშვილმა ქრთამის სახით გადასახდელი თანხის გაზრდა მოითხოვა. კერძოდ, 1 ლიტრ სპირტზე ის 0,7 დოლარს ითხოვდა, შესაბამისად, 2007 წლის 8 ივნისიდან 31 დეკემბრის ჩათვლით, საქართველოში შემოტანილ 3 353 269 ლიტრ სპირტზე მას 2 011 961 აშშ დოლარი გადაუხადეს.
2008 წლის იანვრიდან, კეზერაშვილმა კვლავ გაზარდა ქრთამად მისაღები თანხის რაოდენობა და 2 203 646 ლიტრ სპირტზე 1 542 552 აშშ დოლარი აიღო. 2008 წლის ოქტომბრიდან დეკემბრამდე, შემოტანილ 410 252 ლიტრ ეთილის სპირტზე ქრთამად აიღო 237 946 აშშ დოლარი.
თავდაცვის მინისტრის თანამდებობიდან გათავისუფლების შემდეგ, დავით კეზერაშვილმა გააგრძელა დანაშაულებრივი საქმიანობა. როგორც პროკურატურა აცხადებს, დავითაშვილი, ჯანაშვილი, იმნაძე, კეზერაშვილი ე. წ. “პიქსელის შენობაში”, ამ უკანასკნელის კაბინეტში, ხვდებოდნენ ერთმანეთს. ამ პერიოდში, საბრალდებო დასკვნის მიხედვით, 163 230 ლიტრი კონტრაბანდული სპირტის შემოტანის შედეგად კეზერაშვილმა ბიზნესმენებისგან 94 673 აშშ დოლარი მიიღო.
საერთო ჯამში, დავით კეზერაშვილს, როგორც მოხელეს, ქრთამის სახით 4 669 978 აშშ დოლარი, ხოლო როგორც ორგანიზებული დანაშაულებრივი ჯგუფის ხელმძღვანელს, კერძო პირს 7 664 705 აშშ დოლარი აქვს მიღებული, _ ამტკიცებს პროკურატურა. აღნიშნულ თანხებს კეზერაშვილი შუამავლის _ მისი დის მეუღლის მეირი ჯანაშვილის მეშვეობით იღებდა.
ამ წლების მანძილზე დანაშაულებრივი მანიპულაციებით, საქართველოში სულ შემოტანილ იქნა 19 868 312 ლიტრი ეთილის სპირტი, გადასახადების დამალვით, სახელმწიფომ იზარალა 49 392 341 ლარი. თავად კეზერაშვილმა კი, საერთო ჯამში, უკანონო შემოსავლის სახით, მიიღო 12 334 683 აშშ დოლარი .
ბრალდებულებმა _ დავითაშვილმა და იმნაძემ დანაშაული აღიარეს და დღეისთვის პროკურატურასთან საპროცესო შეთანხმების დადებას ელიან. იმნაძის ჩვენების მიხედვით, დროებითი გადამუშავების რეჟიმით შემოსული სპირტი რეალურად არ ტოვებდა საქართველოს ტერიტორიას. მისივე ჩვენებით, საქმიანობის დროს მათ არც ერთხელ არ შექმნიათ პრობლემები მებაჟეებთან, რადგან წინასწარ შერჩეული მებაჟეები ტვირთის საქართველოდან გასვლას ყალბად აფიქსირებდნენ.
ნიკოლოზ დავითაშვილმა გამოძიებისთვის მიცემულ ჩვენებაში დაადასტურა კეზერაშვილის მიერ მათი ბიზნესის მფარველობის ფაქტი, დაადასტურა, რომ ის არაერთხელ შეხვედრია კეზერაშვილს, როგორც ფინანსური პოლიციის შენობაში, ასევე, თავდაცვის სამინისტროშიც, ხოლო მას შემდეგ, რაც კეზერაშვილი აღარ იყო საჯარო მოხელე, მათი შეხვედრა ე. წ. “პიქსელის შენობაში” კეზერაშვილის სამუშაო კაბინეტში ხდებოდა.
„ნაფარეული 21“-ის დირექტორმა ალექსანდრე იაკუბოვმა გამოძიებაში დაადასტურა, რომ უკრაინიდან ტრანზიტით შემოსული სპირტს საქართველოს ტერიტორია არ დაუტოვებია. მისგან ხდებოდა საკონიაკე სპირტის დამზადება, რაც „ნაფარეული 21“- ის სახელით კვლავ უკრაინაში გადიოდა.
ბრალდების კიდევ ერთი მოწმე _ მიხეილ ბრეგვაძე ადასტურებს, რომ 60 ათასი დოლარი პირადად გადაირიცხა საქართველოს ბანკში დავით კეზერაშვილის პირად ანგარიშზე. გამოძიების მტკიცებით, ეს ქრთამის სახით გადახდილი თანხის მხოლოდ მცირე ნაწილია.
პროკურატურა სასამართლოში მებაჟე ინსპექტორების დაკითხვასაც აპირებს, რომლებიც, პროკურატურის მტკიცებით, დაადასტურებენ, რომ ფინანსური პოლიციის ხელმძღვანელების მითითებით, ისინი საბაჟო კონტროლიდან ხსნიდნენ ეთილის სპირტს და ყალბად აფიქსირებდნენ საქართველოდან მის გატანას. სასამართლოში, ასევე, დაიკითხებიან მძღოლები, რომლებიც დაადასტურებენ, რომ მათ არც ერთ შემთხვევაში არ დაუტოვებიათ საქართველოს საზღვარი და მათი ქვეყნიდან გასვლა ყალბად ფიქსირდებოდა.
პროკურატურის მოწმეები ასევე დაადასტურებენ იმ ფაქტს, რომ რეალურად არ ხდებოდა საკონიაკე სპირტის დამზადება, რადგან საქართველოში არ არის ამ რაოდენობის ღვინის ლექი და ე. წ. საკონიაკე სპირტს ეთილის სპირტზე სხვადასხვა მინარევების დამატებით იღებდნენ.
სასამართლო პროცესზე დაიკითხებიან ის ადამიანები, რომლებიც ვითომდა „ნაფარეული 21“-ზე ყიდდნენ ღვინის ლექს. პროკურატურის მტკიცებით, ისინი დაადასტურებენ, რომ რეალურად მათგან არაფრის ყიდვა არ ხდებოდა.
თავდაცვის ყოფილ მინისტრ დავით კეზერაშვილს ადვოკატი გიორგი ჩივიაშვილი იცავს. ის ბრალდებას აბსურდულს უწოდებს და ამტკიცებს რომ კეზერაშვილი პოლიტიკურად იდევნება. მისი თქმით, პროკურატურა კეზერაშვილს 12 მილიონი დოლარის ქრთამის აღებას ედავება და მხოლოდ 60 ათასი დოლარის ჩარიცხვის ფაქტს ადასტურებს. ადვოკატი ეჭვქვეშ აყენებს შემოტანილი და რეალიზებული სპირტის რაოდენობასაც, რადგან მისი თქმით, ამ შემთხვევაში, მთელი ერი ალკოჰოლური ზემოქმედების ქვეშ უნდა ყოფილიყო.
ქრთამის ბუნებიდან გამომდინარე, ადვოკატს არ ესმის, როგორ შეიძლება სახელმწიფო მოხელემ ქრთამის სახით აიღოს მაგალითად 733 519 ან 22 011 961 აშშ დოლარი.
ადვოკატს ასევე დაუჯერებელ ფაქტად მიაჩნია, რომ კეზერაშვილი, რომელიც 2008 წლის შემდეგ აღარ იყო საჯარო მოხელე, მაინც ინარჩუნებდა გავლენას და მფარველობდა ბიზნესს ისე, რომ სხვა უწყებებს მაგალითად, სოფლის მეურნეობის სამინისტროს, ან შემოსავლების სამსახურს არ აძლევდა წილს.
„გამოძიება ამტკიცებს, რომ 12-ივე მილიონი კეზერაშვილმა ჩაიდო ჯიბეში, რაც დაუჯერებელია,“ _ აცხადებს კეზერაშვილის ადვოკატი.
სასამართლოში ადვოკატებმა კეზერაშვილის და ჯანაშვილის საქმის ცალკე წარმოებად გამოყოფა მოითხოვეს, რადგან, მათი მტკიცებით, 118 მოწმის ჩვენებიდან მხოლოდ 2 გვერდი ეთმობა მათი დაცვის ქვეშ მყოფებს .
მოსამართლემ ადვოკატების შუამდგომლობა არ დააკმაყოფილა და შესაბამისად საქმის განხილვა ჩვეულ რეჟიმში გაგრძელდება.
