“ეს ერთ-ერთი წინასაარჩევნო დაპირება იყო პრემიერის და იწყება ამ დაპირებების ასრულების კალენდარი. სამეგრელოს რეგიონი ჩვენთვის განსაკუთრებულად მნიშვნელოვანია აფხაზეთის რეგიონთან სიახლოვის გამო, თუმცა მხოლოდ ესეც არ არის. პროექტი უკვე მაქვს და ვცდილობთ, გავაძლიეროთ ის დისციპლინები, რაც ყველაზე პრიორიტეტულია ხალხისთვის.
ზუგდიდში ვაპირებთ ავაშენოთ მრავალპროფილური საავადმყოფო, რომელიც იქნება სახელმწიფო მართვაში, ოღონდ მისი შემოსავლები სახელმწიფო დოტაციაზე არ იქნება. ყველა ადამიანი იქნება დაზღვეული, უბრალოდ ამ საავადმყოფოში შევლენ და სერვისს შეიძენენ იქ. მართვა განხორციელდება სახელმწიფოსგან.” _ განაცხადა დავით სერგეენკომ “გურია ნიუსთან”
_ სამომავლოდ აპირებთ, რომ მსგავს მოდელზე გადახვიდეთ? გაქვთ თუ არა ანალოგიური პროექტის განხორციელება სხვა რეგიონებისთვისაც გათვლილი?
_ ასეთი გათვლა ნამდვილად გვაქვს, ოღონდ ეს დამოკიდებულია მოსახლეობის რაოდენობაზე, მის სიმჭიდროვესა და რეგიონულ გამოწვევებზე. ყოველთვის ვამბობდი და ახლაც ვამბობ, თბილისში მინიმუმ სამია ასეთი საჭირო და მინიმუმ ორი დასავლეთ საქართველოში, ერთი _ სამეგრელოში და ერთი _ აჭარაში, ან ბათუმში, ან სულაც ქობულეთში.
_ ზუგდიდის მაჟორიტარს, როლანდ ახალაიას თუ შეატყობინეთ ახალი საავადმყოფოს შესახებ?
_ იდეაში, უნდა იცოდეს ამის შესახებ და გაიგებს ალბათ…
_ როგორც თქვენი საუბრიდან ირკვევა, ეს სხვა მოდელია და არა მუნიციპალური კლინიკა. მუნიციპალური საავადმყოფოების პროექტის განხორციელებას თუ გეგმავთ?
რაც შეეხება თქვენს კითხვას, ვგეგმავთ თუ არა მუნიციპალური კლინიკების შექმნას, დიახ, ვგეგმავთ, უბრალოდ ამ წელს ვერ მოხერხდება. გვინდა, რომ რეგიონებში ადგილობრივმა მუნიციპალიტეტმა განახორციელოს ასეთი პროექტი _ სამედიცინო დაწესებულებების მართვა, რაც გულისხმობს ერთგვარ მუნიციპალურ საავადმყოფოებს. ასეთი გეგმა ნამდვილად არის, არის კონკრეტული მიმართულებები და მოლაპარაკებები. მაგრამ ახლავე უნდა ჩამოვყალიბდეთ იმაზე, რომ მუნიციპალური საავადმყოფო ზოგადად ნიშნავს, რომ ეს სამედიცინო ინფრასტრუქტურა არის ადგილობრივი მმართველობის საკუთრებაში. ამასთან დაკავშირებით კონსულტაციები მალე დასრულდება და დაიწყება გახორციელება. ანუ ადგილობრივი მუნიციპალიტეტი აფინანსებს იქ მიმდინარე სამედიცინო აქტივობებს, ხოლო დაფინანსება გახორციელდება სახელმწიფო პროგრამის ფარგლებში.
ვადასტურებ _ დიახ, ეს განიხილება და მიმდინარეობს ძალიან აქტიური და კონკრეტული მუშაობა, რის პირველ შედეგებსაც ძალიან მალე დავინახავთ. ეს იქნება ძირითადად მაღალმთიანი რეგიონების შედარებით პატარა კალიბრის სამედიცინო დაწესებულებები.
